ठाणे, नवी मुंबईतील रेल्वे स्थानकांमध्ये तात्काळ सुविधा पुरवा
खा. नरेश म्हस्के यांची रेल्वे अधिकाऱ्यांसमवेत बैठक
नवी मुंबई : ठाणे आणि नवी मुंबई विभागीय रेल्वे प्रवाशांच्या समस्या आणि मागण्यांसंदर्भात खासदार नरेश म्हस्के यांनी ‘मध्य रेल्वेे'चे विभागीय व्यवस्थापक हिरेश मीना यांची २३ एप्रिल रोजी भेट घेऊन त्यांना निवेदन दिले. यावेळी झालेल्या बैठकीत नवी मुंबईतील स्थानके आणि ठाणे रेल्वे स्टेशनवरील विविध समस्यांवर चर्चा करण्यात आली. रेल्वे महाव्यवस्थापकांनी सदर समस्यांवर तोडगा काढण्याचे तसेच लवकरच स्थानकांचा पाहणी दौरा करणार असल्याचे आश्वासन दिले.
सदर बैठकीला जिल्हाप्रमुख द्वारकानाथ भोईर, माजी नगरसेवक रमाकांत म्हात्रे, शिवराम पाटील, माजी नगरसेवक विजयानंद माने, शहर संघटक नंदा काटे, बाळा गवस, जयेश जाधव, अजित दुबे (रेल्वे कमिटी सदस्य) आदि उपस्थित होते.
ठाणे रेल्वे स्थानकातील समस्यांसंदर्भात यावेळी चर्चा करण्यात आली. वर्तकनगर येथील आरक्षण खिडकी लवकरात लवकर सुरु करण्याबाबत खासदार नरेश म्हस्के यांनी सूचना केली.
नवी मुंबई शहारातील रेल्वे स्थानकांतील विविध समस्यांबाबत चर्चा करण्यात आली. सदर बैठकीमध्ये दिघा, भोलानगर, अनंत नगर रेल्वे खालून गणपती पाडा येथे राहणाऱ्या रहिवाशांना जाण्या-येण्याकरिता अंडरपास बनवण्यासंदर्भात चर्चा करण्यात आली. दिघा येथे असलेले पाण्याचे धरण नवी मुंबई महापालिकेला हस्तांतरीत करण्यासंदर्भात चर्चा करण्यात आली. दिघा धरण हस्तांतरीत झाल्यास दिघा येथील पाणी समस्या दूर होण्यास मदत होईल, असे खासदार म्हस्के यांनी रेल्वे अधिकाऱ्यांच्या निदर्शनास आणून दिले.
सर्व रेल्वे स्थानकांमधील शेड पत्रे, पंखे, लाईट, ध्वनिक्षेपक दुरुस्ती करणे तसेच बाहेरील पेव्हर ब्लॉक दुरुस्त करणे, स्थानका बाहेरचा परिसर स्वच्छ करणे, रेल्वे स्थानकांमध्ये पिण्याच्या पाण्याचे कुलर बसविणे, दिघा ते तुर्भे स्थानकाबाहेर बुट पॉलीश धारकांना जागा देणे, काही स्थानकांमध्ये उंचीच्या अनुषंगातून सरकते जिने बसविणे, ऐरोली स्थानकामध्ये आरक्षण खिडकी सुरु करणे, बहुमजली पार्किंग, कोपरखैरणे स्थानकाबाहेरील पार्किंग सुस्थितीत करणे, रात्रीची गस्त वाढविणे, रबाले स्थानक पश्चिमेकडील तिकीट खिडकी रात्री ११ वाजेपर्यंत चालू ठेवणे, सानपाडा-जुईनगर रेल्वे पुलाचे थांबलेले काम लवकर सुरु करणे अशा अनेक प्रलंबित समस्यांसंदर्भात डीआरएम हरेश मिना यांचीशी चर्चा करुन या समस्यांबाबत लवकरात लवकर निर्णय घ्यावा आणि त्यानुसार कार्यवाही करावी, अशी सूचना खासदार नरेश म्हस्के यांनी केली.
लवकरच नवी मुंबई शहरातील रेल्वे स्थानकांचा पाहणी दौरा ‘मध्य रेल्वेे'च्या डीआरएम यांच्यासमवेत आयोजित करण्यात येणार आहे. सिडको कडील रेल्वे स्टेशनच्या समस्या, नवी मुंबई मधील रेल्वे स्टेशन हस्तांतरीत करण्यासंदर्भात सिडको अधिकाऱ्यांशी चर्चा करुन लवकरच निर्णय घेण्यात येईल.
-खासदार नरेश म्हस्के, ठाणे.
