पानमसाला व सुगंधीत तंबाखुचा साठा बाळगणा-या दोघांविरोधात गुन्हा दाखल
गुटख्याचा साठा बाळगणारी दुक्कली जेरबंद
नवी मुंबई : नवी मुंबई पोलिसांच्या अंमली पदार्थ विरोधी पथकाने गत शनिवारी तळोजा सेक्टर-9 भागातील एका गाळ्यावर छापा मारुन सुमारे 9 लाख रुपये किंमतीचा गुटख्याचा साठा व सव्वा लाखाची रोख रक्कम जप्त केली आहे. या कारवाईत पोलिसांनी गुटख्याचा साठा करुन ठेवणाऱया महमद हमजा महमद शाहिद खान (26) आणि अरफान सिराज अहमद शेख (22) या दोघांना अटक केली आहे. सदर गुटख्याचा साठा या दोघांनी कुठून आणला याबाबत अंमली पदार्थ विरोधी पथकाकडून अधिक तपास करण्यात येत आहे.
तळोजा फेज-1,सेक्टर-9 मधील अंम्मार रेसिडेन्सी या इमारतीतील गाळा नंबर-3 मध्ये वेगवेगळ्या कंपनीचा प्रतिबंधित असलेला गुटखा, सुगंधी तंबाखु व सुगंधी सुपारी विक्री करण्यासाठी साठवुन ठेवण्यात आल्याची माहिती अंमली पदार्थ विरोधी पथकाला मिळाली होती. सदर माहितीच्या आधारे गुन्हे शाखेचे पोलीस उपआयुक्त सुरेश मेंगडे यांच्या मार्गदर्शनाखाली वरिष्ठ पोलीस निरीक्षक बासीत आली सय्यद, पोलीस उप निरीक्षक विजय शिंगे व त्यांच्या पथकाने शनिवारी सायंकाळी तळोजा फेज-1,सेक्टर-9 मधील अंम्मार रेसिडेन्सी या इमारतीतील गाळा नंबर-3 वर छापा मारला.
यावेळी सदर गाळ्यामध्ये महाराष्ट्रात प्रतिबंधित असलेला गुटखा व सुगंधी तंबाखुचा साठा करुन ठेवण्यात आल्याचे आढळुन आले. त्यानंतर अंमली पदार्थ विरोधी पथकाने सदर गाळ्यातून सुमारे 9 लाख रुपये किंमतीचा वेगवेगळ्या कंपनीचा प्रतीबंधीत पानमसाला व सुगंधीत तंबाखुचा साठा तसेच 1 लाख 26 हजाराची रोख रक्कम असा एकुण 10 लाख 20 हजार रुपये किंमतीचा मुद्देमाल जप्त केला आहे. त्यानंतर अंमली पदार्थ विरोधी पथकाने गुटख्याचा साठा करुन ठेवणाऱया महमद हमजा खान व अरफान शेख या दोघांविरोधात तळोजा पोलीस ठाण्यात गुन्हा दाखल करुन त्यांना ताब्यात घेतले आहे.
