ठाणे मधील नववर्ष स्वागतयात्रेत ‘ठाणे जिल्हा परिषद'च्या चित्ररथास उत्स्फूर्त प्रतिसाद
ठाणे : श्री कौपिनेश्वर सांस्कृतिक न्यास, ठाणे तर्फे गुढीपाडवा निमित्त आयोजित नववर्ष स्वागतयात्रेत पहिल्यांदा ठाणे जिल्हा परिषद मार्फत चित्ररथ सादरीकरण करुन सहभाग नोंदवला गेला. ‘ठाणे जिल्हा परिषद'चे मुख्य कार्यकारी अधिकारी रोहन घुगे यांच्या मार्गदर्शनाने या स्वागतयात्रेत ‘ठाणे जिल्हा परिषद' तर्फे राबविण्यात येणाऱ्या विविध योजनांची माहिती सादर करणारा चित्ररथ तयार करण्यात आला होता. नागरिकांनी या चित्ररथास उत्स्फूर्त प्रतिसाद दिला.
श्री कौपिनेश्वर सांस्कृतिक न्यास, ठाणे तर्फे काढण्यात येणाऱ्या स्वागतयात्रेचे यंदा २५वे वर्ष असल्यामुळे ‘संस्कृतीचा महाकुंभ' यंदाच्या यात्रेत पाहण्यास मिळाला. या शोभायात्रेत विविध संस्था, महाविद्यालये तसेच शाळांसह ठाणे जिल्हा परिषदेचा सहभाग होता. ५० टक्के अनुदानावर संकरीत गायींचे / म्हशींचे वाटप, अनु.जाती/अनु.जमाती/दारिद्रय रेषेखालील बाळंत महिलेला बुडीत मजुरी, डॉ. बाबासाहेब आंबेडकर कृषि स्वावलंबन योजना/बिरसा मुंडा कृषि क्रांती योजना, गरोदर स्तनदा मातांना अतिरिक्त आहार अंतर्गत (बाळंतविडा), कुपोषित मुलांना-गरोदर स्तनदा मातांना विशेष आहार, उच्च आणि तांत्रिक शिक्षणासाठी दिव्यांग विद्यार्थ्यांसाठी विशेष शिष्यवृत्ती, प्रधानमंत्री आवाज योजना-ग्रामीण अशा विविध योजनाबद्दल सविस्तर माहिती चित्ररथातून देण्यात आली. स्वागतयात्रेत चित्ररथावरील योजनाचे सादरीकरण चलचित्रामार्फत (व्हिडीओ) करण्यात आले.
नववर्ष स्वागतयात्रेत ठाणे जिल्हा परिषद तर्फे नागरिकांच्या सर्वांगीण विकासासाठी राबविण्यात येणाऱ्या योजनांची माहिती नागरिकांपर्यंत पोहचवण्यासाठी ठाणे जिल्हा परिषदेचा सहभाग महत्त्वाचा होता. चित्ररथाला नागरिकांनी देखील उत्तम प्रतिसाद दिल्याने ठाणे जिल्ह्यात चित्ररथाची चर्चा सर्वत्र सुरू आहे, अशी माहिती ‘ठाणे जिल्हा परिषद'चेउप मुख्य कार्यकारी अधिकारी (साप्र) अविनाश फडतरे यांनी दिली. यावेळी ‘ठाणे जिल्हा परिषद'च्या जनसंपर्क अधिकारी रेश्मा आरोटे तसेच ठाणे जिल्हा परिषद अधिकारी-कर्मचारी उपस्थित होते.
