पेट्रोल पाईपलाईन फुटली; उरण-खारकोपर लोकल सेवा ठप्प
उरण : धुतूम ग्रामपंचायत हद्दीतील इंडियन ऑईल अदानी व्हेंचर्स लि. या कंपनीत जेएनपीए बंदरातून जाणारी पेट्रोल-नापता या अति ज्वलनशील पदार्थ वाहून नेणारी पाईप लाईन ११ नोव्हेंबर रोजी फुटल्याची घटना घडली. नागरिकांनी आणि प्रशासनाने प्रसंगावधान राहून सावधगिरी दाखविल्यामुळे मोठा अनर्थ टळला. मात्र, या घटनेनंतर सुरक्षिततेच्या दृष्टीकोनातून उरण-खारकोपर लोकल सेवा बंद केल्याने त्याचा त्रास प्रवासी नागरिकांना सहन करावा लागला आहे.
उद्योगपती गौतम अदानी यांच्या ताब्यात असलेल्या इंडियन ऑईल अदानी व्हेंचर्स लि. या कंपनीत प्रशासनाच्या दुर्लक्षामुळे वारंवार स्फोटाच्या घटना किंवा जेएनपीए बंदरातून धुतूम ग्रामपंचायत हद्दीतील प्रकल्पात येणाऱ्या पेट्रोल, डिझेल, नापता या ज्वलनशील पदार्थ वाहून आणणाऱ्या पाईप लाईनला चोरीच्या उद्देशाने टॅपींग लावण्याच्या घटना घडत आहेत. अशातच ११ नोव्हेंबर रोजी सकाळी जेएनपीए एक्स्प्रेस हायवेजवळील पागोटे गावाजवळील उड्डाणपुलाजवळ पेट्रोलची पाईपलाईन फुटल्याची बाब काही नागरिकांच्या निदर्शनास आली. त्यामुळे त्यांनी याबाबतची माहिती इंडियन ऑईल अदानी व्हेंचर्स लि. या प्रकल्पातील अधिकाऱ्यांना देताच अधिकाऱ्यांनी सावधगिरी बाळगून फुटलेल्या सदर पाईप लाईनच्या दुरुस्तीचे काम तातडीने सुरु केले. मात्र, याचवेळी सुरक्षिततेच्या दृष्टीकोनातून उरण-खारकोपर लोकल सेवा रेल्वे प्रशासनाने बंद केल्याने त्यांचा त्रास प्रवाशांना सहन करावा लागला. अखेर दुपारी ३.३० नंतर लोकल सेवा सुरु करण्यात आल्याची माहिती सूत्रांकडून देण्यात आली.
या घटनेसंदर्भात इंडियन ऑईल अदानी व्हेंचर्स लि. प्रकल्पातील अधिकाऱ्यांना विचारणा केली असता त्यांनी बोलण्यास नकार दिला. तर उरण मधून नवी मुंबई शहराकडे जाणारी लोकल सेवा बंद का करण्यात आली? यासंदर्भात रेल्वे प्रशासनाकडे विचारणा केली असता त्यांनी प्रवाशांच्या सुरक्षिततेसाठी उरण-खारकोपर लोकल सेवा बंद केल्याचे सांगितले.
