छत्रपती शिवाजी महाराज रुग्णालयाच्या प्रसुती विभागात खाटांमध्ये वाढ
शक्तीप्रदर्शनाने श्रीकांत शिंदे यांचा उमेदवारी अर्ज दाखल
कल्याण: कल्याण लोकसभा मतदारसंघाला एक आदर्श, काम करणारा, संसदरत्न पुरस्कार प्राप्त खासदार मिळाला आहे. गेल्या १० वर्षांत डॉ. श्रीकांत शिंदे यांनी केलेल्या कामाची पोचपावती मिरवणुकीत नागरिकांनी दिलेली आहे. त्यामुळे डॉ. श्रीकांत शिंदे यांना आपण आता थेट विजयाच्या आणि हॅटट्रिकच्या शुभेच्छा देऊया, असे प्रतिपादन मुख्यमंत्री एकनाथ शिंदे यांनी डोंबिवली येथे केले.
डॉ. श्रीकांत शिंदे यांचा उमेदवारी अर्ज भरण्यासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, सार्वजनिक बांधकाम मंत्री रवींद्र चव्हाण यांच्यासह ‘महायुती'चे आमदार आणि नेते २ मे रोजी डोंबिवली येथे उपस्थित होते. अर्ज भरण्यापूर्वी काढण्यात आलेल्या भव्य मिरवणुकीत हजाराेंच्या संख्येने नागरिक या उत्स्फुर्तपणे सहभागी झाले होते. डॉ. श्रीकांत शिंदे यांनी तिसऱ्यांदा कल्याण लोकसभेसाठी उमेदवार म्हणून अर्ज सादर केला. यावेळी मुख्यमंत्री एकनाथ शिंदे, त्यांच्या पत्नी लता शिंदे, मुख्यमंत्र्यांचे वडील संभाजी शिंदे, डॉ. श्रीकांत शिंदे यांच्या पत्नी वृषाली शिंदे आणि मुलगा रुद्रांश शिंदे असे संपूर्ण शिंदे कुटुंब उपस्थित होते.
उमेदवारी अर्ज दाखल केल्यानंतर मुख्यमंत्री एकनाथ शिंदे यांनी उपस्थितांना संबोधित केले. कामाच्या माध्यमातून डॉ. श्रीकांत शिंदे यांनी स्वतःची एक वेगळी ओळख निर्माण केली आहे. पंतप्रधान नरेंद्र मोदी यांनी सांगितल्याप्रमाणे बुथ लेव्हलला काम करा आणि बुथ जिंका. मतदान वाढेल असे काम केले पाहिजे, तरच डॉ. श्रीकांत शिंदे यांना मताधिक्याचा रेकॉर्ड मोडता येईल, असे आवाहन यावेळी मुख्यमंत्री शिंदे यांनी यावेळी केले.
उन्हाळी सुट्टी आणि लग्नसराई निमित्त काही लोक गावी गेले आहेत. त्या सर्वांना विनंती करुन डॉ. श्रीकांत शिंदे यांना मतदान करा, असे आवाहन करायचे आहे. तरच नवा विक्रम आपण नोंदवू. डॉ. श्रीकांत शिंदे यांना मत म्हणजे मोदी यांना मत, धनुष्यबाणाला मत म्हणजे मोदींना मत, महायुतीला मत म्हणजे मोदी यांना मत आहे. त्यामुळे आपण सर्वांनी २० मे पर्यंत मेहनत करायची आहे. २० मे नंतर पुढील ५ वर्ष खासदार मेहनत करतील आणि मतदारसंघाची सेवा करतील, असेही मुख्यमंत्री शिंदे स्पष्ट केले.
तत्पूर्वी ठाणे येथील निवासस्थानी औक्षण करून वडीलधाऱ्यांचे आशिर्वाद घेत डॉ. श्रीकांत शिंदे डोंबिवलीकडे रवाना झाले. डोंबिवलीचे ग्रामदैवत असलेल्या श्री गणेश मंदिरात जाऊन डॉ. श्रीकांत शिंदे यांनी सपत्नीक दर्शन घेत आपल्या रॅलीला सुरूवात केली. आप्पा दातार चौकातून डोंबिवली शहराच्या मध्यवर्ती भागातून लोकमान्य टिळक चौकामार्गे संत सावळाराम महाराज क्रीडा संकुलापर्यंत रॅली निघाली. यावेळी कल्याण लोकसभा मतदारसंघातील नागरिकांनीही मिरवणुकीत सहभाग नोंदवला. या मिरवणुकीत विविध भाषिक, विविध संस्था, संघटनांचे सदस्य सहभागी झाले. पंजाबी, दाक्षिणात्य, आगरी कोळी बँड पथक, वारकरी संप्रदायाच्या टाळ मृदुंगाच्या गजरात या मिरवणुकीची सुरुवात झाली. ‘महायुती'च्या सर्व घटकपक्षांनी यावेळी शक्तीप्रदर्शन केले. यावेळी घोषणांनी यावेळी डोंबिवली मधील रस्ते दुमदुमून गेले. उन्हाचा पारा चढलेला असतानाही मिरवणुकीतील गर्दीवर काहीही परिणाम झाला नव्हता. दुपारी १२ च्या सुमारास घरडा सर्कल चौकात मिरवणुकीची सांगता झाली.
यावेळी मुख्यमंत्री एकनाथ शिंदे, उपमुख्यमंत्री देवेंद्र फडणवीस, ना. रविंद्र चव्हाण, ‘मनसे'चे आमदार राजू पाटील, ‘शिवसेना'चे आमदार प्रताप सरनाईक, आमदार डॉ. बालाजी किणीकर, आमदार महेंद्र थोरवे, आमदार विश्वनाथ भोईर, माजी आमदार रविंद्र फाटक, नरेंद्र पवार, शिवसेना प्रवक्ते आणि ठाणे लोकसभाचे उमेदवार नरेश म्हस्के, ‘आमदार किसन कथोरे, आमदार कुमार आयलानी, आमदार ज्ञानेश्वर म्हात्रे, आमदार निरंजन डावखरे, माजी मंत्री जगन्नाथ पाटील, ‘राष्ट्रवादी'चे प्रदेश उपाध्यक्ष प्रमोद हिंदुराव, ठाणे आनंद परांजपे, ‘रिपाइं'चे जिल्हाध्यक्ष प्रल्हाद जाधव यांच्यासह ‘महायुती' चे सर्व प्रमुख नेते, पदाधिकारी आणि कार्यकर्ते मोठ्या संख्येने उपस्थित होते.
