‘गडकरी रंगायतन'मध्ये पुन्हा घणाणली तिसरी घंटा
नांदी, पलूजन, फोकलोक कार्यक्रमाने सुखावले ठाणेकर रसिक
ठाणे : ठाणे शहराचा सांस्कृतिक मानबिंदू असलेल्या ‘राम गणेश गडकरी रंगायतन नाट्यगृह'च्या नूतनीकृत वास्तुचा भव्य लोकार्पण सोहळा राज्याचे उपमुख्यमंत्री एकनाथ शिंदे यांच्या शुभहस्ते आणि ज्येष्ठ रंगकर्मी सुहास जोशी यांच्या प्रमुख उपस्थितीत स्वातंत्र्यदिनी संपन्न झाला.
या अविस्मरणीय सोहळ्यास खासदार नरेश म्हस्के, आमदार संजय केळकर, आमदार ॲड. निरंजन डावखरे, माजी खासदार विनय सहस्त्रबुद्धे, माजी महापौर मिनाक्षी शिंदे, महापालिका आयुक्त सौरभ राव, जिल्हाधिकारी डॉ. श्रीकृष्ण पांचाळ, ‘जिल्हा परिषद'चे मुख्य कार्यकारी अधिकारी रोहन घुगे, ‘अ. भा. मराठी नाट्य परिषद'चे विश्वस्त अशोक हांडे, प्रमुख कार्यवाह अजित भुरे, ज्येष्ठ अभिनेते अशोक समेळ, लोककलांचे अभ्यासक प्रकाश खांडगे, अतिरिक्त आयुक्त (१) संदीप माळवी, अतिरिक्त आयुक्त (२) प्रशांत रोडे, आदि उपस्थित होते. त्याचबरोबर प्रेक्षागृहात, रंगकर्मी, ज्येष्ठ माजी नगरसेवक, नामवंत ठाणेकर नागरिक, ज्येष्ठ संपादक, पत्रकार, आदि आवर्जुन उपस्थित होते.
गेले काही महिने नूतनीकरणासाठी ‘गडकरी रंगायतन'चा पडदा बंद, रंगमंच सुना होता. नाट्य रसिकांना वाट पहावी लागली, तो दिवस आज उजाडला आहे. तिसरी घंटा झालेली आहे. नूतनीकृत ‘गडकरी रंगायतन'चे लोकार्पण झाले आहे, असे उपमुख्यमंत्री एकनाथ शिंदे यांनी यावेळी जाहीर केले. कलाकारांच्या सूचना लक्षात घेऊन या नूतनीकरणाचे काम झाले आहे. ‘रंगायतन'ची वास्तू मोडकळीला आली होती. तिचे पूर्ण रुप या नूतनीकरणाने पालटले आहे. नव्याने लिपट आली आहे. त्यामुळे आता ‘गडकरी रंगायतन'ची वास्तू आणखी सुंदर आणि दिमाखदार झाल्याचे उपमुख्यमंत्री शिंदे म्हणाले.
बदलत्या ठाण्यात अनेक गोष्टी येत आहेत. रस्ते, मेट्रो, स्वच्छता यांच्यासोबत आता एक हापूस पार्कही केले जाणार आहे. सेंद्रीय शेतीचा प्रकल्प यापूर्वीच महापालिकेने केला आहे, असेही उपमुख्यमंत्री शिंदे यांनी स्पष्ट केले.
ठाणे महापालिका आयुक्त सौरभ राव यांनी प्रास्ताविकपर भाषणात ‘गडकरी रंगायतन'च्या कामाचा आढावा घेतला. तसेच ‘अ. भा. मराठी नाट्य परिषद'चे विश्वस्त अशोक हांडे यांनी कलाकारांनी केलेल्या सूचनांची दखल घेऊन नूतनीकरण करण्यात आल्याबद्दल महापालिकेचे कौतुक केले.
सुहास जोशी यांचा सन्मान...
वयाची ७८ वर्षे आणि रंगभूमीवरील योगदानाची ५२ वर्षे पूर्ण करीत असलेल्या ज्येष्ठ रंगकर्मी सुहास जोशी यांचा यानिमित्ताने महापालिका आयुक्त सौरभ राव यांनी सन्मान केला.
नूतनीकरणातील योगदानाबद्दल सत्कार...
‘गडकरी रंगायतन'च्या नूतनीकरणात योगदान देणाऱ्यांमधील महापालिका नगर अभियंता प्रशांत सोनाग्रा, उपनगर अभियंता सुधीर गायकवाड, उपनगर अभियंता शुभांगी केसवानी, कार्यकारी अभियंता भगवान शिंदे, ‘गडकरी रंगायतन'च्या नावाचे अक्षरसुलेखन करणारे तसेच या संपूर्ण नूतनीकरण कामाचे नियमित परीक्षण करणारे उपायुक्त (जनसंपर्क) उमेश बिरारी, कंत्राटदार रवींद्र चव्हाण आणि सल्लागार हितेन सेठी यांच्या वतीने तेजस्विनी पंडित यांचा याप्रसंगी उपमुख्यमंत्री एकनाथ शिंदे यांच्या हस्ते गौरव करण्यात आला.
...आणि तिसरी घंटा झाली!
लोकार्पण सोहळ्यासाठी गडकरी रंगायतन आणि त्यासमोरील पूर्ण रस्ता दोन्ही बाजुंनी सजवण्यात आला होता. मुख्य मंचीय कार्यक्रमापूर्वी ‘गडकरी रंगायतन'च्या दर्शनी भिंतीवरील नामफलक आणि कोनशिला यांचे अनावरण उपमुख्यमंत्री शिंदे यांनी केले. त्यानंतर त्यांनी ‘रंगायतन'च्या वास्तुमध्ये प्रवेश करून नव्याने करण्यात आलेल्या बदलांची, व्यवस्थेची पाहणी केली. त्यानंतर ते प्रेक्षागृहात स्थानापन्न झाले. राष्ट्रगीत आणि राज्यगीत झाल्यावर तिसरी घंटा देण्यात आली. गेले १० महिने बंद असलेला ‘गडकरी रंगायतन'चा पडदा नांदीच्या सुरावटींवर पुन्हा उघडला आणि रसिकांनी टाळ्यांचा गजर केला.
नांदी, फ्लूजन आणि फोकलोक...
