१२ कि.मी. समुद्र पोहून शिवरायांना मानाचा मुजरा
डोंबिवली : डोंबिवलीतील मनस्वी संतोष मस्करे या विद्यार्थीनीने एलिफंटा ते गेटवे ऑफ इंडिया असे १२ किलोमीटरचे सागरी अंतर पोहून पार करीत छत्रपती शिवाजी महाराज यांना मानाचा मुजरा केला.
मनस्वी मस्करे हिचा निर्धार आणि जिद्द थक्क करणारी आहे. ओमकार इंटरनॅशनल स्कुलमध्ये इयत्ता सातवीत शिकणारी मनस्वी जलतरण, कराटे आणि फुटबॉलमध्ये अतिशय उत्साही आहे. राज्यस्तरीय सागरी जलतरण स्पर्धा तसेच डी.एस.ओ. शालेय क्रीडा जलतरण स्पर्धेत तिने उल्लेखनीय कामगिरी केली आहे. विशेषतः समुद्रात पोहण्याची तिला प्रचंड आवड आहे. याच जिद्दीच्या जोरावर आणि शिवप्रेमाच्या प्रेरणेने, छत्रपती शिवाजी महाराज यांच्या जयंतीनिमित्त ती एलिफंटा बेट ते गेटवे ऑफ इंडिया असे १२ किलोमीटरचा जलतरण प्रवास पूर्ण करण्याचा संकल्प केला होता. छत्रपती शिवाजी महाराज यांचे पराक्रम, शौर्य आणि स्वाभिमानाचे ज्वलंत प्रतिक आहेत. त्यांच्या थोर गाथेला मानाचा त्रिवार मुजरा करण्याच्या भावनेने मनस्वीने धाडसी निर्णय घेतला. खडतर समुद्रयात्रा, जिद्द, मेहनत आणि शिवगर्जना करीत १७ फेब्रुवारी रोजी पहाटे ४ः३० वाजता मनस्वीने एलिफंटा बेटावरुन समुद्रात उडी घेतली. महाराष्ट्र राज्य हौशी जलतरण संघटनाचे निरीक्षक सुनील मयेकर यांच्या नेतृत्वाखाली तिचा समुद्र प्रवास सुरू झाला.
थंड वारे, समुद्रातील वाढते प्रदुषण, प्रचंड लाटा, मोठमोठ्या बोटी आणि जहाजांची ये-जा या सगळ्या अडथळ्यांमधून मनस्वीने आपल्या जिद्दीच्या बळावर मार्ग काढला. जय भवानी, जय शिवाजी असा जयघोष करीत ती गेटवे ऑफ इंडिया येथे पोहोचली. मनस्वीने गेटवे ऑफ इंडिया येथे छत्रपती शिवाजी महाराजांच्या प्रतिमेस मानाचा मुजरा केला. यावेळी उपस्थित नागरिक, स्विमिंग कोच आणि मार्गदर्शकांनी तिच्या धाडसाचे कौतुक केले. या ऐतिहासिक प्रवासासाठी यश जिमखाना येथे प्रशिक्षक विलास माने आणि रवी नवले यांच्या मार्गदर्शनाखाली मनस्वी मस्करे हिने सराव केला.
