नवी मुंबईत कोव्हीड रुग्ण नसला तरीही महापालिका दक्ष
नवी मुंबई : राज्यातील काही भागात सध्या कोव्हीड रुग्ण आढळल्याच्या बातम्या येत आहेत. त्या अनुषंगाने काळजी म्हणून ताप, सर्दी, खोकल्याचे रुग्ण आढळून आल्यास खबरदारीचा एक भाग म्हणून नागरिकांनी श्वसनाच्या संसर्गापासून बचाव करण्यासाठी काही बाबींचे पालन करणे गरजेचे आहे. त्यानुसार ‘काय करावे आणि काय करु नये' याबाबत सूचनांचे पालन करावे, असे महापालिकेच्या वतीने नागरिकांना सूचित करण्यात आले आहे.
हे करावेः खोकला किंवा शिंक येत असेल तेव्हा आपले तोंड आणि नाक रुमाल किंवा टिश्यू पेपरने झाकावे.
साबण आणि पाणी किंवा अल्कोहोल आधारित सॅनिटायझरने आपले हात वारंवार धुवावेत.
ताप, खोकला आणि शिंका येत असल्यास सार्वजनिक ठिकाणांपासून दूर रहावे.
भरपूर पाणी प्यावे आणि पौष्टिक अन्न खावे.
संक्रमण कमी करण्यासाठी सर्व ठिकाणी पुरेसे वायुविजन (व्हेंटीलेशन) होईल, याची दक्षता घ्यावी.
कोव्हीड सदृश्य लक्षणे असल्यास हे करु नयेः
हस्तांदोलन टाळावे, टिश्यू पेपर आणि रुमालाचा पुनर्वापर करु नये.
आजारी लोकांशी जवळचा संपर्क टाळावा.
डोळे, नाक आणि तोंडाला वारंवार स्पर्श करु नये.
सार्वजनिक ठिकाणी थुंकू नये.
डॉक्टरांच्या सल्ल्याशिवाय औषध (सेल्फ मेडिकेशन) घेऊ नये.
नवी मुंबई महापालिकेची नागरी प्राथमिक आरोग्य केंद्रे, रुग्णालये येथे सर्दी, खोकला अर्थात आयएलआय आणि सारी रुग्णांवर उपचार करण्यात येतो. सध्याचा कोव्हीडचा संभाव्य धोका लक्षात घेऊन आरोग्य विभागांतर्गत सर्व रुग्णालये आणि नागरी आरोग्य केंद्रे यांना व्हीसीद्वारे सूचना देण्यात आलेल्या आहेत. त्यादृष्टीने खबरदारी घेत महापालिका आयुक्त डॉ. कैलास शिंदे यांच्या आदेशानुसार ‘नमुंमपा'च्या वाशी, नेरुळ, ऐरोली येथील सार्वजनिक रुग्णालयांमध्ये प्रत्येकी ५ बेडस्‌ राखीव ठेवण्यात आलेले आहेत. तसेच माँसाहेब मीनाताई ठाकरे सार्वजनिक रुग्णालय, नेरुळ येथे चाचणी लॅब देखील उपलब्ध आहे.
खाजगी वैद्यकीय व्यावसायिकांनाही याबाबत सतर्क राहण्याच्या आणि कोव्हीड सदृश्य लक्षणे आढळल्यास महापालिकेला सूचित करण्याच्या सूचना देण्यात आलेल्या आहेत. यासोबतच केंद्र आणि राज्य शासनामार्फत याबाबत वेळोवेळी प्राप्त होण्याऱ्या सूचनांची अंमलबजावणी प्रभावीपणे करण्यात येईल.
नवी मुंबईकर नागरिकांनी कोव्हीडबाबत घाबरुन न जाता आवश्यक काळजी घेणे गरजेचे आहे. नवी मुंबई महापालिकेच्या वतीने आवश्यक दक्षता घेण्यात आली असून नागरिकांनी अफवांवर विश्वास न ठेवता नाहक भितीचे वातावरण पसरवू नये. मात्र, सर्दी, खोकला, पल्यू सदृश्य लक्षणे आढळल्यास वैयक्तिक स्वच्छतेवर भर द्यावा. तसेच वैद्यकिय सल्ला घ्यावा आणि आपल्या नजिकच्या नमुंमपा नागरी प्राथमिक आरोग्य केंद्रात अथवा रुग्णालयात जाऊन उपचार घ्यावेत, असे आवाहन करण्यात येत आहे.
-डॉ. कैलास शिंदे, आयुवत-नवी मुंबई महापालिका.
