महापालिका क्षेत्रात या वर्षापासून ५ सेमी- इंग्लिश स्कुल -आयुक्त गोयल
कल्याण : कल्याण-डेांबिवली महापालिका क्षेत्रात ५ सेमी इंग्लिश स्कुल या वर्षापासून सुरु करणार, अशी माहिती महापालिका आयुक्त अभिनव गोयल यांनी पत्रकार परिषद मध्ये दिली.
शालेय वर्ष २०२५-२६ चे नियोजन...
गुणवत्तापूर्ण शिक्षणासाठी महापालिकेच्या प्रत्येक शाळेसाठी एका अधिकाऱ्यास पालक अधिकारी म्हणून जबाबदारी देण्यात आली आहे. या अधिकाऱ्यांकडून शाळा सुरू होण्याच्या दिवशीच प्रत्यक्ष भेट घेऊन पाहणी केली जाईल. शाळांमधील आनंददायी वातावरणासाठी महापालिकेच्या शाळांमध्ये बाला पध्दतीचे भित्तीचित्रांचे काम सुरु करण्यात आले आहे. त्याचप्रमाणे शाळांची दुरुस्ती, रंगरंगोटी तसेच फर्निचर देखील पुरविण्यात येणार आहे. पाठ्यपुस्तके आणि वह्या पहिल्या आठवड्यात वितरीत करण्यात येतील. त्याचप्रमाणे दप्तर, मोजे, बुट देखील देण्यात येणार आहेत.
गुणवत्ता पुर्ण शिक्षणासाठी निपूण अंतर्गत र्प्राथमिक शिक्षणावर भर दिला जाणार आहे. शैक्षणिक गुणवत्तेचे डिजीटल मॉनिटरिंग विनोबा भावे ॲप द्वारे करण्यात येणार आहे.संबंधित पालक अधिकाऱ्यांना नेमून दिलेल्या शाळेला नियमितपणे भेट देऊन प्रगतीचा आढावा घेण्याच्या सूचना देण्यात आलेल्या आहेत. त्याचप्रमाणे शिक्षकांसोबत आढावा बैठकांचे नियोजन करण्यात आले आहे.
पावसाळी आपत्कालीन तयारी...
महापालिका मुख्यालयात २४ े७ आपत्कालीन नियंत्रण कक्ष स्थापन करण्यात आला असून, तिथे रात्रपाळीची जबाबदारी उपायुक्त दर्जाच्या अधिकाऱ्यांना देण्यात आली आहे. सर्व प्रभाग कार्यालयांमध्येही आपत्कालीन कक्ष कार्यरत करण्यात आलेले आहेत.
प्रत्येक प्रभागामध्ये स्वतंत्र आपत्कालीन पथक नियुक्त केले गेले असून, यामध्ये प्रभाग अधिकाऱ्यांसह इतर विभागांच्या अधिकाऱ्यांना देखील जबाबदारी देण्यात आलेली आहे. त्यामुळे सर्व अधिकाऱ्यांच्या समन्वयाने आपत्कालीन परिस्थितीत लवकर प्रतिसाद देणे, सुलभ होणार आहे. पावसाळ्यात उद्‌भवणाऱ्या आपत्कालीन परिस्थितीचा सामना करण्यासाठी एनडीआरएफ टीम महापालिका क्षेत्रात दाखल झाली असून, त्यांच्या स्तरावर देखील जनजागृती केली जाणार आहे. पावसाळी आपत्कालीन परिस्थितीत आपत्तीला तोंड देण्यासाठी महापालिका सज्ज असल्याची माहिती आयुक्त गोयल यांनी यावेळी दिली.
पारदर्शक भरती प्रक्रिया...
महापालिकेमध्ये ४९० पदांची भरती होणार असून, भरती प्रक्रियेबाबत सर्व माहिती महापालिकेच्या संकेतस्थळावर उपलब्ध आहे. कुठल्याही समस्येसाठी हेल्पलाईन नंबर ०२५१-२३०३०६० यावर संपर्क साधावा. भरती प्रक्रिया पूर्णपणे ऑनलाईन आधारित आणि टीसीएच्या माध्यमातून घेतली जाणारी परीक्षा असेल. फक्त महापालिकेच्या अधिकृत संकेतस्थळावरूनच माहिती उपलब्ध करून घ्यावी. त्यामुळे नागरिकांनी कुठल्याही आमिषाला बळी पडू नये, असे आवाहन आयुक्तांनी यावेळी केले.
कोव्हीड प्रतिबंधात्मक तयारी...
कोव्हीडच्या पार्श्वभूमीवर ‘केडीएमसी'ने बाई रुक्मीणीबाई रुग्णालयात एकूण १० बेडस्‌चे आणि शास्त्रीनगर रुग्णालयात एकूण ५ बेडस्‌चे विलगीकरण कक्ष तयार केले आहे. महापालिकेकडे आरटीपीसीआर, ॲन्टीजेन चाचणीसाठी किटस्‌ उपलब्ध असून, नागरिकांनी खबरदारी घ्यावी. कोणत्याही लक्षणांची शंका असल्यास घाबरुन न जाता नजिकच्या महापालिका आरोग्य केंद्राशी संपर्क साधावा, असेही आवाहनही आयुक्तांनी केले.
