घोडबंदर रस्त्यावरील कामांसाठी ३० मे ची डेडलाईन
आयुवतांची अधिकाऱ्यांसमवेत टीएमटी बसमधून पाहणी
ठाणे : ठाणे महापालिका क्षेत्रातील घोडबंदर रस्त्यावर सुरु असलेल्या विविध कामांची महापालिका आयुक्तांनी संयुक्त पाहणी केली. सद्यस्थितीत सुरु असलेली कामे ३० मेपर्यंत पूर्ण करुन रस्ता वाहतुकीसाठी सुरळीत करण्याचे निर्देश आयुक्त सौरभ राव यांनी महापालिका, पीडब्ल्यूडी, मेट्रो, एमएमआरडीए, आदि यंत्रणांना दिले.
पूर्व द्रुतगती महामार्ग, कापुरबावडी जंक्शन, सेवा रस्ता आणि गायमुख घाट परिसरातील कामांची पावसाळ्याच्या पार्श्वभूमीवर २८ एप्रिल रोजी पाहणी करण्यात आली. यावेळी संबंधित विभागांचे वरिष्ठ अधिकारी उपस्थित होते. वाहतुकीत अडथळा निर्माण होऊ नये यासाठी आयुक्त सौरभ राव यांनी अधिकाऱ्यांसह परिवहन सेवेच्या बसमधून पाहणी दौरा केला.
या पाहणीत कापुरबावडी जंक्शन, वर्तकनगर, चितळसर पोलीस स्टेशन परिसर, मानपाडा ब्रिज, ब्रह्मांड चौक, डोंगरपाडा, आनंदनगर जंक्शन, कासारवडवली, ओवळा चौक, गायमुख चौपाटी ते गायमुख जकात नाका आणि गायमुख घाट या ठिकाणांचा समावेश होता. गायमुख चौपाटीसमोरील रस्त्याच्या साईड शोल्डरचे तातडीने काँक्रीटीकरण करण्याच्या सूचना देण्यात आल्या.
अमृत जलवाहिनी, मेट्रो पिलरखालील काँक्रीटीकरण, सर्व्हिस रोड मर्जिंग, पेव्हर ब्लॉक, स्लिप रोड दुरुस्ती, चौकांचे काँक्रीटीकरण, विद्युत पोल शिािंपटग आणि पाईपलाईन स्थलांतर यासारख्या कामांचा आढावा घेऊन अपूर्ण कामे तातडीने पूर्ण करण्याचे आदेश देण्यात आले.
गायमुख ते कापुरबावडी मार्गावरील नागलाबंदर, आनंदनगर चौक, वावचळ ब्रिज, कासारवडवली, गवळीपाडा मेट्रो स्टेशन परिसरात मर्जिंग, रस्ते दुरुस्ती आणि पुलांची पाहणी करण्यात आली. मर्जिंगमध्ये अडथळा ठरणाऱ्या पाणी पाईपलाईन आणि विद्युत पोल तातडीने स्थलांतरीत करण्याच्या सूचना देण्यात आल्या. वीजपुरवठा खंडीत होण्याच्या तक्रारींच्या पार्श्वभूमीवर महावितरण अधिकाऱ्यांची बैठक घेण्याचे निर्देश दिले. तसेच फुटपाथवरील अतिक्रमणे हटवण्याचे आदेश देण्यात आले.
दरम्यान, घोडबंदर रोड विलीनीकरण झालेल्या रस्त्यांवर आयलँड, बसबे, रिक्षा स्टॅण्ड तयार करण्याचे नियोजन करण्याच्या सूचना दिल्या. तसेच पार्किंग, नो-पार्किंग आदि दिशादर्शक फलक लावण्यात यावे. घोडबंदर रस्त्यावरील मुख्य नाला कलव्हर्ट, गटारे पावसाळ्यापूर्वी पूर्ण साफ करण्यात यावी. पावसाळ्यात गटारे, नाल्यामुळे रस्तयावर पाणी येणार नाही या दृष्टीने कलर्व्हटचे डीप क्लिनींगचे करण्यात यावे. पावसाळ्यात पाण्याचा प्रवाह अडणार नाही या दृष्टीने काम करण्याच्या सूचनाही आयुक्तांनी यावेळी दिल्या.
दरवर्षी खड्डे पडणाऱ्या ठिकाणांवर पूर्वतयारी केली जाणार असून कामे लवकर पूर्ण होतील. वाहतूक कोंडी टाळण्यासाठी सर्व यंत्रणा प्रयत्नशील असून नागरिकांनी वाहतूक नियमांचे पालन करावे.
-सौरभ राव, आयुक्त-ठाणे महापालिका.
