मैथिली पाटील हिच्या कुटुंबियांना प्रितम म्हात्रे यांचा आधार
पनवेल : अहमदाबाद येथे झालेल्या एअर इंडियाच्या विमान अपघातात न्हावा गावातील मैथिली मोरेश्वर पाटील या हवाई सुंदरीचे निधन झाले आहे. मैथिलीच्या कुटुंबाची आर्थिक परिस्थिती बघता मैथिलीच्या कुटुंबियांना भाजप नेते तथा पनवेल महापालिकेचे माजी विरोधी पक्षनेते प्रितम म्हात्रे यांनी आधार देत ‘जे. एम. म्हात्रे चॅरिटेबल संस्था'च्या वतीने तिच्या भावंडांचा शैक्षणिक भार उचलून त्यांना सहकार्य केले.
अहमदाबाद येथे झालेल्या एअर इंडियाच्या विमान अपघातात न्हावा येथील हवाई सुंदरी मैथिली पाटील हिचे निधन झाले. अत्यंत हलाखीच्या परिस्थितीत तिच्या कुटुंबीयांनी तिचे शिक्षण पूर्ण केले होते. मात्र, विमान अपघातात तिचा दुर्दैवी मृत्यू झाला. मैथिलीच्या निधनानंतर तिच्या कुटुंबियांवर दुःखाचा डोंगर कोसळला आहे. त्यामुळे ‘जे. एम. म्हात्रे चॅरिटेबल संस्था'च्या माध्यमातून तिच्या भावंडांची पूर्ण वर्षाची शैक्षणिक फी भरण्यात आली.
दरम्यान, पाटील कुटुंबियांवर ओढवलेल्या प्रसंगात आम्ही सर्व त्यांच्यासोबत आहोत. सध्या त्यांना त्वरित आवश्यक असलेली मदत आम्ही ‘संस्था'च्या माध्यमातून केलेली आहे. विविध संस्थांच्या माध्यमातून त्यांना मिळणाऱ्या मदतीसाठी त्यांना सर्वतोपरी सहकार्य आम्ही यापुढेही करणार आहोत, अशी प्रतिक्रिया ‘जे. एम. म्हात्रे चॅरिटेबल संस्था'चे अध्यक्ष प्रितम म्हात्रे यांनी दिली.
