नवी मुंबई महापालिका तर्फे ३६६.८० कोटी विक्रमी करसंकलन
नवी मुंबई : नवी मुंबई महापालिका मालमत्ताकर विभागाने सन २०२५-२६ या चालू आर्थिक वर्षात पहिल्या तिमाहीमध्ये ३६६.८० कोटींचे करसंकलन करुन करसंकलनामध्ये महापालिकेच्या इतिहासामध्ये विक्रमी नोंद केली आहे. नवी मुंबई महापालिकेने नागरिकाभिमुख उपक्रम राबविल्यामुळे आणि करसंकलनासाठी विविध पुढाकार घेतल्याने संकलनामध्ये विक्रमी वाढ झाली आहे. यामध्ये बचतगटांच्या महिला, मालमत्ताकर विभागाचे सर्व स्तरावरील अधिकारा-कर्मचारी आणि सर्वात महत्वाचे शहरातील जागरुक करदाते यांच्यामुळे करसंकलनाचा सदर विक्रम साध्य झाला असून ते सर्वांचे यश असल्याचे स्पष्ट करीत महापालिका आयुक्त डॉ. कैलास शिंदे यांनी करदात्या नागरिकांचे आभार मानले आहेत.
असे झाले कर संकलनः
३,४७,७८८ करदात्यांपैकी १,००,५८७ एवढ्या करदात्यांकडून ३६६.६० कोटी करभरणा
ऑनलाईन पध्दतीने ६३,४८८ करदात्यांनी भरला २२० कोटींचा कर (६६ टक्के)
तिमाहीच्या शेवटच्या दिवशी तब्बल ९०.८४ कोटी कर संकलन
करसंकलनामध्ये घरपोच बिलांचा महत्त्वाचा वाटा;
नेरुळ वॉर्डमधून सर्वाधिक ७४.१३ कोटी रुपये कर रक्कम
तब्बल ९९,७०३ करदात्यांनी घेतला सामान्य करावरील १० टक्के सवलतीचा लाभ
मालमत्ता प्रकार ...
शहरातील एकूण मालमत्ताधारकांपैकी मालमत्तेच्या प्रकारातून खालीलप्रमाणे एकूण मालमत्ताकराचे संकलन झाले आहे.
निवासी मालमत्ता - ३३ टक्के
औद्योगिक मालमत्ता - ३३ टक्के
व्यावयासिक मालमत्ता - २३ टक्के
मिश्र आणि इतर मालमत्ता - ११ टक्के
उद्दिष्टपूर्तीसाठी अभिनव उपक्रम...
सन २०२५-२६ या आर्थिक वर्षासाठी ‘नमुंमपा'ने मालमत्ता करवसुलीचे १२०० कोटी रुपयांचे महत्त्वाकांक्षी उद्दिष्ट ठेवले आहे. सदरचे लक्ष्य गाठण्यासाठी महापालिकेने नियोजनबध्द पावले उचलली आहेत. चालू वर्षात बचतगटांच्या महिलांद्वारे बिलांचे घरपोच वाटप, मोबाईल ॲप्लिकेशनच्या सहाय्याने मालमत्ताधारकांच्या माहितीचे संकलन आणि अद्ययावतीकरण, मालमत्ताकर भरण्यासाठी डिजीटल पध्दतीचा स्वीकार, मालमत्ताकर बिल व्हॉटस्ॲपवर मिळविण्यासाठी व्हॉटस्ॲप चॅटबॉट आणि मालमत्ताकर बिलातील सामान्य करावरील १० टक्के सवलत योजनेचा लाभ, असे अभिनव उपक्रम राबवण्यात आले आहेत.
त्यासोबतच करसंकलनामध्ये वृध्दी होण्यासाठी चालू वर्षी डेटा विश्लेषण, मालमत्ताधारकांच्या माहितीचे अद्ययावतीकरण आणि माहितीच्या आधारे प्रभावी जनजागृतीकरिता फॉक्सबेरी टेक्नोलॉजी प्रा. लि. यांची नेमणूक करण्यात आली. त्यांच्याद्वारे करण्यात आलेले विश्लेषण, करसंकलन अभियानाचे नियोजन, माहिती संकलनासाठी मोबाईल ॲप्लिकेशनची निर्मिती या बाबींनी करसंकलनामध्ये मोलाची भूमिका बजावली आहे.
आगामी काळामध्ये थकबाकीदारांना मालमत्ताकर भरण्याच्या प्रवाहामध्ये आणण्यासाठी महापालिकेने आता १ जुलैपासून विलंब दंड (शास्ती) लागू करण्यास सुरूवात केली आहे. त्यानुसार, ज्यांनी पहिल्या तिमाहीमध्ये आपल्या कराचा भरणा केला नाही अशा थकबाकीदारांवर १ जुलैपासून प्रतिमहिना वाढणारा २ टक्के विलंब दंड आकारण्यास सुरुवात होणार आहे.
करदात्यांनी पार पाडलेली जबाबदारी उल्लेखनीय...
शहराच्या विकासामध्ये प्रत्येक करदात्याचे योगदान अत्यंत महत्त्वाचे आहे. त्यांनी भरलेल्या करातूनच शहराचा विकास होतो. शहराच्या विकासासाठी प्रत्येक नागरिकाचा वेळेवर भरलेला कर विश्वासाचा भाग आहे. पहिल्या तिमाहीत झालेल्या विक्रमी करसंकलनातून नवी मुंबईकरांनी दाखवलेली जबाबदारी निश्चितच उल्लेखनीय आहे. मात्र, आता नियमानुसार १ जुलैपासून विलंब दंड लागू होत आहे. त्यामुळे अनावश्यक दंड टाळण्यासाठी नागरिकांनी तात्काळ कर भरुन विकासाच्या वाटचालीत भागीदार व्हावे, असे आवाहन नवी मुंबईकर मालमत्ताधारकांना करण्यात येत आहे.
- डॉ. कैलास शिंदे, आयुक्त-नवी मुंबई महापालिका.
