यंदा बाप्पा शाडुचा उपक्रमास विद्यार्थ्यांचा प्रतिसाद
कल्याण : पर्यावरणाचा समतोल राखण्यासाठी आणि जल प्रदुषणाला आळा घालण्यासाठी नागरिकांनी येत्या गणेशोत्सवासाठी शाडु मातीचीच मूर्ती तयार करावी, खरेदी करावी या करिता ‘यंदा बाप्पा शाडुचा' उपक्रम कल्याण-डोंबिवली महापालिका पर्यावरण-प्रदुषण विभागामार्फत राबविला जात आहे. विद्यार्थी हेच भविष्यातील देशाचे सुजाण नागरिक असल्याने या विद्यार्थ्यांमार्फत शाडू मुर्तीची संकल्पना घरोघरी पोहोचावी यासाठी महापालिकेच्या आचार्य अत्रे रंगमंदिरात शालेय विद्यार्थ्यांसाठी पर्यावरण-प्रदुषण नियंत्रण विभागाच्या कार्यकारी अभियंता रोहिणी लोकरे आणि उपअभियंता मुराई यांच्यामार्फत शाडू मूर्ती कार्यशाळेचे आयोजन करण्यात आले होते. या कार्यशाळेत महापालिका परिक्षेत्रातील विद्यार्थ्यांनी मोठ्या संख्येने उपस्थित राहून उत्स्फुर्त प्रतिसाद दिला.
महापालिका परिसरातील संतोष जांभुळकर, गुणेश अडवाळ, शेखर ईश्वाद आणि सचिन गोडांबे या अनुभवी मूर्ती शिल्पकारांनी कार्यशाळेत ‘आपणच आपला बाप्पा बनवा' या कार्यशाळेच्या ब्रीदवाक्यासोबत उपस्थित सुमारे ४०० विद्यार्थ्यांना श्री गणेश मूर्ती साकारण्याबाबत मार्गदर्शन केले. महापालिका आयुक्त अभिनव गोयल यांनी देखील ‘शाडु मातीचीच मूर्ती का बनवावी' याबाबत विद्यार्थ्यांशी सुलभ संवाद साधत त्यांचे प्रबोधन केले.
या कार्यशाळेत उत्कृष्टरित्या बाप्पाची मूर्ती साकारणाऱ्या भाग्येश दहिवलकर (मोहिंदरसिंग काबुलसिंग शाळा), पूर्वा साबळे (गणेश बापुराव आघारकर शाळा), पुर्वेश काकडे, दिव्यराज कावरे (सुभेदार वाडा विद्यालय) यांना अनुक्रमे प्रथम, द्वितीय, तृतीय तसेच उत्तेजनार्थ पारितोषिक देऊन मान्यवरांच्या हस्ते गौरविण्यात आले. यावेळी महापालिका आयुक्त अभिनव गोयल, मुख्य लेखा परीक्षक सुरेश बनसोडे, पर्यावरण-प्रदुषण नियंत्रण विभागाच्या कार्यकारी अभियंता रोहिणी लोकरे, शिक्षणाधिकारी विजय सरकटे तसेच महापालिकेचे इतर अधिकारी-कर्मचारी उपस्थित होते.
डोंबिवलीतही ह.भ.प. संत सावळाराम महाराज म्हात्रे क्रीडा संकुलातील कै. सुरेंद्र वाजपेयी सभागृह येथे पुढील आठवड्यात अशा कार्यशाळेचे आयोजन करण्यात येणार आहे. या कार्यशाळेत डोंबिवलीतील शाळांमधील विद्यार्थ्यांनी उपस्थित राहून भरघोस प्रतिसाद द्यावा, असे आवाहन पर्यावरण-प्रदुषण नियंत्रण विभागामार्फत करण्यात आले आहे.
