बेलगाम बिल्डरांना दणका
बांधकाम व्यावसायिकांनी घरे विक्री करताना यापुढे करारनाम्यात पार्किंगबाबत संपूर्ण तपशील देणे बंधनकारक असणार आहे, असा नियम महाराष्ट्र स्थावर संपदा प्राधिकरण (महारेरा) तर्फे अलिकडेच अनिवार्य करण्यात आल्याने बिल्डरांना चाप बसेल अशी अपेक्षा आहे. नवी मुंबई, ठाणे, मुंबई आणि इतर शहरांसह महाराष्ट्र राज्यात मोठ्या प्रमाणात घरांची खरेदी केली जाते. हल्ली घरांसोबत पार्किंग घेण्याचा कलही वाढत आहे. मात्र, बिल्डिंगमध्ये अपुऱ्या जागेच्या अभावी पार्किंग करण्यास अडचणी येतात. हल्ली काही बिल्डर घर खरेदी केल्यानंतरच सोबतच पार्किंग जागाही विकत देतात. मात्र तरीही पार्किंगवरुन होणारे वाद कायम आहेत. या वाद-विवादावर महाराष्ट्र स्थावर संपदा प्राधिकरण (महारेरा) द्वारे मोठे पाऊल उचलण्यात आले आहे. बिल्डरने यापुढे घर विक्री करताना करारनाम्यात पार्किंगबाबत संपूर्ण तपशील देणे बंधनकारक असणार आहे, असा नियम ‘महारेरा'ने अलिकडेच लागू केला आहे. परिणामी ‘पार्किंग स्पेस'ची विक्री करत असतानाच बिल्डरला लिखित स्वरुपात पार्किंग जागेची माहिती द्यावी लागणार आहे. यामध्ये पार्किंग जागेचा तिथला क्रमांक, पार्किंगचा आकार, उंची, रुंदी, पार्किंगचे इमारतीतील ठिकाण, या सगळ्याचा उल्लेख असणे बंधनकारक असणार आहे. सदनिका नोंदणीच्या वेळी दिल्या जाणाऱ्या वाटप पत्रात आणि विक्री करारांमध्येच पार्किंगचा तपशील असलेले जोडपत्र देणे यापुढे बिल्डरांना बंधनकारक असणार आहे. ‘महारेरा'च्या नियमांनुसार, बिल्डर ओपन पार्किंग स्पेसची विक्री करु शकत नाही. तसेच, पार्किंगमध्ये गाडी उभी करण्यावरुन वाद-विवाद होणार नाहीत यासाठी ‘महारेरा'द्वारे ओपन पार्किंग स्पेसमध्ये मार्किंग करण्याचा आदेश देण्यात आला आहे. हौसिंग सोसायटीच्या कोणत्या भागात किती गाड्या पार्क होणार, याची माहिती बिल्डरने देणे आवश्यक आहे. डिसेंबर-२०२२ मध्ये ‘महारेरा'ने तीन नियम बनवले आहेत. या नियमात कोणताही बदल करायचा असेल तर बिल्डरला ‘महारेरा'ची परवानगी घ्यावी लागणार आहे. आता यात पार्किंग संदर्भातील चौथा नियमही जोडण्यात आला आहे. पार्किंग स्पेसबाबत आत्तापर्यंत कोणतेही नियम नव्हते. त्यामुळे अनेकदा बिल्डर बिल्डिंगच्या बीमजवळची जागा पार्किंग म्हणून विक्री करत होते. मात्र, या बीममुळे आणि अपुऱ्या जागेमुळं कार पार्क करण्यास अडचण येत होती. याबाबत अनेक तक्रारी महारेराकडे आल्यानंतर वादही झाले होते. ओपन पार्किंगमध्येही कार पार्क करण्यावरुन वाद-विवाद होत होते. त्यामुळेच घरे विक्री करताना यापुढे करारनाम्यात पार्किंगबाबत घर खरेदीदाराला संपूर्ण तपशील देणे बिल्डरांना बंधनकारक करण्याचे पाऊल ‘महारेरा'ने उचलले आहे. भविष्यात पार्किंग बाबतच्या समस्यांना सामोरे जावे लागू नये याकरिता ‘महारेरा' द्वारे नवे परिपत्रक जारी करण्यात आले आहे. ‘महारेरा'ने या पूर्वी ३० जुलै २०२१ रोजी परिपत्रक जारी करत पार्किंगच्या अनुषंगाने सूचना जारी केली होती. या सूचनेत खुला पार्किंग एरिया चटई क्षेत्रात मोजला जात नसल्यामुळे विकासक त्यासाठी पैसे आकारु शकत नाही, असे ‘महारेरा' तर्फे स्पष्ट करण्यात आले होते. त्याशिवाय गॅरेज, अच्छादित पार्किंग याबाबतही परिपत्रकात ‘महारेरा' द्वारे स्पष्टपणे सूचना देण्यात आल्या आहेत. मात्र, तरीही बिल्डरांकडून पार्किंग बाबत याविषयी खबरदारी घेतली जात नसल्याने अखेर ‘महारेरा'ला पुन्हा एकदा परिपत्रक काढावे लागले आहे. ‘महारेरा'च्या नवीन परिपत्रकामुळे घरे विक्रीकरताना यापुढे करारनाम्यात पार्किंगबाबत घर खरेदीदाराला संपूर्ण तपशील देण्याचे बंधन बिल्डरांना राहणार आहे. एकूणच ‘महारेरा'च्या नवीन परिपत्रकामुळे बेलगाम बिल्डरांना मोठाच चाप बसणार आहे.
