घोडबंदर रस्ता जानेवारी २०२६ मध्ये वाहतूक कोंडीमुक्त
ठाणे : गायमुख घाटाचे पुनर्पुष्ठीकरण, घोडबंदर सेवा रस्ता जोडणी, अमृत जलवाहिनी टाकणे आणि ‘महावितरण'च्या वाहिन्यांचे स्थलांतरण अशी सर्व कामे पूर्ण होऊन नवीन वर्षात जानेवारी २०२६ मध्ये घोडबंदर रस्ता पूर्णपणे वाहतूक कोंडीमुक्त होईल, अशी ग्वाही परिवहन मंत्री प्रताप सरनाईक यांनी दिली.
परिवहन मंत्री प्रताप सरनाईक यांच्या अध्यक्षतेखाली ठाणे महापालिका क्षेत्रातील विविध विकास कामांबाबत आढावा बैठक १० नोव्हेंबर रोजी आयोजित करण्यात आली होती. ठाणे महापालिका मुख्यालयातील कै. अरविंद पेंडसे सभागृहात झालेल्या या बैठकीस महापालिका आयुक्त सौरभ राव, ‘एमएमआरडीए'चे सह महानगर आयुक्त आस्तिक कुमार पाण्ड्ये, महापालिकेचे अतिरिक्त आयुक्त प्रशांत रोडे, पोलीस उपायुक्त (वाहतूक) पंकज शिरसाट, नगर अभियंता प्रशांत सोनाग्रा यांच्यासह महापालिका, एमएमआरडीए, मेट्रो, सार्वजनिक बांधकाम विभाग, जिल्हाधिकारी कार्यालय, म्हाडा, आदि विभागांचे अधिकारी उपस्थित होते. जस्टिस फॉर घोडबंदर रोड यांचे प्रतिनिधीही सदर बैठकीत सहभागी झाले होते.
घोडबंदर रोडवरील विविध समस्यांबाबत जस्टिस फॉर घोडबंदर रोडच्या प्रतिनिधींनी बैठकीत सादरीकरण केले. त्याचा आढावा घेतल्यानंतर ना. प्रताप सरनाईक यांनी एमएमआरडीए, महापालिका, मेट्रो आणि सार्वजनिक बांधकाम विभाग यांच्याकडून रस्त्यावरील कामांच्या स्थितीची माहिती घेतली. गायमुख घाटातील ठाणे महापालिका हद्दीतील रस्त्यांच्या पुनर्पुष्ठीकरणाचे काम वाहतूक पोलिसांशी समन्वय साधून केले जाणार आहे. त्याचवेळी ‘जस्टिस फॉर घोडबंदर रोड'च्या प्रतिनिधींनी सुचवल्याप्रमाणे घोडबंदर रस्त्यावरील सर्व उड्डाणपुलावरील रस्त्याची डागडुजी, पुनपर्ुष्ठीकरण एकाचवेळी हाती घेऊन पूर्ण केले जावे, असे निर्देश नामदार सरनाईक यांनी दिले.
दरम्यान, ठाणे महापालिका क्षेत्रात सुरु असलेल्या आणि आता अंतिम टप्प्यात असलेल्या विविध विकास कामांचे लोकार्पण नोव्हेंबर महिन्याच्या अखेरीस तसेच डिसेंबर महिन्याच्या मध्यापर्यंत करण्यात येईल, असेही ना. सरनाईक यांनी स्पष्ट केले.
गायमुख घाटाच्या पुनर्पुष्ठीकरणाचे काम पूर्ण झाल्यावर घोडबंदर रस्ता ठाणे महापालिकाकडे हस्तांतरीत करण्याची प्रक्रिया सार्वजनिक बांधकाम विभाग आणि ठाणे महापालिका यांनी वेगाने पूर्ण करावी.
-ना. प्रताप सरनाईक, परिवहन मंत्री-महाराष्ट्र.
सदर बैठकीत, ओवळा-माजिवाडा विधानसभा मतदारसंघातील वर्तकनगर, माजीवाडा, लोढा आणि समता नगर येथील समाज मंदिरे, नागला बंदर खाडी किनारा सुशोभिकरण आणि कांदळवन उद्यान, उपवन येथील धर्मवीर आनंद दिघे जिमखाना, तरण तलाव, स्मशानभूमी, विहीरी, हिंदुहृदयसम्राट स्व. बाळासाहेब ठाकरे कलादालन, अप्पासाहेब धर्माधिकारी भवन, डॉ. बाबासाहेब आंबेडकर सामाजिक न्याय भवन, आनंद नगर, कासारवडवली उद्यान, भाईंदर पाडा येथील कान्होजी आंग्रे उद्यान यांचे सुशोभिकरण, आनंदीबाई जोशी हॉस्पिटल, मराठा भवन, महिला हॉस्टेल, सी. डी. देशमुख प्रशासकीय प्रशिक्षण इमारत, सुधाकर चव्हाण बहुउद्देशीय इमारत, शिवाई नगर, नाले बांधणीची कामे, जॉगिंग ट्रॅक, कासारवडवली येथील मार्केट, राम मंदीर तलाव सुशोभीकरण, लता मंगेशकर संगीत विद्यालय, वर्तकनगर, आनंदनगर स्पोर्टस कॉम्प्लेक्स आणि फुटबॉल टर्फ, लोकशाहीर आण्णा भाऊ साठे वाचनालय, कासारवडवली, आदि प्रकल्पांचा आढावा परिवहन मंत्री ना. सरनाईक यांनी घेतला.
