एपीएमसीतील एमएच-43 बारवर कारवाई
एपीएमसी सेक्टर-19 डी मधील एमएच-43 रेस्टारांट व बारवर एपीएमसी पोलिसांची कारवाई
नवी मुंबई : नियमांचे उल्लंघन करत सुरु असलेल्या एपीएमसी सेक्टर-19 डी मधील एमएच-43 रेस्टारांट व बारवर एपीएमसी पोलिसांनी मंगळवारी मध्यरात्री छापा मारुन सदर बारमध्ये ग्राहकांना आकर्षीत करण्यासाठी अश्लील हावभाव बीभत्स वर्तन करणाऱ्या 13 महिला वेटर, 1 मॅनेजर व 4 पुरुष वेटर अशा एकुण 18 जणांना पोलिसांनी ताब्यात घेतले आहे.
एपीएमसीतील पामबीच मार्गालगत असलेल्या एमएच-43 हे बार ऍन्ड रेस्टारंटमध्ये काही गिऱ्हाईक संगनमत करुन बारमधील महिला वेटर्सना अश्लिल व बिभत्स नृत्य करण्यास प्रोत्साहीत करत असल्याचे तसेच प्रिमायसेस परवान्याच्या अटींचे उल्लंघन करत असल्याची माहिती एपीएमसी पोलिसांना मिळाली होती. सदर माहितीची शहानिशा करण्यासाठी मंगळवारी मध्यरात्री एपीएमसी पोलिसांचे पथक एमएच-43 या बारमध्ये गेले होते. यावेळी सदर बारमध्ये काही महिला वेटर या अश्लिल व बीभत्स हावभाव करत असताना दिसुन आल्या. त्यामुळे एपीएमसी पोलिसांनी बारचा मॅनेजर पाउलसामी यादवन (41), 4 वेटर आणि 13 महिला वेटर अशा एकुण 18 जणांविरोधात गुन्हा दाखल करुन सर्वांना ताब्यात घेतले आहे.
