परिवहन विभागाकडून लवकरच विद्यार्थी स्कुल व्हॅन नियमावली
मुंबई : विद्यार्थ्यांच्या सुरक्षित वाहतुकीसह रोजगाराच्या संधीसाठी परिवहन विभागाकडून स्कुल व्हॅन नियमावली आणण्यात येत आहे. सदर नियमावली अंतिम करुन याबाबत तातडीने अधिसूचना जारी करावी, असे निर्देश परिवहन मंत्री प्रताप सरनाईक यांनी दिले आहेत.
परिवहन आयुक्त कार्यालयात आयोजित बैठकीत स्कुल व्हॅन बाबत सादरीकरण करण्यात आले. त्यावेळी ना. सरनाईक बोलत होते. सदर बैठकीस परिवहन आयुक्त विवेक भीमनवार, सहसचिव राजेंद्र होळकर, अपर परिवहन आयुक्त भरत कळसकार, सह-परिवहन आयुक्त जयंत पाटील, आदि उपस्थित होते. सेवानिवृत्त अतिरिक्त परिवहन आयुक्त जितेंद्र पाटील यांनी सादरीकरण केले.
अत्याधुनिक सुरक्षा आणि सुविधांनी युक्त असलेली अधिकृत स्कुल व्हॅन विद्यार्थ्यांना उपलब्ध होण्यासाठी आधीच्या नियमात बदल करण्यात येऊन नियमावली सुटसुटीत करावी. स्कुल व्हॅनचे भाडे मासिक तत्वावर आणि वर्षाच्या १० महिने कालावधीपर्यंतच घेण्याबाबत बंधन असावे.
नियमावलीमध्ये परिवहन समित्यांचे सक्षमीकरण, महिन्यातून एकदा समितीची बैठक होणे, प्रत्येक शाळेने विद्यार्थ्यांच्या सुरक्षिततेसाठी नोडल अधिकारी नेमणे अंतर्भूत असावे, असे निर्देश ना. प्रताप सरनाईक यांनी बैठकीत दिले.
देशात सुरक्षित विद्यार्थी वाहतुकीसाठी केंद्र सरकारने स्कुल बस नियमावलीचा (ऑटोमोटिव्ह इंडस्ट्री स्टँडर्डस् अर्थात एआयएस-०६३) आधार घेऊन अद्यावत मानके अर्थात स्कुल व्हॅन नियमावली (एआयएस-२०४) तयार केली आहे. चारचाकी १२ अधिक १ आसनापर्यँत विद्यार्थी वाहतूक करण्यासाठी वाहनाला शालेय व्हॅनचा दर्जा देण्यात येणार आहे. वाहने बीएस-६ या श्रेणीतील असतील.
