‘नमुंमपा'ला आर्थिक सक्षमतेचे डबल ए प्लस स्टेबल पत मानांकन
नवी मुंबई : इंडिया रेटींग अँड रिसर्च (फिच) या राष्ट्रीय स्तरावरील र्अथविषयक मान्यताप्राप्त संस्थेच्या वतीने प्रतिवर्षी विविध संस्थांचे पत मानांकन जाहीर करण्यात येते. यामध्ये मागील १० वर्षांप्रमाणेच याही वर्षी इंडिया डबल ए प्लस स्टेबल असे सर्वोत्तम पत मानांकन नवी मुंबई महापालिकेला सन २०२४-२५ करिता जाहीर झाले असून अशाप्रकारे आर्थिक सक्षमतेचे डबल ए प्लस मानांकन सातत्याने ११ वर्षे मिळविणारी नवी मुंबई देशातील एकमेव महापालिका आहे. या मानांकनाबद्दल महापालिका आयुक्त डॉ. कैलास शिंदे यांनी समाधान व्यक्त केले आहे.
मागील आर्थिक वर्षात कर वसुलीची चांगली कामगिरी करण्यात आल्याने नवी मुंबई महापालिकेची आर्थिक स्थिती सक्षम राहिलेली आहे. या कालावधीत थकीत मालमत्ताकर धारकांना दिलासा देणारी ‘मालमत्ताकर अभय योजना' प्रभावीपणे राबविण्यात आली. त्यालाही नागरिकांचा चांगला प्रतिसाद लाभला. मालमत्ताकर विभागाने आत्तापर्यंतचे सर्वोच्च २६ कोटीहून अधिक करवसूली केली. इतरही विभागांनी त्यांचे १०० टक्के उद्दिष्ट पूर्ण केले. विविध करांद्वारे प्राप्त होणाऱ्या निधीमधूनच नागरी सेवा-सुविधांची पूर्तता करण्यात येत असल्याने नवी मुंबईकर नागरिकांना अधिक उत्तम दर्जाच्या सुविधा उपलब्ध करून देणे शक्य झाले. ‘स्वच्छ भारत अभियान' अंतर्गत 'स्वच्छ सर्वेक्षण' तसेच माझी वसुंधरा अभियान यामध्येही नवी मुंबई महापालिकेने उत्तम कामगिरीचे सातत्य राखले आहे.
महापालिकेने करवसुलीमध्ये चांगली कामगिरी आणि नागरी सुविधांच्या योग्य बाबींवरच खर्च असे सुयोग्य धोरण अवलंबिल्याने तसेच ई-गव्हर्नन्सची प्रभावी अंमलबजावणी करीत ई-ऑफिस कार्यप्रणाली राबविल्याने कामकाजात गतिमानतेसोबतच पारदर्शकता आलेली आहे. लेखा विभागामार्फत ‘होस्ट टू होस्ट' प्रणालीद्वारे देयके आणि रक्कमा अदायगी होत असून महापालिकेचे कोणतेही पेमेंट पुरवठादाराच्या थेट बँक खात्यात जमा होत आहे. यामधून कामकाजात पारदर्शकता आली आहेच; शिवाय कामकाजही पेपरलेस आणि गतीमान झाले आहे. कंत्राटदारांची अदायगी, अधिकारी-कर्मचारी यांचे पगारही वेळेवर होत आहेत. त्याचप्रमाणे नवी मुंबई महापालिकाकडे कोणाचेही कर्ज, व्याज अथवा कर थकीत नाही.
देशातील निवासयोग्य शहरांमध्ये आघाडीवर असणाऱ्या नवी मुंबई महापालिकेने नागरिकांसाठी पुरविण्यात येणाऱ्या सेवा-सुविधांच्या दर्जाकडे बारकाईने लक्ष देत नेहमीच दूरगामी दृष्टीकोन राखला आहे. महसूल विषयक जमा आणि खर्चाच्या बाबींकडेही काटेकोर लक्ष दिले आहे. जमा-खर्चाचा योग्य ताळमेळ राखण्याकडे महापालिका आयुक्त डॉ. कैलास शिंदे यांचे बारकाईने लक्ष आहे. त्यामुळेच सदरचे सर्वोत्तम आर्थिक पत मानांकन याही वर्षी लाभले आहे. अशाप्रकारे सातत्याने पत मानांकन मिळविणे सर्व नवी मुंबईकर नागरिकांसाठी अभिमानाची गोष्ट आहे. यापुढील काळातही महापालिका तर्फे जमेच्या तुलनेत नागरिकांना उपयोगी अशा नागरी सुविधांवरील योग्य खर्च अशी पध्दत कायम राखली जाणार आहे. त्यामुळे इंडिया रेटींग अँड रिसर्च या नामांकित संस्थेमार्फत इंडिया एए प्लस स्टेबल असे सातत्याने अकराव्या वर्षी लाभलेले पत मानांकन कायम राखण्यासाठी नवी मुंबई महापालिका सज्ज आहे.
-डॉ. कैलास शिंदे, आयुक्त-नवी मुंबई महापालिका.
