घोडबंदर रोडवर प्रायोगिक तत्त्वावर रम्बलर
ठाणे : घोडबंदर रोडवरील ५ वाहतूक सिग्नल जवळ प्रायोगिक तत्त्वावर रम्बलर (वेग नियंत्रक पट्ट्या) लावण्याचे निर्देश महापालिका आयुक्त सौरभ राव यांनी दिले आहेत. दरम्यान, सदरचा प्रयोग यशस्वी झाल्यास घोडबंदर रोडवरील सर्वच सिग्नल जवळ रम्बलरची अंमलबजावणी करण्यात येणार आहे.
अपघात टाळण्यासाठी सिग्नल जवळ वाहनांचा वेग कमी करुन अवजड वाहने नियंत्रित करण्याची आवश्यकता असल्याचे मत ‘जस्टिस फॉर घोडबंदर रोड'च्या प्रतिनिधींनी बैठकीत मांडले. या सूचनेचा अवलंब करण्यासाठी महापालिका सार्वजनिक बांधकाम विभाग आणि वाहतूक पोलीस यांनी संयुक्तपणे ५ ठिकाणांची निवड करावी. तेथे प्रायोगिक तत्त्वावर रम्बलर व्यवस्था करावी, असे निर्देश आयुक्त राव यांनी दिले. सदर प्रयोग करताना वाहन चालकांना दिसेल अशा पध्दतीने त्याचा इशारा देणारी पाटी, रिपलेक्टर्स, आदि गोष्टी शास्त्रशुध्द पध्दतीने कराव्यात. ‘इंडियन रोड काँग्रेसे'ने निर्धारित केलेल्या सर्व मार्गदर्शक नियमांचे पालन करावे, असेही आयुक्त राव यांनी स्पष्ट केले.
घोडबंदर रस्ता आणि परिसरातील नागरी कामांविषयी चर्चा करण्यासाठी ‘जस्टिस फॉर घोडबंदर रोड'च्या प्रतिनिधींसोबत बैठकीचे आयोजन आयुक्त कार्यालय येथे २४ जून रोजी करण्यात आले होते. आयुक्त सौरभ राव यांच्या अध्यक्षतेखाली झालेल्या बैठकीस अतिरिक्त आयुक्त प्रशांत रोडे, नगर अभियंता प्रशांत सोनाग्रा, नगर रचना सहाय्यक संचालक संग्राम कानडे, सार्वजनिक बांधकाम विभागाचे अधीक्षक अभियंता सिध्दार्थ तांबे, पोलीस उपायुक्त (वाहतूक) पंकज शिरसाट, उपनगर अभियंता विकास ढोले, सुधीर गायकवाड, शुभांगी केसवानी, घोडबंदर रोडचे समन्वय अधिकारी आणि कार्यकारी अभियंता संजय कदम यांच्यासह एमएमआरडीए, मेट्रो यांचे अधिकारी उपस्थित होते.
बैठकीत वाघबीळ येथील अंतर्गत रस्ता, भाईंदरपाडा आणि साईनगर येथील सेवा रस्त्याची दुरावस्था, रोझा गार्डिनिया येथील प्रस्तावित वाहतूक बेट आदि विषय प्रतिनिधींनी मांडले. त्यावर कालबध्द कार्यक्रम घेऊन पूर्तता करण्याचे निर्देश आयुक्त राव यांनी संबंधित विभागांना दिले. तसेच रस्त्यावरील राडारोडा, वायरी, अनावश्यक बॅरिकेडस्, आदि काढून टाकण्यासाठी महापालिका, सार्वजनिक बांधकाम विभाग, मेट्रो आणि एमएमआरडीए यांनी संयुक्तपणे सर्वंकष स्वच्छता मोहीम (डीप क्लिन ड्राईव्ह) घ्यावी, असेही आयुक्त राव यांनी सांगितले.
घनकचरा समस्या, लोकसहभागाची आवश्यकता...
गायमुख आणि परिसरातील कचऱ्याच्या समस्येवर तोडगा काढण्यासाठी बहुपर्यायी उपाययोजना करण्याची आवश्यकता प्रतिनिधींनी व्यक्त केली. तसेच काही मोठ्या गृहसंकुलांनी छोटेखानी कचरा प्रक्रिया प्रकल्प सुरू करण्याची तयारी दर्शवल्याचेही या प्रतिनिधींनी सांगितले. घनकचऱ्याच्या व्यवस्थापनासाठी व्यापक लोकसहभागाची आवश्यकता असून त्यासाठी महापालिका प्रयत्न करीत आहे, असे आयुक्त राव यांनी यावेळी स्पष्ट केले. तसेच ज्या गृहसंकुलांनी घनकचरा व्यवस्थापनात रस दाखवला आहे, त्यांच्या पदाधिकाऱ्यांसोबत अतिरिक्त आयुक्त प्रशांत रोडे यांच्याकडे बैठक आयोजित करण्याच्या सूचनाही त्यांनी दिल्या.
रिक्षा स्टॅण्डसाठी संयुक्त सर्वेक्षण...
ठाणे महापालिका क्षेत्रातील सर्व रिक्षा थांब्यांचे वाहतूक पोलीस, परिवहन विभाग आणि महापालिका यांच्यामार्फत संयुक्त पाहणी करण्याचे सदर बैठकीत ठरले. रिक्षा थांब्यांच्या जागा निश्चित करून त्यांचे नियमन करण्यात येईल, असे पोलीस उपायुक्त (वाहतूक) पंकज शिरसाट यांनी सांगितले.
