महापालिका शाळेतील विद्यार्थ्यांना ‘सचिन तेंडुलकर क्रिकेट ॲकॅडमी'तर्फे विनामूल्य क्रिकेट प्रशिक्षण
नवी मुंबई : नवी मुंबई महापालिका मुलांमधील अंगभूत कौशल्ये ओळखून त्यांना योग्य वयात संधी उपलब्ध करुन देण्याची भूमिका घेऊन मुलांच्या आयुष्यात प्रकाश पेरण्याचे काम करीत आहे. त्यामुळे या माध्यमातून दर्जेदार खेळाडू घडतील, असा विश्वास जगप्रसिध्द क्रिकेटपटू भारतरत्न सचिन तेंडुलकर यांनी व्यक्त केला.
नेरुळ येथील डॉ. डी. वाय. पाटील स्टेडिअम येथे असलेल्या ‘सचिन तेंडुलकर क्रिकेट ॲकॅडमी'च्या पुढाकाराने नवी मुंबई महापालिकेच्या शाळांमधील गुणवंत विद्यार्थ्यांना शास्त्रशुध्द क्रिकेट प्रशिक्षण देण्यात येणार आहे. या क्रिकेट प्रशिक्षणाचा शुभारंभ २५ मार्च रोजी डी. वाय. पाटील स्टेडीयम येथे झाला. यावेळी सचिन तेंडुलकर यांनी उपस्थित शिक्षक, पालक आणि विद्यार्थ्यांशी संवाद साधला. याप्रसंगी महापालिका आयुक्त डॉ. कैलास शिंदे, डी. वाय. पाटील स्टेडियमचे सर्वेसर्वा डॉ. विजय पाटील उपस्थित होते.
यावेळी सचिन तेंडुलकर यांनी लहानपणीच्या क्रिकेट खेळाच्या आठवणी सांगताना माझ्या भावाने क्रिकेट खेळण्याचे माझ्यातील कौशल्य हेरुन मला आचरेकर सरांकडे प्रशिक्षणासाठी पाठविले होते. त्याच पध्दतीने आपल्यातील कौशल्ये ओळखणारा आणि त्यासाठी योग्य संधी उपलब्ध करुन देणारा आपुलकीचा व्यक्ती जीवनात गरजेचा असतो. त्यामुळे महापालिकेच्या विद्यार्थ्यांना तशा प्रकारची संधी उपलब्ध करुन देण्यासाठी आपण पाठिंबा देत असल्याचे सांगितले. यश मिळाल्यानंतर ज्याप्रमाणे मुलांच्या पाठीशी उभे राहता त्याप्रमाणेच अपयशाच्या काळातही खंबीरपणे सोबत रहाण्याचा सल्ला तेंडुलकर याने यावेळी दिला. ‘नमुंमपा'ने पुढाकार घेऊन मुलांना प्रशिक्षणाची संधी उपलब्ध करुन देण्यास संमती दर्शविल्याबद्दल सचिन तेंडुलकर यांनी महापालिकेचे अभिनंदन केले.
यावेळी आयुक्त डॉ. कैलास शिंदे यांनी अशा प्रकारची शास्त्रशुध्द क्रिकेट प्रशिक्षणाची मोठी संधी महापालिकेच्या विद्यार्थ्यांना ‘ॲकॅडमी'च्या वतीने विनामूल्य उपलब्ध करुन देत असल्याबद्दल भारतरत्न सचिन तेंडुलकर यांचे आभार व्यक्त केले. यापुढील काळात नवी मुंबईतून क्रिकेट प्रमाणेच विविध खेळांमधील गुणवंत खेळाडू घडतील, असा विश्वासही त्यांनी व्यक्त केला.
याप्रसंगी क्रीडा विभागाच्या उपायुक्त अभिलाषा म्हात्रे पाटील, क्रीडा अधिकारी रेवप्पा गुरव आणि शिक्षणाधिकारी अरुणा यादव उपस्थित होते.
क्रिकेट प्रशिक्षणासाठी २० मुले, २० मुलींची निवड...
‘सचिन तेंडुलकर क्रिकेट ॲकॅडमी'चे मुख्य प्रशिक्षक अतुल गायकवाड यांच्या मार्गदर्शनाखाली ‘ॲकॅडमी'च्या निवड समिती तर्फे ३ दिवसांचे शिबीर राबवण्यात आले. या शिबीरात ‘नमुंमपा'च्या शाळांतील ११०० हून अधिक विद्यार्थ्यांच्या क्रिकेट खेळाची चाचणी घेण्यात आली, त्यामधून २४० मुलांची अंतिम चाचणीसाठी निवड करण्यात आली. सचिन तेंडुलकर यांनी डी. वाय. पाटील स्टेडियम येथे त्या मुलांचा काही वेळ खेळ बघत त्यांच्याशी संवाद देखील साधला. यातील २० मुले आणि २० मुलींची निवड करण्यात येऊन त्यांना वर्षभर ‘ॲकॅडमी'च्या वतीने विनामूल्य क्रिकेट प्रशिक्षण देण्यात येणार आहे. या मुलांना क्रिकेट किटही ‘ॲकॅडमी'तर्फेच देण्यात येणार आहे. महापालिका शाळेतील विद्यार्थ्यांकडून प्रशिक्षण शुल्क घेतले जाणार नाही.
