कल्याण, भांडुप परिमंडलात २५८ कोटींची वीजबिल थकबाकी
कल्याण : आर्थिक वर्ष संपण्यास अवघ्ो कार्यालयीन कामकाजाचे काही दिवस उरले असतानाही कल्याण आणि भांडुप परिमंडलातील वीज ग्राहकांकडे (कृषिपंप, कायमस्वरुपी वीज खंडित ग्राहक वगळून) तब्बल २५८ कोटी रुपयांच्या थकीत वीजबिल वसुलीचे आव्हान कर्मचाऱ्यांसमोर आहे. त्यामुळे थकीत करवसुली अथवा थकबाकीदारांचा वीजपुरवठा खंडीत करणे असे दोनच पर्याय ‘महावितरण'समोर आहेत. त्यामुळे संभाव्य गैरसोय टाळण्यासाठी थकबाकीदारांनी थकीत रकमेचा तर इतर ग्राहकांनी चालू वीजबिलाचा त्वरित भरणा करावा, असे आवाहन ‘महावितरण'ने केले आहे.
थकबाकी वसुलीसाठी मुख्य अभियंत्यांसह जनमित्रांपर्यंत सर्वच स्तरावरील अधिकारी, अभियंते आणि कर्मचारी वाढत्या तापमानातही वसुलीच्या कामासाठी फिल्डवर आहेत. कल्याण परिमंडलात ७८ कोटी ४८ लाख रुपयांची वीजबिल थकबाकी वसूल होणे बाकी आहे. यात कल्याण पूर्व आणि पाश्चिम तसेच डोंबिवली विभागाचा समावेश असलेल्या कल्याण मंडल कार्यालय-१ अंतर्गत १२ कोटी चार लाख रुपयांच्या थकबाकीचा समावेश आहे. उल्हासनगर-१ आणि २, कल्याण ग्रामीण आणि बदलापूर विभागाचा समावेश असलेल्या कल्याण मंडल- अंतर्गत २५ कोटी २७ लाख रुपयांचे वीजबिल थकीत आहे. वसई आणि विरार विभागाचा समावेश असलेल्या वसई मंडलातील ग्राहकांकडे २९ कोटी १६ लाख तर पालघर मंडलातील ग्राहकांकडे १२ कोटी १ लाख रुपयांची वीजबिल थकबाकी आहे. कल्याण परिमंडलात थकीत वीजबिलापोटी गेल्या दीड महिन्यात २५,७२२ ग्राहकांचा वीजपुरवठा तात्पुरत्या स्वरुपात खंडीत करण्यात आला आहे.
भांडुप परिमंडलात १७९ कोटी ४३ लाख रुपयांचे वीजबिल थकीत आहे. यात भांडुप, मुलूंड, ठाणे-१ आणि २ तसेच वागळे इस्टेट विभागांचा समावेश असलेल्या ठाणे मंडल कार्यालय अंतर्गत १९ कोटी ७५ लाख रुपयांच्या थकबाकीचा समावेश आहे. पनवेल शहर, नेरुळ आणि वाशी विभागांचा समावेश असलेल्या वाशी मंडलात ३५ कोटी १ लाख रुपयांचे वीजबिल थकीत आहे. तर अलिबाग, गोरेगाव, पनवेल ग्रामीण आणि रोहा विभागांचा समावेश असलेल्या पेण मंडलात वीजबिलाची १२४ कोटी ६७ लाख रुपयांची थकबाकी आहे. गेल्या २ महिन्यांमध्ये थकीत वीजबिलापोटी २४,२७२ ग्राहकांचा वीजपुरवठा खंडीत करण्यात आला आहे.
दरम्यान, मार्च अखेरपर्यंत रविवार आणि इतर सुट्टीच्या दिवशीही वीजबिल भरणा केंद्र सुरु ठेवण्यात येणार आहेत. याशिवाय ‘महावितरण'चे संकेतस्थळ, ग्राहकांसाठीचे मोबाईल ॲप, विविध पेमेंट वॅलेट आदिंच्या माध्यमातून डेबीट-क्रेडिट कार्ड, नेट बँकींग मार्फत वीजबिल ऑनलाइन भरण्याची सुविधा उपलब्ध आहे. सर सुविधांचा उपयोग करून संबंधित ग्राहकांनी थकबाकी आणि इतर ग्राहकांनी चालू वीजबिलाचा विहित मुदतीत भरणा करुन सहकार्य करण्याचे आवाहन ‘महावितरण'तर्फे करण्यात आलेे आहे.
