वाईन शॉप विरोधात खारघरवासीय आक्रमक
खारघर : खारघर, सेक्टर-६ मध्ये नव्याने सुरु झालेल्या वाईन शॉप विरोधात संतापलेल्या नागरिकांनी दुकानासमोरील वाईन शॉपच्या फलकाची तोडफोड केली. तर महापालिकेने दुकानासमोरील अनधिकृत शेड जेसीबीच्या सहाय्याने जमीनदोस्त केले. या आंदोलनात सर्वपक्षीय कार्यकर्त्यांसह नागरिक मोठ्या संख्येने सहभागी झाले होते. विशेष म्हणजे या आंदोलनात महिलांची संख्या लक्षणीय होती.
शासनाने खारघर शहर दारुमुक्त घोषित करावे, यासाठी ‘संघर्ष समिती'कडून गेल्या अनेक वर्षांपासून शासनाकडे पत्रव्यवहार करण्यात आला असून आंदोलन देखील केले जात आहे. असे असताना खारघर, सेक्टर-६ मधील शहा आर्केड इमारतीच्या गाळ्यात सोसायटी तसेच पोलीस आणि महापालिकेची कोणतेही परवानगी न घेता गोल्डन कॉईन वाईन मार्ट या नावाने वाईन शॉप सुरु झाल्यामुळे रहिवाशांमध्ये संतापाचे वातावरण पसरले आहे. दरम्यान, आमदार प्रशांत ठाकूर यांनी १९ जून रोजी वाईन शॉप तातडीने बंद करण्यात यावे, अन्यथा २० जून रोजी केल्या जाणाऱ्या आंदोलनाची सर्वस्वी जबाबदारी आपली राहील, असे पत्र खारघर पोलिसांना दिले दिले होते.
त्याअनुषंगाने २० जून रोजी शहा आर्केड सोसायटीत आंदोलकांनी प्रवेश करताच संतापलेल्या नागरिकांनी वाईन शॉप समोरील फलकांची तोडफोड केली. यावेळी महापालिकेने दुकानासमोर असलेले अनधिकृत शेड जेसीबीच्या सहाय्याने जमीनदोस्त केले. उपस्थित महिलांनी खारघर शिक्षणाचे माहेरघर म्हणून ओळखले जात असताना शासनाकडून दारुच्या दुकानाला परवानगी कशी दिली जाते? असा प्रश्न उपस्थित केला.
दरम्यान, उपस्थित समुदायांना संबोधित करताना आ. प्रशांत ठाकूर यांनी स्थानिक प्रशासनाची परवानगी नसताना सुरु झालेले वाईन शॉप बंद करण्यात यावे यासाठी पावसाळी अधिवेशनात आवाज उठविला जाईल. तसेच येणाऱ्या पुढील आठवड्यात ‘संघर्ष समिती'च्या पदाधिकाऱ्या समवेत उपमुख्यमंत्री अजित पवार, राज्य उत्पादन शुल्क विभागाचे आयुक्त यांची भेट घेवून वाईन शॉप बंद करण्यासाठी प्रयत्न केला जाईल, असे सांगितले. तर माजी आमदार बाळाराम पाटील, ‘काँग्रेस'चे सुदाम पाटील यांनी आम्ही जनतेसोबत असून दारु दुकान बंद झाली पाहिजे, अशी आग्रही भूमिका भाषणातून मांडली.
या आंदोलनात आमदार विक्रांत पाटील, ‘कॉलनी फोरम'च्या अध्यक्षा लीना गरड, ‘मनसे'चे जिल्हा चिटणीस केसरीनाथ पाटील, ‘कोकण म्हाडा'चे माजी अध्यक्ष बाळासाहेब पाटील, भाजपा जिल्हा सचिव ब्रिजेश पटेल, खारघर शहर अध्यक्ष प्रवीण पाटील, ‘शेकाप'च्या जिल्हा सहचिटणीस तेजस्वी घरत, ‘शिवसेना'चे गुरुनाथ पाटील, माजी सरपंच संजय घरत, ‘संघर्ष समिती'चे पदाधिकारी कीर्ती मेहरा, डॉ. वैभव बदाणे, त्रिवेणी सालकर, तुकाराम कंठे, ‘खारघरचा राजा ट्रस्ट'चे अध्यक्ष विजय पाटील यांच्यासह सर्व राजकीय पक्षांचे पदाधिकारी-कार्यकर्ते आणि रहिवाशी मोठ्या संख्येने सहभागी झाले होते.
