एपीएमसी मार्केट आवारात अमली पदार्थाची विक्री करण्यासाठी आलेली दुक्कल गजाआड
नवी मुंबई : एपीएमसी मार्केटमधील पुनित कॉर्नर जवळच्या पार्कींगमध्ये अमली पदार्थाची विक्री करण्यासाठी आलेल्या दोघांना एपीएमसी पोलिसांनी शुक्रवारी दुपारी अटक केली आहे. दिनेश रमेश सालीयन (37) व शिवम दयाशंकर सिंग (26) अशी या दोघांची नावे असून पोलिसांनी त्यांच्याजवळ असलेले सुमारे 4 लाख रुपये किंमतीचे एमडी, चरस आणि हायब्रिड गांजा अमली पदार्थ व त्यांची दुचाकी जप्त केली आहे. या दोघांनी सदरचे अमली पदार्थ कुठून आणले याबाबत पोलिसांकडून अधिक चौकशी करण्यात येत आहे.
एपीएमसी मार्केटमधील पुनित कॉर्नर लगतच्या झोपडपट्टी समोरील पार्कींगमध्ये दोन व्यक्ती अमली पदार्थाची विक्री करण्यासाठी येणार असल्याची माहिती एपीएमसी पोलिसांना मिळाली होती. त्यानुसार वरिष्ठ पोलीस निरीक्षक अजय शिंदे यांच्या मार्गदर्शनाखाली सहाय्यक पोलीस निरीक्षक अमित शेलार व त्यांच्या पथकाने शुक्रवारी दुपारी पुनित कार्नर लगतच्या परिसरामध्ये सापळा लावला होता. यावेळी दिनेश सालीयन व शिवम सिंग हे दोघेही पल्सर मोटारसायकलवरुन त्याठिकाणी आले असता, त्यांच्या संशयास्पद हालचालीवरुन पोलिसांनी दोघांची धरपकड केली.
त्यानंतर पोलिसांनी त्यांची तपासणी केली असता, दिनेश सालीयन याच्याजवळ 3 लाख रुपये किंमतीचे 29 ग्रॅम वजनाचे एमडी (मेफेड्रॉन) हे अमली पदार्थ सापडले. तर शिवम सिंग याच्याजवळ 65 हजार रुपये किंमतीचे 13 ग्रॅम वजनाचे हायब्रिड गांजा, तसेच 28 हजार रुपये किंमतीचे 14 ग्रॅम वजनाचा चरस हे अमली पदार्थ सापडले. पोलिसांनी या दोघांकडे अमली पदार्थाबाबत चौकशी केली असता, त्यांनी उडवा उडवीची उत्तरे दिली. त्यानंतर पोलिसांनी या दोघांकडे सापडलेले अमली पदार्थ व त्यांची पल्सर मोटारसायकल जफ्त करुन दोघांना एनडीपीएस ऍक्टखाली अटक केली आहे. न्यायालयाने या दोघांची 20 मे पर्यंत पोलीस कोठडीत रवानगी केली आहे.
