शहराच्या शाश्वत विकासासाठी ‘केडीएमसी'चे ७ कलमी मुद्दे -आयुक्त गोयल
ऐरोली नाट्यगृहाच्या कामाची प्रशांत दामले यांच्याकडून पाहणी
नवी मुंबई : नवी मुंबई महापालिकेच्या वतीने ऐरोली, सेक्टर-५ येथे नवीन नाट्यगृहाचे बांधकाम सुरु असून ‘अखिल भारतीय मराठी नाट्य परिषद'चे अध्यक्ष तथा सुप्रसिध्द अभिनेते प्रशांत दामले यांनी या नाट्यगृहाच्या कामाची पाहणी करत समाधान व्यक्त केले.
महापालिकेच्या विष्णुदास भावे नाट्यगृहातील व्यवस्था आणि यंत्रणेचे प्रशांत दामले नेहमीच विविध ठिकाणी भरभरून कौतुक करीत असतात. तशाच प्रकारे ऐरोली नाट्यगृह देखील आवश्यक सुविधांनी सुसज्ज असावे अशी अपेक्षा त्यांनी व्यक्त केली. तसेच तेथे आवश्यक सुविधांविषयी काही सूचना केल्या.
नाट्यगृहामध्ये ध्वनी संयोजन आणि ध्वनी संतुलनासाठी ऍकॉस्टिक व्यवस्था, प्रकाश योजना, कलावंत रंगभूषा कक्ष, बैठक व्यवस्था, प्रसाधनगृह व्यवस्था या महत्त्वाच्या सुविधा असून त्यांची गुणवत्ता चांगली राखावी अशी सूचना त्यांनी केली. प्रेक्षागृहातील आसन व्यवस्थेबाबतही त्यांनी काही महत्वाच्या बाबींविषयी सूचना केल्या.
‘नमुंमपा'चे वाशी येथील विष्णुदास भावे नाटयगृह उत्तम सुविधांनी परिपूर्ण असे राज्यातील एक महत्त्वाचे नाट्यगृह मानले जाते. याठिकाणी कला आणि संस्कृतीप्रेमी रसिकांचा लक्षणीय प्रतिसाद लाभत असतो. नवी मुंबई शहराच्या सांस्कृतिक वैभवात भर घालण्याच्या दृष्टीने महापालिकेच्या वतीने ऐरोली येथे ८६० आसन क्षमतेचे नवीन नाट्यगृह उभारण्याचे काम सुरु आहे. या बांधकामाची नुकतीच पाहणी करुन नमुंमपा आयुक्त डॉ. कैलास शिंदे यांनी कामाची गुणवत्ता राखत गती द्यावी आणि नवीन वर्षाच्या प्रारंभापर्यंत काम पूर्ण करण्याचे कालबध्द नियोजन करावे, असे निर्देश दिले होते.
रंगभूमीवर अनेक विक्रमी नाटके सादर करुन मराठी रसिकांच्या मनावर अधिराज्य गाजवणारे लोकप्रिय ज्येष्ठ अभिनेते प्रशांत दामले यांनी ऐरोली नाट्यगृहाच्या सुरु असलेल्या कामाची पाहणी करुन समाधान व्यक्त करीत चांगले काम सुरु आहे, असा अभिप्राय दिला. आगामी काळात ऐरोली येथील नाट्यगृह म्हणजे नवी मुंबईसह शेजारच्या शहरांतील नाट्यरसिकांसाठीही पर्वणी ठरणार आहे.
