‘ठामपा'तर्फे पुन्हा ‘वर्षा मॅरेथॉन'चे आयोजन
ठाणे : ठाणे महापालिका चषक ३१व्या ‘वर्षा मॅरेथॉन'चे येत्या १० ऑगस्ट रोजी आयोजन करण्यात आल्याची घोषणा ठाणे महापालिका आयुक्त सौरभ राव यांनी केली. ३०वी वर्षा मॅरेथॉन स्पर्धा-२०१९ मध्ये झाली होती. आता ६ वर्षांनंतर पुन्हा देश-विदेशातील मॅरेथॉनपटुंसह ठाणेकर नागरिक या ‘मॅरेथॉन'मध्ये मोठ्या उत्साहाने सहभागी होऊ शकणार असल्याचे आयुक्त राव यांनी सांगितले.
ठाणे महापालिका चषक ३१वी ‘वर्षा मॅरेथॉन' ठाणेसाठी अत्यंत प्रतिष्ठेची मॅरेथॉन आहे. ६ वर्षांच्या खंडानंतर मॅरेथॉन होत असल्याने सर्व विभागांनी उत्तम समन्वय साधून मॅरेथॉन यशस्वी करावी. गेल्या ६ वर्षात शहराच्या रचनेत, पायाभूत सुविधांमध्ये बदल झाला आहे. सदर बाब लक्षात घेऊन सर्व मॅरेथॉन मार्गांचे नियोजन करावे, असे आयुक्त राव यांनी नमूद केले.
अधिकाऱ्यांनी ‘मॅरेथॉन'मध्ये सहभाग घ्यावा...
महापालिकेच्या सर्व अधिकाऱ्यांनी ‘वर्षा मॅरेथॉन'मध्ये सहभाग घ्यावा, असे निर्देश देत त्यासाठी आतापासूनच दररोज तयारीला लागावे, असेही आयुक्त राव म्हणाले.
१ लाखाचे प्रथम पारितोषिक...
या ‘वर्षा मॅरेथॉन'चे आयोजन ठाणे महापालिका आणि ठाणे जिल्हा ॲथलेटिक्स असोसिएशन यांच्या संयुक्त विद्यमाने होत आहे. ‘असोसिएशन'च्या सूचनेनुसार एकूण १० लाख ३८ हजार ९०० रुपयांची पारितोषिके, चषक आणि पदके असतील. प्रत्येक गटातील प्रथम विजेत्यास १ लाख रुपयांचे पारितोषिक आहे. तर प्रत्येक गटातील प्रथम १० विजेत्यांना पारितोषिके आणि चषक देण्यात येणार आहेत, असेही आयुक्त राव यांनी जाहीर केले.
‘ठाणे महापालिका चषक ३१व्या ‘वर्षा मॅरेथॉन'चे स्पर्धेच्या आयोजनाबाबत १० जुलै रोजी आयुक्त सौरभ राव यांच्यासमोर क्रीडा विभागाने सविस्तर सादरीकरण केले. उपायुक्त (क्रीडा) मीनल पालांडे यांनी २०१९ च्या मॅरेथॉन स्पर्धेचा आढावा आणि २०२५ची प्रस्तावित स्पर्धेची रुपरेखा बैठकीत मांडली. याप्रसंगी नगर अभियंता प्रशांत सोनाग्रा, उपायुक्त मनीष जोशी, उमेश बिरारी, दिनेश तायडे, सचिन सांगळे, उपनगर अभियंता विकास ढोले, विनोद पवार आणि शुभांगी केसवानी, मुख्य वैद्यकीय अधिकारी डॉ. प्रसाद पाटील, आरोग्य अधिकारी डॉ. राणी शिंदे यांच्यासह सर्व सहाय्यक आयुक्त, सर्व कार्यकारी अभियंता उपस्थित होते.
‘मॅरेथॉन'मध्ये एकूण १२ गट...
‘वर्षा मॅरेथॉन' स्पर्धेत एकूण १२ गट असतील. राज्यस्तरीय गटामध्ये खुला गट (महिला-पुरुष)-२१ कि.मी., १८ वर्षावरील (महिला-पुरुष)- १० कि.मी., १८ वर्षाखालील (मुले-मुली)- १० कि.मी. असे विभाग आहेत. तर जिल्हास्तरीय गटात १५ वर्षाखालील (मुले-मुली)- ०५ कि.मी., १२ वर्षाखालील (मुले-मुली)- ०३ कि.मी., ज्येष्ठ नागरिक (पुरुष-महिला) - ५०० मीटर या गटांचा समावेश आहे.
याशिवाय या ‘मॅरेथॉन'मध्ये माजी लोकप्रतिनिधी, पदाधिकारी, महापालिकेचे माजी अधिकारी यांच्यासाठी कॉर्पोरेट गट करण्यात आला आहे. त्यांच्यासाठी १ कि.मी. अंतराची स्पर्धा ठेवण्यात आली आहे.
नोंदणी पुढील आठवड्यापासून...
मॅरेथॉन करता नोंदणी पुढील आठवड्यापासून सुरू होणार असून विविध गटांच्या मार्गिका आणि सविस्तर कार्यक्रम टप्प्याटप्य्याने जाहीर करण्यात येईल, असेही उपायुक्त पालांडे यांनी स्पष्ट केले.
