एक मार्चच्या आंतरराष्ट्रीय कचरावेचक दिनी महिलांची रॅली
नवी मुंबई : एक मार्च हा आंतरराष्ट्रीय कचरावेचक दिवस म्हणून जगभर साजरा केला जातो. स्त्री मुक्ती संघटनेच्या माध्यमातून या दिवशी कचरावेचक महिलांच्या समस्या कंपनी परिसरातील लोकांना कळाव्यात या उद्देशाने रबाळे या एमआयडीसी विभागात रॅली काढण्यात आली होती. कचरा आमच्या हक्काचा नाही कोणाच्या बापाचा, आमच्या पोरांना शिक्षण द्या, म्हातारपणाची पेन्शन द्या. अशा विविध घोषणा देत महिलांनी एमआयडीसी परिसर दणाणून सोडला होता. याप्रसंगी माजी महापौर सुधाकर सोनवणे उपस्थित होते.
महिलांना एमआयडीसी विभागात फिरून कचरा वेचताना विकाऊ कचरा मिळत नाही, महिला दहा तास उन्हातान्हात फिरतात, त्यामुळे कंपन्यांच्या दाराशी कंपनीवाल्यांनी आमच्या संस्थेची करार करून या महिलांना एकहाती कचरा द्यावा, कंपनीने दिलेल्या ठराविक वारी व ठराविक वेळी ठरवून दिलेली व महापालिकेचे ओळखपत्र असलेली महिला येईल, कंपनीतला कचरा उचलून तिथला परिसर स्वच्छ ठेवेल अशी आमची मागणी आहे पण अनेक वर्ष कंपन्यांना भेटून प्रत्यक्ष बोलणे करूनही यात यश येत नाही अशी खंत स्त्री मुक्ती संघटनेच्या विश्वस्त वृषाली मगदूम यांनी व्यक्त केली. कंपनीतील वेगळा केलेला सुका कचरा प्रत्यक्ष दाराशी मिळाल्यास महिलांची वणवण थांबेल, यातील अनेक महिला वयस्कर आहेत, माजी महापौर सुधाकर सोनवणे यांनी या कामात मदत करावी अशी अपेक्षा मगदूम यांनी व्यक्त केली. माजी महापौर सुधाकर सोनवणे यांनी रॅलीत सहभाग घेतला. रबाळे विभागातील या कचरा वेचक माझ्या बहिणी असून त्यांच्या समस्या निवारण करणे हे मी माझे कर्तव्य समजतो, त्यांचे जीवन अतिशय हलाखीचे असून दिवसभर फिरून कचरा वेचून त्या गुजराण करतात, या महिलांची मुले शिकावीत, महिलांचे आरोग्य चांगले राहावे यासाठी मी पूर्वीपासून सर्वतोपरी मदत करत आलो आहे. कंपनीमधील कचरा महिलांना मिळावा यासाठी संस्थेकडून पत्र मिळावे व त्या पत्राचा मी सरकारी अधिकारी, मंत्री यांच्यापर्यंत पाठपुरावा करेन, कचरावेचक महिलांना त्यांचे उपजीविकेचे साधन मिळवून देण्यासाठी मदत करीन, तसेच या महिलांना कचरा वेगळा करण्यासाठी पन्नास महिला काम करू शकतील अशी शेडही उपलब्ध करून देईन असे याप्रसंगी सुधाकर सोनवणे यांनी सांगितले. यावेळी रुक्मिणी पॉल, वेणू वाघ, शकुंतला सकट यांनी कचरा वेचकांच्या समस्या मांडताना सिक्युरिटी ,कंपनी स्वच्छ करणारे, घंटागाडीवाले हे सर्वच लोक शेलका कचरा घेतात व महिलांना अतिशय टाकाऊ कचरा मिळतो, कंपनीतील लोक कंपनीच्या बाहेरही उभे करून घेत नाहीत असे या सांगितले, सीमा किसवे यांनी उपस्थितांचे आभार मानले.
