एसटी बस स्थानकांमध्ये प्रचंड गैरसोयी डॉ. मनीषा कायंदे, प्रवक्त्या शीतल म्हात्रे यांची ८७ आगारांमध्ये पाहणी
मुंबई : महाराष्ट्र राज्य परिवहन मंडळाच्या बस स्थानकांमध्ये महिला, मुले-मुली, जेष्ठ नागरिक आणि सामान्य प्रवाशांकरिता प्रचंड गैरसोयी आहेत, असे शिवसेना आमदार डॉ. मनिषा कायंदे आणि उपनेत्या, प्रवक्त्या शीतल म्हात्रे यांनी २० जिल्ह्यांमधील ८७ एसटी बस स्थानकांमध्ये केलेल्या सर्वेक्षणात आढळून आले आहे. याबाबतचा पाहणी अहवाल त्यांनी राज्याचे परिवहनमंत्री ना. प्रताप सरनाईक यांच्याकडे सादर केला असून, या अहवालात सर्व बस स्थानकांमधील गैरसोयी तातडीने दूर करण्याची मागणी करण्यात आली आहे.
‘शिवसेना महिला आघाडी'च्या प्रदेश स्तरावरील पदाधिकाऱ्यांनी २५ फेब्रुवारी ते ५ मार्च २०२५ दरम्यान २० जिल्ह्यातील राज्य परिवहन महामंडळाच्या ८७ बसस्थानकांना अचानक भेटी देत पाहणी दौरे केले होते. या दरम्यान बस स्थानकांमधील महिला कर्मचाऱ्यांसाठी आणि प्रवाशांसाठी स्वच्छता गृहे, हिरकणी कक्ष, पिण्याचे स्वच्छ पाणी, २४ तास सुरक्षा व्यवस्था, सीसीटीव्ही कॅमेरे आणि नियंत्रक कार्यालयात स्क्रीन, पुरेशी लाईट व्यवस्था तसेच पोलिसांची नियमित गस्त याविषयी माहिती घेण्यात आली. पाहणी दौऱ्यात जवळपास सर्वच बस स्थानकांमध्ये मोठ्या प्रमाणावर गैरसोयी आढळून आल्या आहेत.
सर्वच बस स्थानकांतील समस्यांसदर्भात संबंधित राज्य परिवहन विभाग अधिकाऱ्यांना पत्र देऊन निवेदने देण्यात आले असून, या निवेदनांच्या अनुषंगाने तत्काळ कार्यवाही करण्याबरोबरच बसस्थानकांवर प्रवाशांना तातडीने सुविधा उपलब्ध करुन देण्याची विनंती परिवहन मंत्री ना. प्रताप सरनाईक यांच्याकडे केली आहे, असे शिवसेना आमदार डॉ. मनीषा कायंदे यांनी सांगितले.
स्थानक परिसरात पोलीस गस्त पोलीस गस्त किंवा कायमस्वरुपी पोलिसांची सुरक्षा नसल्याने अनेक ठिकाणी अवैधरित्या प्रवाशी वाहतूक करणाऱ्या वाहनांची वर्दळ आणि दलालांचा सुळसुळाट आहे. जुगार आणि मटक्याचे अड्डे देखील याच परिसरात राजरोसपणे चालवले जातात. अनेक भागात दारुड्यांचा, गर्दुल्यांचा वावर आहे. परिणामी महिला प्रवाशांमध्ये भीतीचे वातावरण असल्याचे आढळते.
स्थानक परिसरात सीसीटीव्ही यंत्रणा राज्यातील अनेक बस स्थानकांमध्ये पुरेशी सीसीटीव्ही यंत्रणा आणि स्क्रीन नाहीत. परिणामी झालेल्या गैरप्रकारांवर कारवाई करताना अडचणी निर्माण होतात. पुरेसे सीसीटीव्ही कॅमेरे आणि किमान ३ महिन्यांचा रेकॉर्ड डाटा सुरक्षित ठेवण्याची यंत्रणा निर्माण करणे आवश्यक आहे.
एसटी बसस्थानकांचा सर्वेक्षण अहवाल महिला प्रवाशांसाठी स्वच्छ आणि सुरक्षित स्वच्छतागृहे अनेक स्थानकांमध्ये महिला प्रवाशी तसेच स्थानिक कार्यरत महिला कर्मचारी व आधिकाऱ्यांसाठी सुद्धा स्वच्छ व सुरक्षित शौचालये व स्वच्छता गृहे नाहीत, असलेली स्वच्छतागृहे अत्यंत दुरावस्थेत आहेत /वापरण्यायोग्य नाहीत.
स्तनदा मातांसाठी हिरकणी कक्ष अनेक स्थानकांमध्ये बाळंणतीन/लहान बाळासह प्रवास करणाऱ्या महिला प्रवाशांना नीटनेटका, स्वच्छ हिरकणी कक्ष नाही.
दिव्यांग प्रवाश्यांसाठी प्रवेश/प्रतिक्षेबाबत सोयी सुविधाः
अनेक स्थानकांमध्ये प्रवेशद्वारावर रॅम्प आणि रेलिंग नसल्याने विकलांग प्रवाशांना प्रवेश करताना मोठा मनस्ताप होतो.
पिण्याच्या पाण्याची सोय राज्य परिवहन महामंडळाच्या कर्मचारी/अधिकाऱ्यांसह प्रवास करणाऱ्या प्रवाशांना आवश्यक स्वच्छ पिण्याचे पाणी अनेक ठिकाणी उपलब्ध नाही. अनेक ठिकाणी पाण्याचे लावलेले फिल्टर वेळेवर स्वच्छ केले जात नसल्याने पिण्यायोग्य पाणी नसते.
महिला कर्मचारी-अधिकाऱ्यांसाठी स्वच्छ, सुरक्षित विश्रांतीगृह, कार्यालय
अनेक एसटी स्थानकात स्थानिक कार्यरत महिला कर्मचारी-अधिकाऱ्यांसाठी कामासाठी आणि विश्रांतीसाठी पुरेश्या जागा नाहीत.
विशाखा समिती/समितीची माहिती अनेक ठिकाणी समित्या आहेत. पण, समित्यांची माहिती दर्शनी भागात लावून वेळोवेळी दाखल तक्रारींची दखल घेतली जात नाही.
स्थानकांमध्ये रात्री अपुरी लाईट अनेक स्थानकांमध्ये रात्रीच्या वेळी पुरेशी लाईट नसल्यामुळे त्याठिकाणी अनेक अवैध प्रकार घडत असून सर्व बसस्थानकांमध्ये विद्युतीकरणाचा आढावा घेत आवश्यक तिथे विद्युतीकरण करणे गरजेची आहे.
स्थानकात सुरक्षा रक्षकांचा अभाव अनेक एसटी बस स्थानकांमध्ये रात्रीही मोठ्या प्रमाणात बसेस आणि प्रवासी वाहतूक सुरु असताना सुरक्षा रक्षक नसणे किंवा एक किंवा दोन सुरक्षा रक्षक असल्याने सुरक्षेचा मोठा प्रश्न निर्माण होतो.
