महापालिकेच्या रुग्णांना नकार. रेफर रुग्णाला दारात अडवलं... फोर्टिसच्या बेपर्वाईला मनसेची चपराक
ऐरोली मधील २ अनधिकृत बांधकामे निष्कासित
५० हजार रुपये दंड वसूल
नवी मुंबई : नवी मुंबई महापालिका अतिक्रमण विभाग तर्फे नोटीस देण्यात येऊनही संबधितांनी नोटिशीची दखल न घेतल्यामुळे नवी मुंबई महापालिका आयुक्त डॉ. कैलास शिंदे यांच्या निर्देशानुसार महापालिका अतिरिक्त आयुक्त (२) डॉ. राहुल गेठे आणि उप आयुक्त (अतिक्रमण) भागवत डोईफोडे यांच्या मार्गदर्शनाखाली महापालिका अतिक्रमण विभाग मार्फत ऐरोली मधील २ अनधिकृत बांधकामे निष्कासित करण्याची कारवाई करण्यात आली.
नवी मुंबई महापालिका कार्यक्षेत्रातील जी विभाग ऐरोली अंतर्गत ऐरोली सेक्टर-४ मध्ये ई-७६ येथे दिपाली एच. सिंग -हिरेंद्र आर. सिंग यांनी तर ऐरोली सेक्टर-४ मध्ये के-८९ येथे तुकाराम हरी वाशिवले यांनी महापालिकेची कोणतीही परवानगी न घेता अनधिकृतपणे बांधकाम केले होते. सदर अनधिकृत बांधकामास ऐरोली विभाग कार्यालय मार्फत महाराष्ट्र प्रादेशिक नियोजन आणि नगररचना अधिनियम १९६६ मधील कलम ५४ अन्वये नोटीस बजाविण्यात आली होती. नोटीस मिळाल्यानंतर संबंधितांनी केलेले अनधिकृत बांधकाम स्वतःहून हटविणे आवश्यक होते. परंतु, संबंधितांनी सदर अनधिकृत बांधकाम स्वतःहून न हटविल्याने सदर अनधिकृत बांधकाम २५ मार्च रोजी महापालिका अतिक्रमण विभाग मार्फत अतिक्रमण हटाव मोहिम राबवून अंशतः निष्कासित करण्यात आले. सदर कारवाई अंतर्गत दंडात्मक शुल्क प्रत्येकी २५ हजार रुपये प्रमाणे एकूण ५० हजार रुपये दंड वसूल करण्यात आला आहे.
या धडक मोहिमेवेळी महापालिका ऐरोली विभाग सहाय्यक आयुक्त तथा विभाग अधिकारी डॉ. अंकुश जाधव, कनिष्ठ अभियंता संदिप म्हात्रे यांच्यासह ऐरोली जी विभाग कार्यालयातील अधिकारी- कर्मचारी तसेच अतिक्रमण पोलीस पथक उपस्थित होते. सदर अनधिकृत बांधकाम निष्कासित करण्यासाठी १ गॅस कटर, ३ हॅमर आणि १० मजूर यांचा वापर करण्यात आला.
दरम्यान, महापालिका अतिक्रमण विभाग मार्फत यापुढे नियमितपणे नवी मुंबई शहरातील अनधिकृत बांधकामे निष्कासित करण्याची कारवाई अधिक तीव्रगतीने करण्यात येणार आहे, असे महापालिका अतिरिक्त आयुक्त (२) डॉ. राहुल गेठे यांनी सांगितले.
