ऐरोली मधील अनधिकृत बांधकाम निष्कासित
नवी मुंबई : नवी मुंबई महापालिका अतिक्रमण विभाग तर्फे नोटीस देण्यात येऊनही संबधितांनी नोटिशीची दखल न घेतल्यामुळे नवी मुंबई महापालिका आयुक्त डॉ. कैलास शिंदे यांच्या निर्देशानुसार आणि अतिरिक्त आयुक्त (२) डॉ. राहुल गेठे यांच्या मार्गदर्शनाखाली महापालिका अतिक्रमण विभाग मार्फत ऐरोली मधील अनधिकृत बांधकामावर निष्कासनाची कारवाई करण्यात आली.
महापालिका कार्यक्षेत्रातील जी विभाग ऐरोली अंतर्गत ऐरोली सेवटर-१ मधील देशमुखवाडी येथील भास्कर शनिवार कोटकर, दिपक शनिवार कोटकर आणि सुरेश शनिवार कोटकर यांनी घर क्रमांक- १७०५/०१-०२-०३ येथील आरसीसी इमारतीचे बांधकाम महापालिकेची कोणतीही परवानगी न घेता अनधिकृतपणे सुरु केले होते. सदर अनधिकृत बांधकामास महापालिका ऐरोली विभाग कार्यालय मार्फत महाराष्ट्र प्रादेशिक नियोजन आणि नगररचना अधिनियम १९६६ मधील कलम ५४ अन्वये नोटीस बजाविण्यात आली होती. नोटीस नंतर संबंधितांनी केलेले अनधिकृत बांधकाम स्वतःहून हटविणे आवश्यक होते. परंतु, संबंधितांनी अनधिकृत बांधकाम सुरु ठेवले होते. त्यामुळे महापालिका अतिक्रमण विभाग मार्फत ६ फेब्रुवारी रोजी अतिक्रमण हटाव मोहिम राबवून सदर अनधिकृत बांधकाम अंशतः निष्कासित करण्यात आले. याशिवाय ५० हजार रुपये इतकी दंडात्मक रक्कम वसूल करण्यात आली. या धडक मोहिमेसाठी २ गॅस कटर, ८ ब्रेकर, २५ मजूर आणि १ मुकादम यांचा वापर करण्यात आला.
याप्रसंगी ऐरोली जी विभाग सहाय्यक आयुक्त डॉ. अंकुश जाधव, कनिष्ठ अभियंता संदिप म्हात्रे यांच्यासह इतर अधिकारी- कर्मचारी आणि अतिक्रमण पोलीस पथक उपस्थित होते.
दरम्यान, महापालिका अतिक्रमण विभाग मार्फत यापुढे देखील अतिक्रमण विरोधी कारवाई अधिक तीव्र करण्यात येणार आहे, असे महापालिका अतिरिक्त आयुक्त (२) डॉ. राहुल गेठे यांनी सांगितले.
