बोनकोडे गाव मधील २ बेकायदा बांधकामे निष्कासित
नवी मुंबई : नवी मुंबई महापालिका अतिक्रमण विभाग तर्फे अनधिकृत बांधकाम विरोधात नोटीस देऊनही संबधितांनी नोटिशीची दखल न घेतल्याने नवी मुंबई महापालिका आयुक्त डॉ. कैलास शिंदे यांच्या निर्देशानुसार, महापालिका अतिरिक्त आयुक्त (२) डॉ. राहुल गेठे आणि उपआयुक्त (अतिक्रमण) डॉ. कैलास गायकवाड यांच्या मार्गदर्शनाखाली महापालिका अतिक्रमण विभाग तर्फे बोनकोडे गाव मधील २ अनधिकृत बांधकामे निष्कासित करण्याची कारवाई करण्यात आली.
नवी मुंबई महापालिका कार्यक्षेत्रातील कोपरखैरणे विभाग कार्यालय अंतर्गत बोनकोडे गाव मध्ये निशांत सुरेश नाईक (घर क्रमांक-१३३७, युनिट्‌स नंबर-००२) आणि सुशांत सुभाष नाईक (घर क्रमांक-१३३७, युनिट्‌स नंबर-००४) यांनी नवी मुंबई महापालिकेची कोणतीही परवानगी न घेता अनधिकृतपणे बांधकाम केले होते. सदर अनधिकृत बांधकामास महापालिका कोपरखैरणे विभाग कार्यालय मार्फत महाराष्ट्र प्रादेशिक नियोजन आणि नगररचना अधिनियम १९६६ मधील कलम ५४ अन्वये २७ जानेवारी २०२५ रोजी नोटीस बजाविण्यात आली होती. नोटीस मिळाल्यानंतर संबंधितांनी केलेले अनधिकृत बांधकाम स्वतःहून हटविणे आवश्यक होते. परंतु, संबंधितांनी अनधिकृत बांधकाम स्वतःहून हटविले नसल्याने सदर अनधिकृत बांधकाम अतिक्रमण हटाव मोहिम राबवून महापालिका कोपरखैरणे अतिक्रमण विभाग तर्फे निष्कासित करण्यात आले. या कारवाईवेळी अनधिकृत बांधकाम धारकांकडून प्रत्येकी २० हजार रुपये मिळून एकूण ४० हजार रुपये दंडाचे धनादेश वसूल करण्यात आले.
याप्रसंगी महापालिका कोपरखैरणे विभाग सहाय्यक आयुक्त तथा विभाग अधिकारी भरत धांडे, कनिष्ठ अभियंता चंद्रकांत धोत्रे यांच्यासह कोपरखैरणे विभाग कार्यालयातील अधिकारी-कर्मचारी तसेच अतिक्रमण विभागातील पोलीस उपस्थित होते. सदर बेकायदा बांधकामे १ गॅस कटर, २ इलेवट्रॉनिक हॅमर, १ पिकअप व्हॅन आणि ६ मजूर यांचा वापर करुन निष्कासित करण्यात आली आहेत.
दरम्यान, नवी मुंबई महापालिका अतिक्रमण विभाग तर्फे अनधिकृत बांधकामे निष्कासित करण्याची कारवाई यापुढे देखील करण्यात येणार आहे, असे महापालिका अतिरिक्त आयुक्त (२) डॉ. राहुल गेठे यांनी सांगितले.
