कळंबोलीतून 5 वर्षाच्या मुलासह महिला बेपत्ता
विवाहिता आपल्या 5 वर्षाच्या मुलासह गत 2 जुन रोजी बेपत्ता ; कळंबाेलीत खळबळ
नवी मुंबई: कळंबोली सेक्टर-14 मधील सुमुख को.ऑप. हाऊसिंग सोसायटीत राहणारी विवाहिता आपल्या 5 वर्षाच्या मुलासह गत 2 जुन रोजी बेपत्ता झाली आहे. या दोघांचा अद्याप ठाव ठिकाणा न लागल्याने कळंबोली पोलिसांनी बेपत्ता झालेली महिला व तिचा मुलगा या दोघांच्या मिसींगची तक्रार नोंद करुन त्यांचा शोध सुरु केला आहे.
या घटनेतील बेपत्ता झालेल्या महिलेचे नाव मिनाक्षी श्याम जैस्वार/आझाद (32) तर तिच्या मुलाचे नाव पियुश श्याम जैस्वार/आझाद (5वर्षे 6 महिने) असे आहे. हे दोघेही कळंबोली सेक्टर-14 मधील सुमुख को-ऑप हाऊसिंग सोसायटीत राहत होते. गत 2 जुन रोजी मिनाक्षीचा पती श्याम जैस्वार हा कामावर गेला असताना, घरामध्ये आपल्या मुलसाह असलेली मिनाक्षी जैस्वार ही आपल्या 5 वर्षीय मुलाला घेऊन दुपारच्या सुमारास घरातुन निघुन गेली. सायंकाळी श्याम जैस्वार घरी आल्यानंतर घरात मिनाक्षी व मुलगा पियुश निदर्शनास न आल्याने त्याने सर्व नातेवाईक व त्याच्या मित्रांकडे शोध घेतला. मात्र ते कुठेच सापडले नाहित.
अखेर श्याम जैस्वार यांनी कळंबोली पोलीस ठाण्यात मिनाक्षी व पियुश हे दोघे हरविल्याची नोंद केल्यानंतर पोलिसांनी बेपत्ता झालेल्या या माय लेकाचा शोध सुरु केला आहे. यातील मिनाक्षी जैस्वार हिचा वर्ण गोरा असून तिची उंची 5 फुट 3 इंच इतकी असून ती सडपातळ आहे. तिने अंगावर फिकट हिरवट रंगाची सलवार व काळ्या रंगाची लेगीस घातली आहे. तर पियुश जैस्वार याचा वर्ण गोरा असुन त्याची उंची 3 फुट 6 इंच इतकी असून तो देखील सडपातळ आहे. त्याच्या अंगात केसरी रंगाचा टी-शर्ट व पांढऱया रंगाची जीन्स घातलेली आहे. या वर्णनाची महिला व मुलगा कुणाला आढळुन आल्यास त्याबाबतीची माहिती तत्काळ कळंबोली पोलिसांना द्यावी असे आवाहन पोलिसांकडून करण्यात आले आहे.
