१२८ थकबाकीदारांची मालमत्ता जप्त
नवी मुंबई : नवी मुंबई महापालिकेच्या मालमत्ता कराचा भरणा न करणाऱ्या थकबाकीदारांकडून कर वसुलीसाठी महापालिका आयुक्त डॉ. कैलास शिंदे यांच्यामार्फत बारकाईने लक्ष दिले जात आहे. त्याअनुषंगाने या थकबाकीदारांना थकीत कराचा भरणा करण्यासाठी नोटिसा बजावण्यात आल्या आहेत. पण, महापालिकेच्या नोटिसीला प्रतिसाद न देणाऱ्या १२८ थकबाकीदारांवर मालमत्ता जप्तीची कारवाई करण्यात आली आहे. यामधील ३० थकबाकीदारांनी नोटीस मिळाल्यानंतर आपली थकबाकी आणि मालमत्ता कर जमा केला असून त्यापोटी महापालिकेकडे ७ कोटी ४८ लाख इतकी रक्कम जमा करण्यात आलेली आहे.
मालमत्ता कर नवी मुंबई महापालिकेच्या उत्पन्नाचा सर्वात मोठा स्त्रोत असून त्यामधूनच नागरी सुविधा पुरविण्यात येत असल्याने मालमत्ता कर विभागामार्फत करवसूली प्रभावीपणे करण्याकडे विशेष लक्ष दिले जात आहे. यामध्ये मालमत्ताकराचे थकबाकीदार असलेल्या व्यक्ती, संस्था यांना आवाहन करुनही तसेच नोटीस बजावूनही त्यांच्यामार्फत प्रतिसाद दिला जात नसेल तर अशा थकबाकीदारांवर महापालिकेच्या वतीने कायदेशीर कारवाई करण्यात येत आहे. त्यामुळे १२८ थकबाकीदारांची मालमत्ता जप्त करण्यात आली. या कारवाईमध्ये नेरुळ येथील अमेय को-ऑप.हौ.सोसायटी मधील ३ थकबाकीदारांनी थकीत मालमत्ताकर भरणा करणेबाबत बजावलेल्या नोटिसीकडे दुर्लक्ष केल्याने या तिन्ही मालमत्ता टाळे लावून सिलबंद करण्यात आलेल्या आहेत.
सदर करवसूली प्रक्रियेत महापालिका आयुक्त यांच्या मार्गदर्शनानुसार १ लाखापेक्षा अधिक रक्कमेचे थकबाकीदार असणाऱ्या मोठ्या थकबाकीदारांची उतरत्या क्रमाने यादी तयार करण्यात आली होती. यामधील ८ हजार मोठ्या थकबाकीदारांना थकबाकी भरण्यासाठी ७ दिवसांची मुदत देऊन नोटीसा बजावण्यात आल्या. या नोटिसांनाही प्रतिसाद न देणाऱ्या १२८ थकबाकीदारांवर मालमत्ता जप्तीची कारवाई करण्यात आल्याची माहिती मालमत्ता कर विभागाचे उपायुक्त शरद पवार यांनी दिली. यापूर्वी ६ फेब्रुवारी रोजी ३३ मोठ्या थकबाकीदारांवर मालमत्ता अटकावणीची कारवाई करुन ५ कोटी १२ लाखाची करवसूली करण्यात आली आहे.
थकबाकीदारांच्या यादीनुसार यापुढील काळात थकबाकीदार सोसायट्यांची नळजोडणी खंडीत करण्याची कारवाई सुरु करण्यात येत आहे. त्याचप्रमाणे मालमत्ता जप्तीची कारवाई करुनही थकबाकी न भरता नोटीसीला प्रतिसाद न देणाऱ्या थकबाकीदारांच्या मालमत्तांचा लिलाव करण्याची कारवाई देखील सुरु करण्यात येणार आहे.
नवी मुंबई महापालिका क्षेत्रातील मालमत्ता धारकांमार्फत महापालिकेला उपलब्ध होणाऱ्या मालमत्ताकरामधूनच नागरी सुविधांची पूर्तता केली जात असल्याने प्रत्येकाने आपली करभरणा वेळेत आणि नियमीत करावा. तसेच थकबाकी असल्यास तीही वेळेत भरुन नवी मुंबई शहर विकासात आपला सहभाग द्यावा आणि नवी मुंबई शहराचे प्रतिष्ठीत नागरिक व्हावे, असे आवाहन करण्यात येत आहे.
-डॉ. कैलास शिंदे, आयुवत-नवी मुंबई महापालिका.
