नुतनीकृत ‘गडकरी रंगायतन'चे १५ ऑगस्ट रोजी लोकार्पण
ठाणे : ठाणे शहराचा सांस्कृतिक मानबिंदू असलेल्या राम गणेश गडकरी रंगायतन नाट्यगृहाच्या नुतनीकृत वास्तुचा भव्य लोकार्पण सोहळा राज्याचे उपमुख्यमंत्री एकनाथ शिंदे यांच्या शुभहस्ते आणि ज्येष्ठ रंगकर्मी सुहास जोशी यांच्या प्रमुख उपस्थितीत १५ ऑगस्ट रोजी स्वातंत्र्यदिनी सकाळी ११ वाजता करण्यात येणार आहे. या अविस्मरणीय सोहळ्यासाठी वनमंत्री गणेश नाईक, परिवहन मंत्री प्रताप सरनाईक, खासदार डॉ. श्रीकांत शिंदे, खासदार नरेश म्हस्के, आमदार डॉ. जितेंद्र आव्हाड, आमदार संजय केळकर, आमदार राजेश मोरे, आमदार ॲड. निरंजन डावखरे उपस्थित राहणार आहेत. तसेच या निमित्ताने, लोकसंगीतावर आधारित युवा कलाकारांचा ‘फोकलोक' कार्यक्रम होणार आहे.
उपमुख्यमंत्री एकनाथ शिंदे यांनी मुख्यमंत्री असताना राम गणेश गडकरी रंगायतन या वास्तुच्या नुतनीकरणासाठी राज्य शासनाकडून ३१ कोटी रुपये उपलब्ध करुन दिले होते. या निधीतून ठाणे महापालिका आयुक्त सौरभ राव यांच्या मार्गदर्शनाखाली ‘रंगायतन'च्या जुन्या झालेल्या वास्तुला बळकटी देऊन सर्व यंत्रणांचे नुतनीकरण करण्यात आले आहे.
सन १९७८ मध्ये बांधण्यात आलेल्या ‘रंगायतन'ची १९९८ मध्ये प्रथम मोठ्या प्रमाणावर दुरुस्ती करण्यात आली होती. त्यानंतर आता २६ वर्षांनी नुतनीकरण करण्यात आले आहे. ऑक्टोबर २०२४ मध्ये नुतनीकरणाचे काम सुरु करण्यात आले. सदरचे काम सुरु करताना आणि कामाच्या वेगवेगळ्या टप्प्यांवर रंगभूमीवर कार्यरत असलेले कलाकार, दिग्दर्शक, निर्माते यांच्याशी महापालिकेने सविस्तर चर्चा आणि प्रत्यक्ष पाहणीही केली. त्यानुसार ‘गडकरी रंगायतन'चे संपूर्ण रुप पालटून टाकण्यात आले आहे.
इमारतीची संपूर्ण स्ट्रक्चरल दुरुस्ती, इमारतीवरील नवीन शेड, नाट्यगृहामधील संपूर्ण नवीन पलोअरिंग, रंगमंचाचे नुतनीकरण, नवीन खुर्च्या, नवीन फॉल सिलिंग, नवीन अकॉस्टिक पॅनल, संपूर्ण रंगरंगोटी, नवीन अग्निशमन यंत्रणा, नवीन दरवाजे-खिडक्या, नवीन गालिचा, फर्निचर, समोरील आणि मागील बाजुच्या दर्शनी बाजुचे सुशोभिकरण, नवीन सुरक्षा केबिन, संपूर्ण वायरिंग आणि विद्युतीकरण नव्याने करणे, नवीन ट्रान्सफॉर्मर आणि जनरेटर बसविणे, ज्येष्ठ नागरिकांकरिता उद्वाहक (लिपट) बसविणे, रंगमंचावरील लाईटस्, ध्वनी यंत्रणा, नवीन वातानुकूलित यंत्रणा आदि कामे या निधीतून करण्यात आली आहेत.
नांदी आणि पलुजन...
लोकार्पण सोहळ्यासाठी गडकरी रंगायतन आणि त्यासमोरील पूर्ण रस्ता दोन्ही बाजुंनी सजवण्यात येणार आहे. प्रत्यक्ष कार्यक्रमात ज्येष्ठ शास्त्रीय गायक मुकुंद मराठे यांच्यासह संपदा माने, तन्वी गोरे, शरण्या शेणॉय, धवल भागवत, श्रीकर कुलकर्णी, प्रतीक फणसे असे युवा कलाकार नांदी सादर करणार आहेत. त्यांना केदार भागवत (ऑर्गन) आणि आदित्य पानवलकर (तबला) कलाकार वादन साथ करतील. तसेच राष्ट्रीय-आंतरराष्ट्रीय स्तरावर नावाजलेले ठाण्यातील मान्यवर कलाकार पलुजन कलाविष्कार सादर करणार आहेत. त्यात पं. विवेक सोनार (बासरी), पं. मुकुंदराज देव (तबला), मोहन पेंडसे (व्हायोलीन), किरण वेहेले (कीबोर्ड), अभिषेक प्रभू (बेस गिटार) आणि सचिन नाखवा (ड्रम्स) कलाकार सहभागी होणार आहेत.
‘गडकरी रंगायतन'चा लोकार्पण सोहळा झाल्यानंतर फोकलोक असा लोकसंगीतावर आधारित युवा कलाकारांचा दमदार कार्यक्रम ठाणेकर रसिकांना विनामूल्य पाहता येईल. या कार्यक्रमात ‘रंगायतन'मधील पहिल्या १० रांगा निमंत्रितांसाठी राखीव असतील. उपबल्ध प्रवेशिकांचे वितरण १४ ऑगस्ट रोजी दुपारी १२ वाजता ‘गडकरी रंगायतन'च्या तिकीट खिडकीवर सुरु होईल. या प्रवेशिका विनामूल्य आहेत. प्रथम येणाऱ्यास प्राधान्य या तत्त्वावर एक व्यक्तीस दोन प्रवेशिका घेता येतील.
