४ दिवसात १३.१६ कोटी जमा
पनवेल : मालमत्ता करांवरील शास्तीमध्ये सवलत देत पनवेल महापालिकेने १८ जुलै पासून ते २० सप्टेंबर या कालावधीकरीता ‘अभय योजना' विविध टप्प्यामध्ये लागू केली आहे. या योजनेचा नागरिकांनी लाभ घेऊन आपला मालमत्ता कर पूर्ण भरावा, असे आवाहन पनवेल महापालिका आयुक्त मंगेश चितळे यांनी केले होते. त्यांच्या आवाहनाला महापालिका कार्यक्षेत्रातील नागरिकांचा प्रचंड प्रतिसाद दिसून येत आहे. अवघ्या ४ दिवसात महापालिकेच्या तिजोरीत १३ कोटी १६ लाख रुपये मालमत्ता कर जमा झाला आहे.
येत्या काळामध्ये महापालिकेने अनेक महत्वाकांक्षी प्रकल्प हाती घेतले आहेत. विविध विकास कामांमध्ये प्रस्तावित कामांमध्ये नवीन मुख्यालय बांधणे, मच्छी मार्केट, बहुमजली वाहनतळ, शाळा, दैनिक बाजार, प्रभाग कार्यालये ‘हिरकणी' माता-बाल संगोपन रुग्णालय-सर्व समावेशक ४५० बेडस्‌चे हॉस्पीटल उभारत आहे. या सर्व प्रस्तावित कामांसाठी मालमत्ता कर उत्पन्नाचा प्रमुख स्त्रोत आहे. त्यामुळे मालमत्ता कर भरुन महापालिकेस सहकार्य करावे, असे आवाहन महापालिकेच्या वतीने करण्यात आले आहे.
शास्ती सवलत अभय योजना...
थकीत मालमत्ता करांवरील शास्तीमध्ये सवलत देण्याबाबत ‘अभय योजना'मध्ये ४ महत्वाचे टप्पे आहेत. यामध्ये प्रामुख्याने १८ जुलै ते १५ ऑगस्ट २०२५ या कालावधीत संपूर्ण मालमत्ताकर एकरकमी भरल्यास शास्तीमध्ये ९० टक्के सूट मिळणार आहे. त्यामुळे मालमत्तांधारकांनी या संधीचा लाभ घेऊन लवकरात लवकर आपला पूर्ण मालमत्ता कर भरावा, असे आवाहन महापालिका तर्फे करण्यात आले आहे.
तसेच १६ ते ३१ ऑगस्ट या कालाधीत संपूर्ण मालमत्ताकर एकरकमी भरल्यास शास्तीमध्ये ७५ टक्के सूट मिळणार. या पुढील काळात म्हणजे १ ते १० सप्टेंबर कालावधीत संपूर्ण मालमत्ताकर एकरकमी भरल्यास शास्तीमध्ये ५० टक्के सूट मिळेल. याशिवाय ११ ते २० सप्टेंबर या कालाधीत संपूर्ण मालमत्ताकर एकरकमी भरल्यास असलेल्या शास्तीमध्ये २५ टक्के सूट मिळणार आहे. सदर अभय योजना केवळ एकवेळची विशेष आणि अंतिम बाब म्हणून जाहीर करण्यात आली आहे.
ऑनलाईन भरल्यास २ टक्के सलवत...
पनवेल महापालिकेच्या वेबसाईट, PMC Tax App अथवा पनवेल कनेक्ट ॲपद्वारे नागरिकांनी मालमत्ता कर ऑनलाईन भरल्यास त्यांना २ टक्के सवलत मिळेल. तसेच चालू वर्षाचा म्हणजे २०२५-२६ चा कर ३१ जुलै पर्यंत भरल्यास संबंधितांना या करामध्ये ५ टक्के सूट मिळेल. त्यामुळे नागरिकांनी लवकरात लवकर कर भरणा करुन याचा लाभ घेण्याचे आवाहन करण्यात येत आहे.
-स्वरुप खारगे, उपायुवत-कर विभाग, पनवेल महापालिका.
