ठाणे रेल्वे स्थानकातील विकासकामांचा खासदारांकडून आढावा
खा. नरेश म्हस्के यांच्या रेल्वे अधिकाऱ्यांना सूचना
ठाणे : ठाणे रेल्वे स्थानकाचा नुतनीकरणाच्या माध्यमातून कायापालट होत आहे. फलाटांवर नव्याने छतांची उभारणी, पंखे, वाढीव आरक्षण खिडक्या, वातानुकुलित प्रतिक्षा कक्ष उभारण्यात येत आहे. त्याअनषंगाने नियमित स्वच्छतेवर भर द्या, युध्दजन्य परिस्थितीमुळे प्रवाशांच्या सुरक्षिततेसाठी दक्ष रहा, पावसाळ्यापूर्वी सर्व विकासकामे तातडीने पूर्ण करा, अशा महत्वपूर्ण सूचना ‘ठाणे'चे खासदार नरेश म्हस्के यांनी ‘रेल्वे'च्या अधिकाऱ्यांना केल्या.
ठाणे रेल्वे स्थानकात सुरु असलेल्या विकासकामांचा आढावा तसेच प्रवाशांच्या समस्या जाणून घेण्यासाठी ९ मे रोजी खा. नरेश म्हस्के यांनी रेल्वे अधिकाऱ्यांसमवेत पाहणी दौरा केला. या दौऱ्यानंतर बैठक घेण्यात आली. गेल्या वर्षभरापासून वेळोवेळी केलेल्या सूचनांची योग्य अमंलबजावणी रेल्वे अधिकाऱ्यांनी केली आहे. आता प्रत्यक्षात सर्व बदल दिसत असून विकासकामांबाबत खासदार म्हस्के यांनी समाधान व्यक्त करत अधिकाऱ्यांचे कौतुक केले.
ठाणे रेल्वे स्थानकातून दररोज ८ लाख प्रवासी प्रवास करीत आहेत. रेल्वे प्रवाशांच्या समस्या, विकासकामे, प्रस्तावित कामांबाबत मी निवडून आल्यापासून डीआरएम, डीएम यांच्याशी सातत्याने माझा पाठपुरावा सुरु आहे. वरिष्ठ अधिकाऱ्यांसमवेत बैठकाही झाल्या आहेत. आता नव्याने वातानुकुलित प्रतिक्षा कक्ष उभारला जात असून येत्या जुलै महिन्यात त्याचे लोकार्पण अपेक्षित आहे. ८ एवसलेटर्स प्रवाशांच्या सेवेत असून २ एवसलेटर्स लवकरच प्रवाशांच्या सेवेत दाखल होणार असल्याची माहिती खा. नरेश म्हस्के यांनी यावेळी माध्यमांना दिली.
ठाणे रेल्वे स्थानकातील फलाटांवरील नव्याने छताचे पत्रे बदलण्याचे काम वेगाने सुरु आहे. रेल्वे पादचारी पुलाचे काम सुरु असून लवकरच ते मार्गी लागणार आहे. सध्या उन्हाळ्याची सुट्टी पडली असून मोठ्या संख्येने प्रवासी बाहेरगावी जाणार असल्याने तातडीने २ वाढीव आरक्षण खिडक्या सुरु करण्यात येणार आहेत. स्वच्छतागृहांची नियमित स्वच्छता करणे, प्रवाशांच्या सुरक्षिततेसाठी रेल्वे पोलीस सज्ज असल्याची माहिती खा. म्हस्के यांनी दिली.
ठाणे आणि मुलंड रेल्वे स्थानका दरम्यान नवीन स्थानकाची उभारणी करण्यात येणार आहे. कायदेशीर अडचण आल्याने त्याचे काम खोळंबले आहे. मात्र, त्यातून तोडगा लवकरच निघणार असून नवीन रेल्वे स्थानकाची उभारणी झाल्यावर ठाणे रेल्वे स्थानकावरचा मोठा ताण कमी होणार आहे. ठाणे रेल्वे स्थानकातील प्रवाशांची गर्दी पाहाता मोजून २ ते ३ तास विकासकामे करायला अधिकाऱ्यांना वेळ मिळतो. अतिशय कमी वेळेत ‘रेल्वे'चे अधिकारी काम करीत असल्याबद्दल यावेळी खासदार नरेश म्हस्के यांनी त्यांचे कौतुक केले.
सदर पाहणी दौऱ्यात ‘मध्य रेल्वे'चे मंडल मुख्य अभियंता विलास पैठणकर, ‘रेल्वे पोलीस दल'चे सहाय्यक आयुक्त अतुल क्षिरसागर, स्टेशन प्रबंधक केशव तावडे, सहाय्यक वाणिज्य प्रबंधक एम. एल. मिना, शिवसेना ठाणे शहरप्रमुख हेमंत पवार, सचिव बाळा गवस, शहर संघटक भास्कर पाटील, रमाकांत पाटील, विभागप्रमुख कमलेश चव्हाण, अमित जयस्वाल, किरण नाकती, निखिल बुजबडे, प्रशांत पाटील, संतोष बोडके, प्रकाश पायरे, संजिव कुलकर्णी, वैभव ठाकूर, आनंद जयस्वाल, रोहित गायकवाड, प्रीतम राजपूत, प्रकाश खांडेकर, विकास पाटील, सुशांत मोरे, अशोक कदम, रमाकांत चौधरी, मधुकर गिजे, महिला उपजिल्हाप्रमुख वंदना डोंगरे, विभागप्रमुख रिना मुदलीयार, यमुना म्हात्रे, प्राची मोरे आणि शिवसैनिक उपस्थित होते.
