जासई येथे महाआरोग्य शिबिर संपन्न
उरण : लोकनेते दि बा पाटील यांच्या जयंतीचे औचित्य साधून ‘शेकाप'चे रायगड जिल्हा खजिनदार प्रितम जनार्दन म्हात्रे यांच्या वाढदिवसानिमित्त महाआरोग्य शिबिराचे आयोजन १२ जानेवारी रोजी जासई येथील रायगड जिल्हा परिषद मराठी शाळा येथे करण्यात आले होते.
अपोलो हॉस्पिटल, मेडीकव्हर हॉस्पिटल, न्यु ईरा हॉस्पिटल, सुश्रुषा हॉस्पिटल या रुग्णालयातील तज्ञ डॉक्टर या शिबिरात आरोग्य सेवेसाठी उपस्थित होते. रोटरी क्लब ऑफ पनवेल सेंट्रल यांच्या माध्यमातून सर्व रुग्णांना मोफत औषधे देण्यात आली. यावेळी डॉ. गिरीश गुणे यांच्यासह पनवेल मधील डॉ. निलेश बांठीया, डॉ. मुकुंद थोरात, डॉ. नितीन म्हात्रे, डॉ. पुष्कर लिखिते, डॉ. लक्ष्मण आवटे, डॉ. सायली म्हात्रे, डॉ. शैलेश शर्मा आणि इतर डॉक्टर उपस्थित होते. सदर महाआरोग्य शिबिरात इंडियन मेडिकल असोसिएशन-पनवेल आणि पनवेल डॉक्टर्स जनरल प्रॅक्टिसनर्स असोसिएशन यांच्या तज्ञ डॉक्टरांनी रुग्णांना विविध आरोग्य सेवा दिली. दीपक विलनीकल लॅबोरेटरीचे संचालक दीपक कुदळे यांच्या माध्यमातून स्त्रियांची मोफत थायरॉईड तपासणी करण्यात आली. जेणेकरून कोणत्याही भगिनीला जर थायरॉईडची लक्षणे असतील तर वेळीच त्यावर औषधोपचार सुरु करण्यास मदत मिळेल.
आर. जे. शंकरा आय हॉस्पिटल यांच्या माध्यमातून मोफत डोळे तपासणी करुन रुग्णांना योग्य ती शस्त्रक्रिया मोफत करून देण्यात येणार आहे. शस्त्रक्रियेदरम्यान प्रवासाची संपूर्ण व्यवस्था सुध्दा रुग्णांना मिळणार आहे. सदर शिबिरामध्ये आवश्यक रक्त तपासणी, जनरल बॉडी चेकअप आणि तज्ञांचा मोफत सल्ला देण्यात आला. सदर शिबिर यशस्वी होण्यासाठी शेकापक्ष, पनवेल आणि उरण तसेच जे. एम. म्हात्रे चॅरिटेबल संस्थेच्या सभासदांनी विशेष परिश्रम घेतले.
महाआरोग्य शिबिराचे आयोजन करुन समाजाप्रती असलेली आपली बांधिलकी जपत शेकाप आणि जे. एम. म्हात्रे चॅरिटेबल संस्थेने नामांकित हॉस्पिटल्स आणि डॉक्टरांकडून विविध आजारांचे निदान शोधण्यासाठी एकाच ठिकाणी रुग्णांना उपलब्ध करत आवश्यक चाचण्या आणि औषधे मोफत देण्याचे नियोजन उत्तमरित्या केले आहे. ‘शेकाप'च्या माध्यमातून अशा प्रकारे विविध उपक्रम प्रितम म्हात्रे यांच्या नेतृत्वाखाली संपूर्ण रायगड जिल्ह्यात आम्ही राबवणार आहोत.
-डॉ. बाबासाहेब देशमुख, आमदार-शेकाप.
