कल्याण-डोंबिवली क्षेत्रात ‘झोपडपट्टी पुनर्वसन योजना' प्रभावीपणे राबवा
कल्याण : मुंबई महानगर प्रदेश विकास प्राधिकरण क्षेत्र हद्दीत कल्याण, डोंबिवली विभागातील खासगी आणि सरकारी जमिनीवर झोपडपट्टी पुनर्वसन योजना प्रभावीपणे राबविण्यात यावी. प्रत्येक लाभार्थी घटकाला सदर योजनेचा लाभ मिळाला पाहिजे यादृष्टीने प्रयत्न करण्याच्या सूचना ‘भाजपा'चे प्रदेश कार्याध्यक्ष आ. रवींद्र चव्हाण यांनी ‘झोपडपट्टी पुनर्वसन योजना'च्या मुंबईतील अधिकाऱ्यांना दिले.
‘झोपडपट्टी पुनर्वसन योजना'ची मुंबई महानगर प्रदेश प्राधिकरण क्षेत्रात किती अंमलबजावणी झाली आणि करायची असेल तर ती कशा पध्दतीने करता येईल. लाभार्थींना या योजनेचा अधिकाधिक लाभ कसा मिळेल. तसेच कल्याण-डोंबिवली महापालिका क्षेत्रात झोपडपट्टी पुनर्वसन योजना अधिक प्रभावीपणे राबविण्यात यावी, या दृष्टीने भाजप प्रदेश कार्याध्यक्ष आणि आमदार रवींद्र चव्हाण यांनी ५ मार्च रोजी मुंबईत ‘झोपडपट्टी पुनर्वसन प्राधिकरण'च्या अधिकाऱ्यांबरोबर बैठक घेतली. याप्रसंगी ‘प्राधिकरण'च्या उपजिल्हाधिकारी अश्विनी जोशी, तहसीलदार विजय वाकोडे, सहाय्यक अधिकारी हर्षद घोटेकर, आदि उपस्थित होते.
मुंबई महानगर प्रदेश प्राधिकरण क्षेत्रात कल्याण-डोंबिवली महापालिका सह ज्या स्थानिक स्वराज्य संस्था भागात सदर योजना तातडीने राबविण्यासाठी अनुकूल परिस्थिती आहे, तेथे या योजनेचा विनाविलंब शुभारंभ करावा. या योजनेतून खरा लाभार्थी अजिबात वंचित राहता कामा नये. ‘प्राधिकरण'च्या अन्य क्षेत्रातही खासगी, शासकीय जमिनींवर झोपडपट्टी पुनर्वसन योजना अधिक प्रभावीपणे, गतिमानतेने राबविता येईल यासाठी ‘झोपडपट्टी पुनर्वसन प्राधिकरण'ने वेगाने हालचाली सुरु कराव्यात. सदर योजनेच्या अंमलबजावणीत काही अडथळे येत असतील तर त्याचे शासन पातळीवर निराकरण करण्यासाठी आपण पुढाकार घेऊ, असे आश्वासन आ. रवींद्र चव्हाण यांनी ‘प्राधिकरण'च्या अधिकाऱ्यांना दिले.
दरम्यान, ‘झोपडपट्टी पुनर्वसन प्राधिकरण'च्या अधिकाऱ्यांनीही पुनर्वसन योजना कल्याण-डोंबिवली महापालिका क्षेत्रात राबविण्यासाठी आम्ही सज्ज असल्याचे सांगितले.
