टक्केवारीच्या नादात रखडले प्रकल्प
सॅटिस पूर्व गर्डर टाकण्याच्या कामाची केली पाहणी
ठाणे : नवीन ठाणे स्टेशन, सॅटिस पूर्व प्रकल्प यासारखे अनेक ठाण्यातील प्रकल्प टक्केवारीच्या नादात रखडले आहेत. या प्रकल्पांना चालना देण्यात सत्ताधारी पूर्णपणे अपयशी झाले असल्याचा आरोप शिवसेना नेते, माजी खासदार राजन विचारे यांनी केला आहे.
शिवसेना नेते राजन विचारे यांच्या संकल्पनेतून साकार होत असलेल्या सॅटिस-२ या प्रकल्पातील कोपरी रेल्वे पुलावरील गर्डरचे टाकण्याचे काम दोन दिवस सुरु आहे. त्याअनुषंगाने राजन विचारे यांनी २८ जुलै रोजी २८ जुलै रोजी सॅटिस पूर्व प्रकल्पातील गर्डर टाकण्याच्या कामाची ठाणे महापालिकेचे अधिकारी, रेल्वे प्रशासनाचे अधिकारी यांच्यासोबत पाहणी करुन गर्डरचे काम कितपत पूर्ण झाले आहे, याची माहिती घेतली. त्यावेळी त्यांनी माध्यमांशी बोलताना जोरदार टीका केली. तसेच सत्तेत असणाऱ्या कोणत्याही लोकप्रतिनिधीने या ठिकाणी येऊन आढावा घेतला नाही आणि साधी पाहणी देखील केली नसल्याने खंत विचारे यांनी व्यक्त केली. शिंदे गटाचे नेते राजकारण फोडाफोडी, दमबाजी यात व्यस्त असल्याने त्यांना विकासाचे काहीही पडले नसल्याचा आरोपही विचारे यांनी केला.
लवकरच सुटणार वाहतूक कोंडी...
४.५० मीटरचे पाच गर्डर असून गर्डर टाकण्यात आले आहेत. त्यावर स्टील काँक्रीट करुन पुल एकमेकांना जोडून २.२४ किलोमीटर लांबीचा एलिव्हेटेड मार्ग तयार होणार आहे. त्यामुळे ठाणे पूर्व स्टेशन परिसरात होणारी वाहतूक कोंडी लवकरच सुटणार आहे. सदर प्रकल्प सप्टेंबर अखेरपर्यंत पूर्ण करुन देण्याचे आश्वासन शिवसेना नेते राजन विचारे यांना अधिकाऱ्यांनी दिले आहे.
असा आहे प्रकल्प...
सॅटसि-२ प्रकल्पाला सन २०१८ साली मंजुरी मिळाली. त्यानंतर या प्रकल्पाचा स्मार्ट सिटी अंतर्गत समावेश करुन घेण्यासाठी केंद्र शासनाकडे आणि तत्कालीन महापालिका आयुक्त संजीव जयस्वाल यांच्याकडे पाठपुरावा केला. २६१ कोटी आणि रेल्वे पुलासाठी ३९ कोटी अशी एकूण २९८ कोटी रुपयांला मान्यता मिळाली. दिल्ली मधील आयआरडीसी विभागाकडूनही या प्रकल्पाला मंजुरी मिळवून घेतली. १९ फेब्रुवारी २०२२ रोजी सॅटिस डेकचे भूमीपुजन करण्यात आले. या प्रकल्पाचे काम टप्प्याटप्प्यामध्ये सुरु झाले.
संसदेत फोटो काढण्याऐवजी विकास कामांकडे लक्ष द्या...
सॅटिस मार्गावर ५९ पिलर उभे करण्यात आले. परंतु, गेल्या वर्षभरापासून ब्लॉक घेण्यासाठी रेल्वेकडे पाठपुरावा नसल्याने गर्डर टाकण्यास विलंब लागला होता. विद्यमान खासदार संसदेत फोटो काढण्यात व्यस्त आहेत. बहुतेक त्यांना विकास कामांकडेही लक्ष देण्यास वेळ नसावा.
- राजन विचारे, माजी खासदार तथा शिवसेना नेते.
