६ वर्षात हरविलेले १७०९ मोबाईल तक्रारदारांना परत
२०२३ मध्ये ४६२ मोबाईल हस्तगत
ठाणे : ठाणे शहर पोलीस आयुक्तालय हद्दीतील परिमंडळ-५ मधील वर्तकनगर पोलीस ठाणे हद्दीत मागील ५ वर्षात हरविलेल्या आणि दाखल झालेल्या तक्रारींपैकी १ हजार ७०९ हरविलेले मोबाईल वर्तकनगर पोलीस ठाणे मधील महिला हवालदार यशोदा घोडे, पोलीस हवालदार रवींद्र माने यांच्या प्रयत्नाने परत मिळवलेले आहेत. तर सन २०२३ या वर्षात हरविलेल्या ४६२ मोबाईल या पथकाने परत मिळवलेले असून, त्यापैकी ४३ तक्रारदारांना मोबाईल २० डिसेंबर रोजी देण्यात आले.
पोलीस हवालदार यशोदा घोडे, हवालदार रवींद्र माने पोलीस कर्मचारी सध्या वर्तकनगर पोलीस ठाणे मध्ये कार्यरत आहेत. मात्र वर्तकनगर पोलीस ठाणे मध्ये कार्यरत असल्यापासून या जोडगोळीने हरविलेल्या मोबाईलच्या सर्व्हिस देणाऱ्या कंपनीशी पत्रव्यवहार करुन मोबाईलची तांत्रिक माहिती मिळविली. या माहितेचे तांत्रिक विश्लेषण करुन मोबाईलचे लोकेशन शोधण्यात आले. त्यानंतर संबंधितांना संपर्क करुन सदर मोबाईल चोरीचा असल्याचे समोर येताच पोलिसांनी सदर मोबाईल कुरियरद्वारे मागविले. पोलीस हवालदार यशोदा घोडे आणि पोलीस हवालदार रवींद्र माने या जोडगोळीने कुरिअरद्वारे पश्चिम बंगाल, कर्नाटक, उत्तरप्रदेश, तामिळनाडू, गुजरात या राज्यातून ४६२ मोबाईल परत मिळवले. यापैकी ४३ मोबाईल तक्रारदारांना पडताळणी करीत परत दिले.
वर्ष परत मिळवलेले मोबाईल
---------------------------------------------------------------------------
२०१८ १५०
२०१९ २१०
२०२० १८०
२०२१ २०१
२०२२ ५०६
२०२३ ४६२
६ वर्ष १७०९
