मराठी भाषा गौरव दिन उत्साहात साजरा
पनवेल : ज्ञानपीठ पुरस्कार विजेते मराठीतील प्रसिध्द कवी, नाटककार कुसुमाग्रज यांचा जन्मदिवस म्हणजे मराठी भाषा गौरव दिन. या निमित्ताने पनवेल महापालिका तर्फे प्रा. विसुभाऊ बापट यांच्या ‘कुटुंब रंगलय काव्यात' या कार्यक्रमाचे २७ फेब्रुवारी रोजी आद्य क्रांतिवीर वासुदेव बळवंत फडके नाट्यगृहात आयोजन करण्यात आले. महापालिका आयुवत मंगेश चितळे यांच्या मार्गदर्शनाखाली झालेल्या या कार्यक्रमावेळी माझी वसुंधरा अंतर्गत पर्यावरणपूरक गणपती उत्सव स्पर्धेतील विजेत्यांना पारितोषिक वितरण करण्यात आले.
याप्रसंगी आमदार प्रशांत ठाकूर, आमदार विक्रांत पाटील, महापालिका उपायुक्त कैलास गावडे, डॉ. वैभव विधाते, सहाय्यक आयुक्त डॉ. रुपाली माने उपस्थित होते.
कवी कुसुमाग्रजांनी आपल्या कवितेच्या माध्यमातून महाराष्ट्राचे नाव भारतभर पसरविले. त्यांच्या कवितेतून स्फुर्ती घेऊन आपण पुढे पाऊल टाकत राहू. पनवेल महापालिकेला माझी वसुंधरा स्पर्धेत प्रथम क्रमांक मिळाला असून सदरचा गौरव मिळवून देण्यासाठी ज्यांनी ज्यांनी प्रयत्न केले, त्यांचा महापालिका सन्मान करत आहे. पनवेल शहराला अधिक सुंदर बनविण्यामध्ये या सर्वांचा हातभार असल्याने त्यांच्या सत्कार करणे, अभिनंदनीय बाब आहे, असे आ. प्रशांत ठाकूर म्हणाले.
यावेळी पनवेल महापालिकेच्या वतीने मराठी भाषा संवर्धन पंधरवडा अंतर्गत घेण्यात आलेल्या काव्य वाचन स्पर्धेतील विजेत्यांना उपस्थित मान्यवरांच्या हस्ते बक्षीस वितरण करण्यात आले. तसेच माझी वसुंधरा अंतर्गत पर्यावरणपूरक गणेशोत्सव स्पर्धा अंतर्गत वैयक्तिक स्तरावरील दीड दिवस, तीन दिवस, पाच दिवस गणेश उत्सव विजेते आणि दहा दिवसांच्या सार्वजनिक गणेशोत्सवामधील विजेत्या मंडळांना पारितोषिकाने गौरविण्यात आले. याशिवाय महापालिकेच्या वतीने गणेशोत्सवादरम्यान कृत्रिम तलावामध्ये गणेश विसर्जन उपक्रमासाठी ज्या ज्या शाळांनी, महाविद्यालयांनी सहकार्य केले त्या शाळांचा, महाविद्यालयांचा देखील सन्मानचिन्ह देऊन गौरव करण्यात आला.
कार्यक्रमाप्रसंगी महापालिका शहर अभियंता संजय कटेकर, मुख्य जनसंपर्क अधिकारी डॉ. राजू पाटोदकर, सामान्य प्रशासन विभाग प्रमुख दशरथ भंडारी, पर्यावरण विभाग प्रमुख मनोज चव्हाण, नाट्यगृह विभाग प्रमुख राजेश डोंगरे, बक्षीस विजेते गणेशोत्सव मंडळांचे प्रतिनिधी, विविध शाळांचे विद्यार्थी, शिक्षक, एनजीओ प्रतिनिधी, सामाजिक संस्थांचे प्रतिनिधी मोठ्या संख्येने उपस्थित होते.
‘कुटुंब रंगलय काव्यात'ला श्रोत्यांचा उदंड प्रतिसाद...
यावेळी सादर झालेल्या प्रा. विसुभाऊ बापट यांच्या ‘कुटुंब रंगलय काव्यात' या कार्यक्रमाला श्रोत्यांचा भरभरुन प्रतिसाद मिळाला. कवितेमधील विविध भावनांचे सादरीकरण यावेळी त्यांनी केले. यामध्ये ‘बाप्पा तुम्ही याहो खूप खूप दिवस रहायला' अशा बालकवितांपासून ते तरुणाईला भुरळ घालणाऱ्या मंगेश पाडगावकरांच्या ‘त्याने प्रेम केले, तुमचे काय गेले' अशा अनेक कविता सादर केल्या. तसेच शायर भाऊसाहेब पाटणकरांच्या ‘सांगेन काही भव्य ऐसी शायरी माझी नव्हे, तो कविचा मान तितुकी पायरी माझी नव्हे' अशा शायरी पासून ते चारोळ्या पर्यंत कवितेच्या अनेक नानाविविध प्रकारांचे प्राध्यापक विसुभाऊ बापट यांनी सादरी करण केले. तसेच कविता सादर करताना कवितेमागील अनेक किस्से, आठवणी विसुभाऊंनी सांगितल्या.
