‘मिशन १०० दिवस' प्राथमिक फेरीत ठामपा प्रथम
ठाणे : ठाणे महापालिका कडून नागरिकांना दिल्या जाणाऱ्या सोयी-सुविधांबद्दल नागरिकांचा दृष्टीकोन अधिकाधिक सकारात्मक होईल या दृष्टीने ‘मिशन शंभर दिवस' या उपक्रमांतर्गत सर्व विभागांनी काम करावे. नागरिकांच्या कामाला लागणाऱ्या वेळेत बचत होईल यादृष्टीने नियोजन केले जावे, असे प्रतिपादन महापालिका आयुक्त सौरभ राव यांनी विभाग प्रमुखांच्या बैठकीत केले.
प्राथमिक मुल्यांकनातील आपल्या कामगिरीमुळे ठाणे महापालिकेवरील जबाबदारी आणखी वाढली आहे. त्यामुळे सर्व विभागांनी समन्वय साधून वेळखाऊ प्रक्रिया सोप्या कशा करता येतील, नागरिकांच्या प्रतिसादासाठी कोणती व्यापक पावले उचलता येतील याचा विचार करावा, असेही आयुक्त राव यांनी स्पष्ट केले. मुख्यमंत्री देवेंद्र फडणवीस यांच्या संकल्पनेतून आकाराला आलेल्या ‘मिशन शंभर दिवस' या उपक्रमाच्या प्राथमिक मुल्यमापन फेरीत ठाणे महापालिकेत पहिला क्रमांक मिळाला आहे. अंतिम मुल्यमापन १७ ते २८ एप्रिल या काळात होणार आहे.
ठाणे महापालिकेच्या सर्व वरिष्ठ अधिकाऱ्यांची तसेच विभाग प्रमुखांची आढावा बैठक १७ मार्च रोजी कै. अरविंद पेंडसे सभागृहात झाली. आयुक्त सौरभ राव यांच्या अध्यक्षतेखाली झालेल्या सदर बैठकीस अतिरिक्त आयुक्त प्रशांत रोडे, नगर अभियंता प्रशांत सोनाग्रा, यांच्यासह सर्व उपायुक्त, सहाय्यक आयुक्त तसेच वरिष्ठ अधिकारी उपस्थित होते. उपायुक्त (मुख्यालय) जी. जी. गोदेपुरे यांनी विविध विभागांच्या विषयांचा आढावा घेणारे सादरीकरण यावेळी केले.
संकेतस्थळ, सुकर जीवनमान, स्वच्छता, नागरी तक्रार निवारण, कार्यालयीन सोयीसुविधा, क्षेत्रीय कार्यालयांना भेटी, ई-ऑफिस प्रणाली, उद्योगांना गुंतवणुकीस प्रोत्साहन, प्रशिक्षण, कृत्रिम बुध्दीमत्तेचा वापर आणि नाविन्यपूर्ण उपक्रम या गोष्टींवर महापालिकेच्या सर्व विभाग प्रमुखांनी लक्ष द्यावे. तसेच सदर मुल्यांकनाचे जास्तीत जास्त गुण आपल्याला मिळतील या दृष्टीने कार्यवाही करावी, असेही आयुक्त राव यांनी या बैठकीत स्पष्ट केले.
दरम्यान, वागळे इस्टेट येथील सीपी टँकमध्ये साठलेल्या कचऱ्याचे आतकोली येथील क्षेपणभूमीवर हस्तांतरण करण्याची प्रक्रिया वेगाने सुरु आहे. त्यामुळे शहरातील कचरा संकलनही नियमित होईल. कचरा हलविण्याबाबत तसेच शहर स्वच्छतेबाबत उपमुख्यमंत्री एकनाथ शिंदे यांनी स्पष्ट निर्देश दिले असून त्याची काटेकोर अंमलबजावणी महापालिका प्रशासन करीत असल्याचेही आयुक्त राव यांनी बैठकीत सांगितले. बैठकीत आयुक्त राव यांनी विविध विभागांच्या महसुलाच्या वसुलीचा आढावाही घेतला. मार्चअखेर पर्यंतचा कालावधी उपयोगात आणून सर्व विभागांनी त्यांच्या वसुलीचे १०० टक्के उद्दिष्ट पूर्ण करावे, असेही आयुक्त राव म्हणाले.
शिक्षण विभागाच्या विशेषांकाचे प्रकाशन...
ठाणे महापालिका शिक्षण विभागाने वर्षभरात केलेल्या कामगिरीचा तसेच सांस्कृतिक आणि क्रीडा महोत्सवाचा आढावा घेणाऱ्या विशेषांकाचे प्रकाशन सदर बैठकीत आयुक्त सौरभ राव यांनी केले. उपायुक्त (शिक्षण) सचिन सांगळे यांनी सदर विशेषांक आयुक्त राव यांच्याकडे सुपूर्द केला.
