मैथिली पाटील कुटुंबीयांचे महेंद्र घरत यांच्याकडून सांत्वन
उरण : गुजरात मधील अहमदाबाद येथे १२ जून रोजी झालेल्या भीषण विमान अपघातात एअर इंडिया विमानातील क्रू मेंबर्स मधील पनवेल तालुक्यातील न्हावा गावातील रहिवासी हवाई सुंदरी मैथिली मोरेश्वर पाटील हिचा मृत्यू झाला. या घटनेची माहिती मिळताच रायगड जिल्हा काँग्रेस अध्यक्ष महेंद्र घरत यांनी १३ जून रोजी मैथिली पाटील हिच्या कुटुंबीयांची न्हावा येथे जाऊन भेट घेतली. मैथिली मोरेश्वर पाटील हिच्या दुःखद निधनाने न्हावा गावावर पसरलेली शोककळा पाहून महेंद्र घरत यांनाही तीव्र दुःख झाले.
‘१२ जून रोजी अहमदाबाद येथे विमान अपघाताची घडलेली घटना अतिशय वेदनादायक आहे. न्हावा गावची कन्या मैथिली पाटील हिचे दुर्दैवी अपघातात निधन झाल्याचे समजताच गावात स्मशानशांतता पसरली आहे. आपण देखील मैथिली पाटील हिच्या अपघाती निधनाची घटना समजताच अस्वस्थ आणि दुःखी आहे. काँग्रेस पक्षाचा एक पूर्वानियोजित ठरलेला कार्यक्रम या दुर्दैवी घटनेची माहिती मिळताच रद्द केला आहे. केंद्र सरकारने या घटनेची गंभीर दखल घ्यावी. मैथिली पाटील हिच्या कुटुंबीयांच्या पाठीशी आपण कायम उभा राहणार आहे' असे पाटील कुटुंबीयांचे सांत्वन करताना महेंद्र घरत म्हणाले.
यावेळी न्हावा गावातील माता-भगिनींसह ‘न्हावा ग्रामपंचायत'चे माजी सरपंच जितेंद्र म्हात्रे उपस्थित होते. त्यांच्या चुलत भाचीची मैथिली पाटील मुलगी आहे.
