सार्वजनिक गणेशोत्सव स्पर्धेत धामणकर नाका मंडळ प्रथम
भिवंडी : गणेशोत्सव साजरा करताना त्याचे पावित्र्य राखण्याची जबाबदारी सर्वांची आहे. जेथे शांतता नांदत असते तेथे प्रगती आणि विकास होत असतो. त्यामुळे सर्वांनी एकत्र येऊन सामाजिक एकतेच्या भावनेतून सण साजरा करणे आवश्यक आहे. उत्सव साजरा करताना शासन आणि पोलिसांनी दिलेल्या सूचनांचे तसेच कायद्याचे पालन करावे, असे असे प्रतिपादन ‘ठाणे'चे अतिरिक्त पोलीस आयुक्त विनायक देशमुख यांनी केले.
भिवंडी येथे ‘ठाणे पोलीस आयुक्तालय'तर्फे आयोजित ‘सार्वजनिक गणेशोत्सव-२०२४' स्पर्धेच्या पारितोषिक वितरण सोहळ्यात अतिरिवत पोलीस आयुवत देशमुख बोलत होते. याप्रसंगी पोलीस उपायुक्त शशिकांत बारोटे, सहाय्यक पोलीस आयुक्त सचिन सांगळे, गणेश महामंडळ अध्यक्ष मदन भोई तसेच भिवंडी परिमंडळातील सर्व वरिष्ठ पोलीस निरीक्षक, गणेशोत्सव मंडळांचे पदाधिकारी, नागरिक मोठ्या संख्येने उपस्थित होते.
ठाणे पोलीस आयुक्तालय अंतर्गत पोलीस परिमंडळ-२ भिवंडी यांच्या वतीने ‘गणेशोत्सव-२०२४'मध्ये राष्ट्रीय एकात्मता, जातीय सलोखा, शांतता राखून आणि शिस्तबध्द पध्दतीने संपन्न केलेल्या गणेशोत्सव मंडळांचा गौरव समारंभ भिवंडी शहरातील अंजुरफाटा येथील ओसवाल हायस्कूल सभागृहात आयोजित करण्यात आला होता. या स्पर्धेत प्रथम क्रमांक ‘धामणकर नाका सार्वजनिक गणेशोत्सव मंडळ'ने पटकावला असून ‘मंडळ'चे अध्यक्ष संतोष शेट्टी, दिलीप पोद्दार, हसमुख पटेल, राजेश शेट्टी, मोहन बल्लेवार, तारु जाधव, संजय शाह, ईश्वर पामु, रमेश पुजारी, प्रशांत पुजारी, महेश कापरे, संतोष जंपाल, राम बुरा यांनी सदर पुरस्कार स्वीकारला. यासह द्वितीय क्रमांक बाळ गोपाळ मित्र मंडळ (साई प्रसन्न सोसायटी) आणि स्वामी समर्थ गणेशोत्सव मंडळ, तृतीय क्रमांक रामेश्वर मित्र मंडळ आणि गणेश मित्र मंडळ यांना, स्व. पंडित नाना मित्र मंडळ (विशेष उल्लेखनीय पारितोषिक) तर शिवशक्ती मित्र मंडळ, संयुक्त मित्र मंडळ, भावना ऋषी बाळ गोपाळ मित्र मंडळ, जय भारत मित्र मंडळ या गणेशोत्सव मंडळांना विशेष पारितोषिक देऊन सन्मानित करण्यात आले.
पाच दिवसीय सार्वजनिक गणेशोत्सव मंडळ असलेले मुरलीधर मंदिर गणेशोत्सव मंडळ, संत नामदेव गणेश उत्सव मंडळ, गणपती मंदिर उत्सव मंडळ आदि मंडळांना सुध्दा सन्मानचिन्ह, प्रमाणपत्र देऊन गौरविण्यात आले. दरम्यान, गणेशोत्सव सण येत्या काही दिवसांवर येऊन ठेपला आहे. मात्र, आजही रस्त्यांची खड्ड्यांमुळे दुरवस्था झाली आहे. सर्वत्र अस्वच्छता आहे, विसर्जन स्थळ दुरुस्त करावेत, आदि विविध मागण्या गणेश महामंडळाचे अध्यक्ष मदन भोई यांनी केल्या.
सदर कार्यक्रमाचे प्रास्ताविक पोलीस उपायुक्त शशिकांत बोराटे यांनी केले. तर आभार प्रदर्शन सहाय्यक पोलीस आयुक्त सचिन सांगळे यांनी केले. कार्यक्रमात सूत्रसंचालन शैलेश मांजरेकर यांनी केले.
