भक्ती शक्ती रेल्वे प्रवासी भजन स्पर्धा संपन्न
नवी मुंबई : रेल्वेच्या मध्य, पश्चिम व हार्बर लाईन्स वरून प्रतिदिन प्रवास करणाऱ्या चाकरमानी प्रवाश्यामार्फत सकाळ व सायंकाळी रामनाम गात आध्यात्मिक वातावरण अधिक तेजस्वी करणाऱ्या 'भक्ती शक्ती रेल्वे प्रवासी भजन स्पर्धा २०२५' चे आयोजन सलग दुसऱ्या वर्षी वाशी येथील सिडको ऑडिटोरिअम येथे करण्यात आले होते. भजनी परंपरेतून सामाजिक दायित्व जपणारी रेल्वे प्रवासी भजन मंडळे या स्पर्धेत सहभागी होऊन नामस्मरण आणि संतवाणीच्या माध्यमातून वातावरण भक्तिरसात न्हाऊन निघाले होते.
या नामसंकीर्तन सोहळ्यास वनमंत्री गणेश नाईक यांची प्रमुख पाहुणे म्हणून उपस्थिती लाभली होती. त्यांनी देखील भजनाचा आस्वाद घेतला.
यावेळी वनमंत्री गणेश नाईक यांच्याकडे प्रवासी भजनी मंडळानी निवेदनाद्वारे मांडलेल्या समस्या लक्षात घेऊन त्या समस्या वा सूचनांबाबत सकारात्मकता दर्शवीत मंत्री नाईक यांनी मध्य व पश्चिम रेल्वेच्या वरिष्ठ अधिकाऱ्यांची बैठक रेल्वे मुख्यालयात लवकरच आयोजित करणार असल्याचे आयोजक व भजनी मंडळाना आश्वस्त केले. रेल्वे प्रवासात भक्तीचा जागर गाऊन सकारात्मक विचारधारा घेऊन आपल्या कर्तव्यावर सेवा देणाऱ्या भजनी मंडळींचे वा त्यांच्या कुटुंबियांचे कौतुक देखील नाईक यांनी केले.
नवी मुंबई पुनर्वसन सामाजिक संस्थाचे संस्थापक अध्यक्ष व माजी विरोधी पक्षनेते दशरथ भगत यांच्या पुढाकाराने छत्रपती शिवराय भजन मंडळ, वाशी, श्री संत तुकाराम महाराज रेल्वे प्रवासी भजन मंडळ, वाशी व संलग्न नवविधा भक्ती सेवा समिती हार्बर लाईन यांच्या संयुक्त विद्यमाने या स्पर्धेचे आयोजन करण्यात आले होते. रविवारी रोजी सकाळी ७ वाजता वाशी रेल्वे स्टेशन येथे CST कडे जाणाऱ्या रेल्वेचे पुजन वा मोटरमन यांचा सन्मान करून, वाशी रेल्वे स्टेशन ते सिडको ऑडिटोरियम दरम्यान दिंडी काढण्यात आली, या दिंडीत महिला पुरुष वा अबालवृद्ध मोठया संख्येने सहभागी झाले होते.
यावेळी व्यासपीठावर स्पर्धेचे संयोजक निशांत भगत, संदिप भगत, ज्ञानेश्वर माऊली भजनी सामाजिक संस्था या तीनही रेल्वे लाईन्स वरील भजनी मंडळाच्या शिखरस संस्थेचे अध्यक्ष ह.भ.प हनुमंत महाराज तावरे, अनिल महाराज मोरे, ह.भ.प राम महाराज रांजणे, विनय महाराज धाडवे, शंकर महाराज कदम, राजेश महाराज पालकर, शिवाजी महाराज पाटील हे उपस्थित होते. या स्पर्धेचे परीक्षक म्हणून नवी मुंबईकर असलेल्या संगीत विशारद व गायनचार्या ह.भ.प पूर्वाताई पाटील आणि संगीत विशारद ह.भ.प किरण महाराज पाटील यांनी सेवा दिली.
