पोलीस अंमलदार बेपत्ता
नवी मुंबई : रबाले पोलीस ठाण्यात कार्यरत असलेले पोलीस शिपाई बेपत्ता झाल्याने एकच खळबळ उडाली आहे. सोमनाथ काशीनाथ फापाळे (३१) असे या पोलीस शिपाईचे नाव असून ते ४ सपटेंबर रोजी रात्रपाळी करुन आपल्या घरी जातो असे सांगून निघून गेले, मात्र अद्यापपर्यंत घरी पोहोचलाच नाही. वाशी पोलीस ठाण्यात सोमनाथ फापाळे बेपत्ता झाल्याची नोंद करण्यात आली असून पोलिसांकडून त्यांचा शोध घेण्यात येत आहे.
पोलीस शिपाई सोमनाथ फापाळे (३१) कळंबोलीतील रोडपाली भागात पत्नी वैशाली हिच्यासह राहण्यास आहेत. तसेच ते सध्या रबाले पोलीस ठाण्यात कार्यरत आहेत. ४ सप्टेंबर रोजी रात्री सोमनाथ यांची वाशी येथे झोन वन स्ट्रायकिंगच्या गाडीवर ड्युटी होती. याबाबतची माहिती त्यांनी पत्नीला ड्युटीवर जाण्यापूर्वी दिली होती. त्यानंतर मध्यरात्री वैशाली यांनी त्यांना फोनवर संपर्क साधला असता, त्यावेळी देखील त्यांनी झोन वन स्ट्रायकिंगच्या गाडीवर वाशी येथे असल्याचे सांगितले होते.
त्यानंतर सकाळी ६.३० वाजता वैशाली यांनी सोमनाथ यांना संपर्क साधला होता. मात्र, त्यांनी नंतर कॉल करतो असे सांगून फोन कट केला होता. त्यानंतर ७.४५ वाजता सोमनाथ यांनी पत्नीला संपर्क साधून थोडेसे टेंशन आले आहे, असे सांगितले होते. त्यानंतर त्याने फोन चार्जिग करुन परत कॉल करतो, असे सांगितले होते. मात्र, त्यांचा कॉल न आल्याने वैशाली यांनी ९ वाजता त्यांना कॉल केला असता, त्याचा फोन बंद असल्याचे आढळून आले.
त्यानंतर वैशाली यांनी सोमनाथ सोबत असलेल्या पोलिसांचे नंबर मिळवून त्यांना संपर्क साधला असता, सोमनाथ सकाळी ७.३० वाजता ड्युटीवरुन घरी निघून गेल्याचे त्यांनी सांगितले. त्यानंतर वैशाली यांनी इतर नातेवाईकांकडे सोमनाथ यांचा शोध घेतला; मात्र ते कुठेच मिळून आले नाही. त्यामुळे अखेर त्यांनी ६ सप्टेंबर रोजी वाशी पोलीस ठाण्यात मिसींगची तक्रार दाखल केली. त्यानुसार बेपत्ता पोलीस शिपाई सोमनाथ फापाळे यांचा पोलिसांकडून शोध घेण्यात येत आहे.
