आपत्ती निवारणासाठी ‘नमुंमपा'चे आपत्कालीन प्रतिसाद दल सज्ज
नवी मुंबई : नवी मुंबई महापालिका क्षेत्रात आपत्ती निवारणासाठी विभागवार यंत्रणा असून यामध्ये महापालिका अग्निशमन दल महत्वाची भूमिका बजावते. त्या कार्यवाहीत अधिक सक्षमता येण्याच्या दृष्टीने राष्ट्रीय व राज्य आपत्ती प्रतिसाद पथक तसेच ठाणे महानगरपालिकेचे आपत्ती प्रतिसाद पथक (टीडीआरएफ) या धर्तीवर नवी मुंबई महापालिकेने आपत्कालीन प्रतिसाद दल (डीआरएफ) स्थापन केले आहे. महापालिका आयुक्त डॉ. कैलास शिंदे यांनी याबाबतचे आदेश जारी केले असून नमुंमपा अग्निशमन विभागातील प्रशिक्षित अधिकारी आणि कर्मचारी तसेच नागरी संरक्षण दलामधील अधिकारी यांचा समावेश असणारे सदर स्वतंत्र आपत्कालीन प्रतिसाद दल (डीआरएफ) यापुढील काळात नवी मुंबईतील आपत्ती निवारणासाठी सज्ज असणार आहे.
नवी मुंबई शहराच्या भौगोलिक व्याप्तीमध्ये डोंगरावरील वस्ती, खाडी किनारा, तलावे, जुनी बांधकामे, शहरातून जाणारे राज्य आणि राष्ट्रीय महामार्ग, आदि बाबींचा विचार करता नवी मुंबई शहरामध्ये कोणतीही आपत्ती (उदा. अतिवृष्टीमुळे रस्त्यावर पाणी तुंबणे, वृक्ष आणि वृक्षांच्या फांद्या पडणे, इमारत ढासळणे, निवासी-व्यापारी मालमत्तांमध्ये पाणी शिरणे, दरड कोसळणे, भूस्खलन अशा घटना) यापूर्वी घडलेल्या आहेत. अशाप्रकारे नवी मुंबई शहरामध्ये कोणतीही नैसर्गिक अथवा मानव निर्मित आपत्ती घडल्यास अग्निशमन दलास पाचारण केले जाते. सदर वस्तुस्थिती लक्षात घेऊन अग्निशमन विभागातील प्रशिक्षित अधिकारी, कर्मचारी आणि नागरी संरक्षण दलामधील अधिकारी यांचा समावेश असणारे स्वतंत्र आपत्कालीन प्रतिसाद दल स्थापना करण्यात आलेले आहे.
नवी मुंबई महापालिका क्षेत्राकरिता आपत्कालीन परिस्थितीमध्ये तात्काळ प्रतिसाद देण्यासाठी परिमंडळ-१ आणि परिमंडळ-२ अंतर्गत परिमंडळनिहाय आपत्कालीन प्रतिसाद दल स्थापित करण्यात आलेले असून सदर दल उपआयुक्त (आपत्ती व्यवस्थापन) यांच्या देखरेख-नियंत्रणाखाली कार्यरत राहतील. सहा.अग्निशमन केंद्र अधिकारी प्रेमानंद ठाकूर परिमंडळ-१ आपत्कालीन प्रतिसाद दलाचे तसेच सहा.अग्निशमन केंद्र अधिकारी पदाजी निरगुडे परिमंडळ-२ आपत्कालीन प्रतिसाद दलाचे नियंत्रण अधिकारी असणार असून त्यांच्या नियंत्रणाखाली विभागीय क्षेत्ररक्षक, अग्निशमन प्रणेता, अग्निशामक असा ११ जणांचा प्रशिक्षित समुह मदतकार्यासाठी दक्षतेने कार्यरत असणार आहे.
सदर आपत्कालीन प्रतिसाद दल नवी मुंबई महापालिका मुख्यालयात २४ तास कार्यरत असणार आहे. आपत्ती किंवा दुर्घटनेचे स्वरुप मोठे असल्यास दलामधील सर्व अधिकारी-कर्मचारी एकत्रित काम करतील. नियंत्रण कक्षामधून आपत्तीबाबत माहिती मिळाल्यानंतर दलामार्फत त्या ठिकाणी आपत्ती निवारणासाठीच्या तात्काळ उपाययोजना करण्यात येतील. दलाकडे आवश्यक वाहने आणि साहित्य पुरेशा प्रमाणात उपलब्ध ठेवण्यात येईल.
या अनुषंगाने नमुंमपा अग्निशमन दलाचे मुख्य अग्निशमन अधिकारी यांच्यामार्फत आपत्कालीन प्रतिसाद दलांमधील अधिकारी आणि कर्मचारी यांना आवश्यक वाहने तसेच लाईफ जॅकेटस्‌, कटींग टूल्स (स्प्रेडर कटर कॉम्बी टूल्स, आदि), काँक्रीट कटर, पॉवर हॅमर, लेंडर, फायर एक्स्टिंग्युशर अशी तसेच इतर आवश्यक असणारी साधन सामग्री उपलब्ध करुन देण्यात येत आहे.
आपत्कालीन प्रतिसाद दलामुळे ‘नमुंमपा'ची आपत्ती निवारण यंत्रणा अधिक सक्षम होणार असून कोणत्याही प्रकारच्या दुर्घटनेत तात्काळ मदतकार्य सुरु करणे शक्य होणार आहे. त्याचप्रमाणे या दलामध्ये अग्निशमन दलातील प्रशिक्षित अधिकारी, कर्मचारी असल्याने तसेच त्यांना नागरी संरक्षण दलाची साथ असल्याने मदतकार्य सक्षमतेने होणार आहे. त्याचप्रमाणे परिमंडळनिहाय दोन स्वतंत्र समुह कार्यान्वित करण्यात आल्याने जलद मदतकार्य करणे शक्य होणार आहे. नागरिकांनी कोणत्याही प्रकारच्या मदतकार्यासाठी नवी मुंबई महापालिकेच्या मध्यवर्ती नियंत्रण कक्षाशी २७५६७०६०/७०६१ या दूरध्वनी क्रमांकावर अथवा १८००२२२३०९/१८००२२२३१० या दूरध्वनी क्रमांकावर संपर्क साधावा, असे आवाहन करण्यात येत आहे.
-डॉ. कैलास शिंदे, आयुक्त-नवी मुंबई महापालिका.
