बोगस डॉक्टरांविरुध्द पनवेल मनपा ॲक्शन मोडवर
पनवेल : पनवेल महापालिका क्षेत्रातील बोगस डॉक्टरांवर कारवाई करण्याकरिता आयुक्त तथा प्रशासक मंगेश चितळे यांच्या मार्गदर्शनाखाली तसेच उपायुक्त डॉ.वैभव विधाते यांच्या सूचनेनुसार वैद्यकीय आरोग्य अधिकारी डॉ. आनंद गोसावी यांच्या अध्यक्षतेखाली ३ जुलै रोजी समाज केंद्र कामोठे येथे खाजगी वैद्यकीय व्यावसायिक म्हणजेच जनरल प्रॅक्टिशनर असोसिएशन यांच्या अध्यक्ष आणि पदाधिकारी यांची बैठक आयोजित करण्यात आली .
सदर बैठकीस पनवेल महापालिका क्षेत्र अंतर्गत खारघर, कामोठे, कळंबोली, खांदा कॉलनी, पनवेल येथील खाजगी वैद्यकीय व्यावसायिक संघटना यांचे अध्यक्ष उपस्थित होते. या बैठकीमध्ये वैद्यकीय आरोग्य अधिकारी डॉ. गोसावी यांनी बोगस डॉक्टरांवर कारवाई करणे आणि बोगस डॉक्टर शोध मोहीम याविषयी शासनाच्या आरोग्यसेवा आयुक्तालय कार्यालयाकडून आलेल्या सुचनेसंबंधी माहिती देण्यात आली.
पनवेल महापालिका क्षेत्रातील बोगस डॉक्टरांवर कारवाई करण्याकरिता महापालिका स्तरावर समिती गठीत करण्यात आली आहे. या ‘समिती'चे अध्यक्ष आयुक्त पनवेल महापालिका आणि सचिव म्हणून वैद्यकीय आरोग्य अधिकारी यांचा समावेश आहे. महापालिका स्तरावरील समिती अंतर्गत प्रभाग निहाय क्षेत्रीय समिती गठीत करण्यात आली असून या ‘समिती'मध्ये प्रभाग अधिकारी, मुख्य स्वच्छता निरीक्षक अणि नागरी प्राथमिक आरोग्य केंद्राचे वैद्यकीय अधिकारी यांचा समावेश आहे. सदर समिती त्या त्या क्षेत्रातील सर्व खाजगी वैद्यकीय व्यावसायिकांच्या दवाखान्यात भेटी देऊन, वैद्यकीय व्यावसायिकांच्या प्रमाणपत्राची तपासणी करणार आहे. तसेच तपासणीचा अहवाल महापालिका स्तरावरील समितीकडे पाठवणार आहेत.
सदर बैठकीस महापालिकेचे वैद्यकीय अधिकारी डॉ. सुरेश पंडीत अणि डॉ. मनीषा चांडक, स्वछता निरीक्षक योगेश कस्तुरे उपस्थित होते.
शासन निर्णय...
बोगस वैद्यकीय व्यावसायिक शोधून काढण्यासाठी शासन निर्णयअन्वये जिल्हास्तरीय, तालुकास्तरीय तसेच नगरपालिका आणि महापालिका स्तरीय समित्या स्थापन करण्याचे आदेश निर्गमित करण्यात आले होते. त्यानुसार स्थापन झालेल्या समित्यांकडून सर्व खाजगी वैद्यकीय व्यावसायिकांच्या दवाखान्यात भेटी देऊन वैद्यकीय व्यावसायिकांच्या प्रमाणपत्राची तपासणी करुन, तपासणीचा अहवाल ‘महापालिका स्तरावरील समिती'कडे पाठवण्याबाबत आदेश देण्यात आले आहेत.
‘महापालिका स्तरावरील समिती'कडे बोगस डॉक्टर आढळून आल्यास क्षेत्रीय समिती संबंधित बोगस डॉक्टर विरुध्द गुन्हा नोंद करणार आहे. पनवेल महापालिका हद्दीतील सर्व खाजगी वैद्यकीय व्यावसायिक यांनी महापालिकेच्या अधिकारी यांना योग्य माहिती देण्यात यावी, असे आवाहन करण्यात येत आहे.
- डॉ. आनंद गोसावी, वैद्यकीय आरोग्य अधिकारी- पनवेल महापालिका.
