पनवेलकरांना मालमत्ता करावरील शास्तीमध्ये सवलत
पनवेल : पनवेल महापालिका कार्यक्षेत्रातील मालमत्ता कराबाबत गेल्या काही वर्षापासून शास्ती माफी संदर्भात मोठ्या प्रमाणात मागणी होत होती. त्यानुसार मालमत्ता करांवरील शास्तीमध्ये सवलत ‘अभय योजना' महापालिकेने १८ जुलै पासून २० सप्टेंबर या कालावधीकरिता विविध टप्प्यांमध्ये लागू केली आहे. त्याचा सर्व संबधित नागरिकांनी लाभ घेऊन आपला मालमत्ता कर पूर्ण भरावा, असे आवाहन महापालिका आयुक्त मंगेश चितळे यांनी केले आहे.
महापालिका मुख्यालयात आयोजित पत्रकार परिषद मध्ये आयुक्त चितळे बोलत होते. यावेळी परिवहन व्यवस्थापक कैलास गावडे, कर विभागाचे उपायुक्त स्वरुप खारगे उपस्थित होते.
या संदर्भात संसद सदस्य, विधीमंडळ सदस्य, विविध लोकप्रतिनिधी, माजी नगरसेवक, विविध संस्थांचे प्रतिनिधी, विविध सोसायट्या, प्रसार माध्यम प्रतिनिधी आणि नागरिक यांनी शास्तीमध्ये सूट देण्याबाबत सातत्याने विनंती केली होती. तसेच शास्ती संदर्भात महापालिका अधिनियमातील आयुक्तांस असलेल्या स्वेच्छा निर्णयानुसार शास्तीमध्ये सवलत असलेली अभय योजना लागू करण्यात आली आहे, असे आयुक्त मंगेश चितळे यांनी स्पष्ट केले.
दरम्यान, आत्ता आणि एकदाच असलेल्या अभय योजनांचा लाभ संबधित नागरिकांनी घ्यावा, असे आवाहन महापालिकेच्या वतीने करण्यात आले आहे.
शास्ती सवलत अभय योजना...
थकीत मालमत्ता करांवरील शास्तीमध्ये सवलत देण्याबाबत ‘अभय योजना'मध्ये ४ महत्वाचे टप्पे आहेत. यामध्ये प्रामुख्याने १८ जुलै ते १५ ऑगस्ट २०२५ या कालावधीत संपूर्ण मालमत्ताकर एकरकमी भरल्यास शास्तीमध्ये ९० टक्के सूट मिळणार आहे. तसेच १६ ते ३१ ऑगस्ट या कालाधीत संपूर्ण मालमत्ताकर एकरकमी भरल्यास शास्तीमध्ये ७५ टक्के सूट मिळणार. तसेच या पुढील काळात म्हणजे १ ते १० सप्टेंबर या कालावधीत संपूर्ण मालमत्ताकर एकरकमी भरल्यास शास्तीमध्ये ५० टक्के सूट मिळेल. तर ११ ते २० सप्टेंबर २०२५ या कालाधीत संपूर्ण मालमत्ताकर एकरकमी भरल्यास असलेल्या शास्तीमध्ये २५ टक्के सूट मिळणार आहे. सदर अभय योजना केवळ एकवेळची विशेष आणि अंतिम बाब म्हणून जाहीर करण्यात आली आहे.
ऑनलाईन भरल्यास २ टक्के सलवत...
पनवेल महापालिकेच्या वेबसाईट, PMC Tax App अथवा पनवेल कनेक्ट ॲपद्वारे नागरिकांनी मालमत्ता कर ऑनलाईन भरल्यास त्यांना २ टक्के सवलत मिळेल. तसेच चालू वर्षाचा म्हणजे २०२५-२६ चा कर ३१ जुलै २०२५ पर्यंत भरल्यास संबंधितांना या करामध्ये ५ टक्के सूट मिळेल. त्यामुळे नागरिकांनी लवकरात लवकर कर भरणा करुन याचा लाभ घ्यावा, असे मालमत्ता कर उपायुक्त स्वरुप खारगे यांनी आवाहन केले
अभय योजना २४े७ सुरू असून यासाठी महापालिकेने नवीन मालमत्ता कर संकलन केंद्रे सुरु केली आहेत.
मालमत्ता कर संकलन केंद्र-प्राईड सोसायटी सेक्टर ७, खारघर.
महा-ई-सेवा केंद्र -गंगा टॉवर, सेक्टर-२१, कामोठे.
महा-ई-सेवा केंद्र -ऍलियश बिल्डींग, प्लॉट नं.८४, सेक्टर-१७, मोठा खांदा-नवीन पनवेल.
सर्व ५ प्रभाग कार्यालये (नावडे उपविभागासहित).
महापालिका मुख्यालय, पनवेल.
