बदलणार सावित्रीबाई फुले नाट्यगृहाचा चेहरामोहरा
कल्याणः कल्याण-डोंबिवली महापालिकेच्या डोंबिवली येथील सावित्रीबाई फुले नाट्यगृहाचा लवकरच चेहरामोहरा बदलणार आहे. काही दिवसांपूर्वी अंतर्गत भागात झालेल्या पडझडीनंतर नाट्यगृहाच्या विकासासाठी निधीची मागणी ‘कल्याण'चे खासदार डॉ. श्रीकांत शिंदे यांनी राज्याचे उपमुख्यमंत्री तथा नगरविकास मंत्री एकनाथ शिंदे यांच्याकडे केली होती. त्यानंतर नगरविकास विभागाने फुले नाट्यगृहासाठी ३५ कोटींचा निधी उपलब्ध करुन दिला आहे. त्यातील १५ कोटी रुपयांचा निधी कल्याण-डोंबिवली महापालिकाकडे वर्ग करण्यात आला आहे. नुकताच या निधीचा निर्णय शासनाने जाहीर केला. त्यामुळे नव्या रुपातील सावित्रीबाई फुले नाट्यगृह लवकरच प्रेक्षकांच्या भेटीला येणार आहे.
सांस्कृतिक नगरी अशी ओळख असलेल्या डोंबिवली शहरात नाट्य, कला क्षेत्रातील मान्यवरांची मांदियाळी असते. डोंबिवली कला आणि नाट्य रसिकांची पंढरी म्हणूनही ओळखली जाते. डोंबिवली आणि आसपासच्या परिसरातील नाट्य रसिकांसाठी ‘केडीएमसी'चे सावित्रीबाई ज्योतीराव फुले नाट्यगृह हक्काचे ठिकाण आहे. मात्र, काही दिवसांपूर्वी येथील नाट्यगृहात प्रेक्षकांच्या खुर्च्यांवरचा काही भाग पडला होता. रात्रीच्या सुमारास सदर प्रकार झाला होता. त्यामुळे कुणालाही इजा झाली नव्हती. त्यानंतर ‘केडीएमसी'ने फुले नाट्यगृह दुरुस्तीसाठी बंद केले होते. नाट्यगृह बंद झाल्याने नाट्य, कला रसिकांचा हिरमोड झाला होता. देखभाल-दुरुस्तीसाठी बंद केलेले नाट्यगृह आता नव्या स्वरुपात विकसिात केले जावे, अशी मागणी नाट्य रसिकांनी खासदार डॉ. श्रीकांत शिंदे यांच्याकडे केली होती.
