‘नमुंमपा'कडून ७ महिन्यात ५०० कोटींचा मालमत्ताकर वसूल
नवी मुंबई : नवी मुंबई महापालिका मालमत्ता कर विभागाने आर्थिक वर्ष २०२५-२६ च्या एप्रिल ते ऑक्टोबर या पहिल्या सात महिन्यांत तब्बल ५०० कोटींपेक्षा अधिक कर संकलन करुन लक्षणीय कामगिरी केली आहे. कर संकलनातील सदरची झेप लोकाभिमुख उपक्रम, डिजीटल पेमेंटस्‌ला दिलेले प्रोत्साहन तसेच करदात्यांमध्ये जागरुकता निर्माण करण्यासाठी राबविण्यात आलेल्या विविध जनजागृती मोहिमांमुळे तसेच नागरिकांच्या सहकार्यामुळे शक्य झाले असल्याचे महापालिका आयुक्त डॉ. कैलास शिंदे सांगितले आहे. नवी मुंबई महापालिका पारदर्शक आणि कार्यक्षम कारभारासाठी कटीबध्द असून, या उत्पन्नाचा उपयोग शहराच्या विकास कामांसाठी केला जाणार आहे असे सांगतानाच आयुक्त डॉ. शिंदे यांनी करदात्या नागरिकांचे आभार मानले आहेत.
मालमत्ताकर विभागाच्या या यशामागे नागरिकांचा सहभागासोबतच तंत्रज्ञानाचा प्रभावी वापर आणि नियोजनबध्द धोरणे महत्त्वाची ठरली असून या उपाययोजनांना नागरिकांचा चांगला प्रतिसाद मिळाला असल्याचे अतिरिक्त आयुक्त सुनिल पवार आणि डॉ.राहुल गेठे यांनी सांगितले. उर्वरित ५ महिन्याच्या कालावधीमध्ये कर वसूलीचे निश्चित केलेले उद्दिष्ट पूर्ण करण्यासाठी योग्य नियोजन करुन त्याची प्रभावी अंमलबजावणी करण्यात येईल, असे मालमत्ताकर विभागाचे उपायुक्त डॉ. अमोल पालवे यांनी सांगितले.
कर संकलनाच्या वाढीसाठी नाविन्यपूर्ण उपक्रम...
कर संकलनात वाढ होण्यासाठी ‘नमुंमपा'ने यंदा डेटा विश्लेषणावर आधारित नाविन्यपूर्ण पध्दतीने कार्यवाही करण्याचे नियोजन केले होते. त्यानुसार आर्थिक वर्ष २०२५-२६ मध्ये करसंकलनात वाढ साध्य करण्यासाठी डेटा विश्लेषण, मालमत्ताधारकांची माहिती अद्ययावत करणे आणि जनजागृती मोहिमा राबविण्यात आल्या. या अंतर्गत माहितीचे सखोल विश्लेषण, कर संकलन मोहिमेचे धोरणात्मक नियोजन आणि माहिती संकलनासाठी विकसित केलेले मोबाईल ॲप्लिकेशन अशा सर्व घटकांच्या माध्यमातून करसंकलनात लक्षणीय वाढ झाली. याचा परिणाम म्हणजे आत्तापर्यंतच्या इतिहासात पहिल्यांदाच एका आर्थिक वर्षातील पहिल्या ७ महिन्यांत ५०० कोटी रुपयांपेक्षा जास्त कर संकलन झाले आहे, असे मालमत्ताकर विभागाने स्पष्ट केले.
ऑनलाईन कर भरण्यास प्राधान्य...
नागरिकांना घरबसल्या मालमत्ता कर भरण्याची सुविधा उपलब्ध करून देण्यासाठी विभागाने डिजिटल पेमेंट पध्दतींचा प्रचार आणि प्रसार अधिक प्रभावीपणे केला. व्हॉटस्‌ॲप चॅटबॉट (८२९१९२०५०४), श्ब् ऱ्श्श्ण् - माझी नवी मुंबई ॲप, महापालिकेची www.nmmc.gov.in अधिकृत वेबसाईट, कर देयकांवरील क्यूआर कोड स्कॅनिंग तसेच विविध युपीआय माध्यमांद्वारे पेमेंट करण्याची सुविधा यांसारख्या ऑनलाईन पर्यायांचा नागरिकांनी मोठ्या प्रमाणावर वापर केला. ऑनलाईन करभरणा माध्यमातून ३१३ कोटी ७० लास्रुपये इतक्या मोठ्या प्रमाणात कर संकलन झाले.
आगामी काळात थकबाकीदारांना मालमत्ताकर भरण्याच्या प्रवाहामध्ये आणण्यासाठी महापालिकेने आता मालमत्ता जप्तीची मोहीम हाती घेतली आहे. त्यानुसार थकबाकीदारांनी मालमत्ता कर भरुन थकबाकीची कटू कारवाई टाळावी, असे आवाहन महापालिका मार्फत करण्यात आले आहे.
असा वसूल झाला मालमत्ता करः
‘नमुंमपा'च्या ८ विभागांतील १ लाख ६३ हजार २३ मालमत्ताधारकांकडून ५०० कोटी ११ लाख रुपयांचे कर संकलन झाले.
सर्वात जास्त मालमत्ता कर नेरुळ विभागातून जमा -१०६ कोटी ७९ लाख रुपये
ऑनलाईन माध्यमांतून कर संकलन - ३१३ कोटी ७० लाख रुपये
ऑफलाईन माध्यमातून कर संकलन -१८६ कोटी ४१ लाख रुपये
मालमत्ता प्रकारानुसार झालेले कर संकलनः
निवासी मालमत्ता - ३५ टक्के
अनिवासी-व्यावसायिक मालमत्ता - २३.८४ टक्के
औद्योगिक मालमत्ता - ३२.४५ टक्के
मिश्र, इतर मालमत्ता - ८.७१ टक्के
नवी मुंबई महापालिकेचे उद्दिष्ट केवळ कर संकलनात वाढ करणे नाही, तर नागरिकांना तंत्रज्ञानाच्या माध्यमातून अधिक सोयीस्कर आणि सुलभ सेवा उपलब्ध करुन देणे आहे. भविष्यात स्मार्ट सिटी संकल्पनेशी सुसंगत असे अधिक डिजीटल उपक्रम राबविण्याचे नियोजन केले असून ज्यायोगे नागरिकांचा वेळ वाचेल आणि कामकाज अधिक पारदर्शक बनेल. कर संकलनातील यश केवळ महापालिकेचे नाही, तर प्रत्येक जबाबदार करदात्याचे आहे. नागरिकांनी वेळेवर कर भरुन दाखवलेली जबाबदारीची जाणीव आणि विश्वास समाधानकारक असून शहर विकासाला हातभार लावणारा आहे.
- डॉ.कैलास शिंदे, आयुवत-नवी मुंबई महापालिका.
